ޕީޖީގެ މަގާމަށް ހައިކޯޓްގެ ކުރީގެ ފަނޑިޔާރު އައްބާސް ޝަރީފްގެ ނަން ފޮނުއްވައިފި
ޕްރޮސެކިއުޓަރ ޖެނެރަލް (ޕީޖީ) ގެ މަގާމަށް ހައިކޯޓްގެ ކުރީގެ ފަނޑިޔާރު އައްބާސް ޝަރީފްގެ ނަން ރައީސުލްޖުމްހޫރިއްޔާ ފޮނުއްވައިފި އެވެ.
ރައީސުލްޖުމްހޫރިއްޔާ ފޮނުއްވި ނަންފުޅު މަޖިލިހަށް އިއްވުމަށް މިރޭ ވަނީ ދައުރުން ބޭރުން ޚާއްޞަ ޖަލްސާއެއް ބާއްވާފައެވެ. 7 މިނިޓަށް ކުރިއަށް ގެންދެވި ޖަލްސާގައި ޕްރޮސެކިއުޓަރ ޖެނެރަލަކު އައްޔަން ކުރެއްވުމަށް ރައީސުލްޖުމްހޫރިއްޔާ ފޮނުއްވި ސިޓީ އަމީން ޢާއްމު ތަޅުމަށް އިއްވެވިއެވެ. ޕްރޮސެކިއުޓަރ ޖެނެރަލްގެ މަގާމަށް ކުރިމަތިލެއްވި އެހެން ބޭފުޅުންގެ ނަންފުޅުވެސް މަޖިލިހާ ހިއްސާކުރެވިކަން ސިޓީގައި ފާހަގަކުރެއްވި އެވެ. ނަމަވެސް އެހެން ބޭފުޅުންގެ ނަން ތަޅުމުގައި ހިއްސާއެއް ނުކުރެއެވެ.
ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުالله ވަނީ އައްބާސް ޝަރީފްގެ ނަން ދިރާސާކުރެއްވުމަށް ޖުޑިޝަރީ ކޮމިޓީއަށް ފޮނުއްވާފައެވެ. މަޖިލިހުގެ ޖަލްސާއެއް ދެން އޮންނާނީ އަންނަ ހޯމަ ދުވަހު ކަމަށް ރިޔާސަތުން އިއުލާނު ކުރެއްވިއެވެ. އައްބާސް ޝަރީފް މިވަގުތު ހުންނެވީ ސެކްރެޓެރީ ޓު ދަ ޕްރެޒިޑެންޓް އޮން ލީގަލް އެންޑް ޕާލަމެންޓްރީ އެފެއާޒްގެ މަގާމްގައެވެ.
ޕީޖީގެ މަގާމް ހުސްވީ ރައްޔިތުންގެ މަޖިލިހުން އިތުބާރު ނެތްކަމުގެ ވޯޓް ނަގާ ހުސައިން ޝަމީމް މަގާމުން ދުރުކުރުމުންނެވެ. ނަމަވެސް ވޯޓްގެ ކުރިން އިސްތިއުފާ ހުށަހެޅުއްވި ކަމަށް ޝަމީމް ވިދާޅުވިއެވެ.
ރިއެކްޝަންސް
