އެސްޓީއޯގެ އަހަރީ އާންމު ޖަލްސާ އަންނަމަހުގެ 12 ގައި ބާއްވަނީ

ސްޓޭތް ޓްރޭޑިންގ އޮގަނައިޒޭޝަން (އެސްޓީއޯ) ގެ އަހަރީ އާންމު ޖަލްސާ އަންނަ ޖުލައި މަހުގެ 12 ވަނަ ދުވަހު ބާއްވަން އެކުންފުނިން ނިންމައިފި އެވެ.

އެސްޓީއޯއިން ބުނީ، މިޖަލްސާ ބޭއްވުމަށް ނިންމާފައިވަނީ ހުޅުލެ، ނީރި ލައުންޖުގައި، އަންނަ މަހުގެ 12 ވަނަ ދުވަހުގެ ރޭ 9:00 ގައެވެ. މިޖަލްސާގައި ހިއްސާދާރުންނަށް ހާޒިރުވެގެންގެންނާއި . އޮންލައިންކޮށް ބައިވެރިވެވޭނެ ކަމަށް ވެސް އެސްޓީއޯ ބުނެފައިވެ އެވެ.

އަހަރީ އާންމު ޖަލްސާގައި ބައިވެރިވެވޭނީ މިމަހުގެ 26 ވަނަ ދުވަހުގެ ނިޔަލަށް ކުންފުނީގެ ހިއްސާދާރުންގެ ދަފްތަރުގައި ހިމެނޭ ފަރާތްތަކަށްކަމަށް އެސްޓީއޯއިން ބުނެއެވެ. މިޖަލްސާގައި އެސްޓީއޯގެ ޑިރެކްޓަރުންގެ ބޯޑު އައްޔަންކުރުންވެސް އޮންނާނެއެވެ. ޑިރެކްޓަރުންގެ ބޯޑަށް ސަރުކާރުގެ ފަރާތުން 6 މެންބަރުން އަދި އާންމު ހިއްސާދާރުންގެ ފަރާތުން 1 މެންބަރަކު ހޮވާނެއެވެ.

މީގެއިތުރުން އަންނަ އަހަރަށް ޢައްޔަންކުރާ ކުންފުނީގެ އޮޑިޓަރުން ހޮވާ، އެފަރާތުގެ އުޖޫރަ ކަނޑައެޅުމާއި، އަލަށް އެކުލަވާލެވުނު ރާއްޖޭގެ ކުންފުނީގެ ޤާނޫނާއި ގުޅިގެން ކުންފުނީގެ ހިންގާ ގަވާއިދަށް މިވަގުތަށް ގެންނަ ހުށަހަޅާ އިސްލާޙްތައް ގެނައުމަށް ފާސްކުރުންވެސް އަހަރީ އާއްމު މިޖަލްސާގައި އޮންނާނެ ކަމަށް އެސްޓީއޯއިން ބުނެއެވެ.

އެސްޓީއޯއިން ވަނީ އަހަރީ އާންމު ޖަލްސާގެ ވަގުތު ކުޑަކުރުމަށްޓަކައި ހިއްސާދާރުންގެ ޚިޔާލު ފާޅުކުރުމުގެ ބައި މިމަހުގެ 8 ވަނަ ދުވަހު ބާއްވާފަ އެވެ. އެބައްދަލު ވުން އޮތީ އެސްޓީއޯ ޓްރޭޑް ސެންޓަރުގެ ސެމިނާ ރޫމުގައެވެ. އެބައްދަލު ވުމުގައި އާންމު ހިއްސާދާރުންގެ ތެރެއިން ބައްދަލުވުމުގައި ބައިވެރިވާން ބޭނުންވި ފަރާތްތަކަށް ޚިޔާލު ފާޅު ކުރުމުގެ ފުރުސަތު ދެވުނެވެ.