އުމުރު މަތިވަމުންދާއިރު އުފާވެރިކޮށް ހުންނަން ބޭނުންނަމަ މިކަންކަމާ ދުރުވެލާ...
އުމުރު މަތިވަމުން ދިއުމާއި, ހިތްހަމަޖެހުމާއި އުފަލާއެކު އުމުރު މަތިވެގެން ދިއުމަކީ ވަރަށް ތަފާތު ދެކަމެކެވެ. ނަމަވެސް މި ދެކަންތަކުގެ ފަރަގު ގުޅިފައިވަނީ އަހަރެމެންގެ އާދަތަކާއެވެ. ބައެއްހަފަރު އަހަރެމެންގެ އާދަތައް ހުންނަގޮތުން އުމުރު މައްޗަށްދާއިރު މީހާ އޭނާއަށްވެސް އޭނާއަކި ކާކުކަން, ނުވަތަ ވަގުތާއި ޙާލަތުގެ ތެރެއިން އުފަންވާ މީހާއަކީ ކާކުން ނޭނގޭ ފަހަރުވެސް އާދެއެވެ. ހަމައެގޮތަށް, ތިމާ ބޮޑުވެ ފުރާފުރިހަމަވަމުން އައި ރަންޒާމާނުގައި ތިމާ އެންމެ ލޯބިކުރި ކަންތައް އެއީ ތިމާއާ ބީރައްޓެހި ކަންކަމަށްވެސް ވެދެއެވެ.
ތިމާއަށް އެކަމުން ތަސައްލީއެއް ނުލިބޭ އާދަތަކާ ދުރުވެލުމުން ނަފްޞަށް މިނިވަންކަމުގެ އިޙްސާސް ކުރުވައެވެ. އަދި ހިތްހަމަޖެހުމާއެކު އުމުރު މަތިވަމުންދެއެވެ. އެފަދަ އާދަތަކާ ދުރުވުމަކީ އަމިއްލަ ނަފްޞަށް ކުރެވޭ ކުޑައިމީސްކަމެއް ކަމަށް ހީނުކުރާށެވެ. ނަމަވެސް އެއީ އުފާވެރި ކަމާއެކު ދިރިހުރުމަށް އަމިއްލައަށް ކޮށާ މަގަކަށް ހަދާށެވެ. ބައެއް އާދަތަކާ ދުރުވެލަން ފަސޭހަ ނުވިނަމަވެސް އޭގެ ސަބަބުން ހަޔާތަށް އުފާވެރިކަން ގެނުވާނެކަން ގައިމެވެ.
1. މާޒީގައި ތާށިވެފައި ނުހުރެ ކުރިއަށް ދިއުން: އަހަރެމެންގެ އުމުރު މަތިވަމުންދާއިރު ކުޑައިރުގެ އުފާވެރި ނުވަތަ ހިތާމަވެރި ހަނދާންތައް އަހަރެމެން ޤައިދުކުރިއަ ނުދޭށެވެ. ނަމަވެސް ބައެއްފަހަރު މާޒީ ހަނދާންކޮށްލުމަކީ މައްސަލައެއް ނޫނެވެ. އެކަމަކު އޭގެތެރެއިން ނިކުންނަށް އުނދަގޫވާވަރަށް މާޒީގެ ތެރެއަށް ނުފީނާށެވެ. ބައެއްފަހަރު އަހަރެމެން މާޒީއާއި, މިހާރު އަޅާކިޔަމެވެ. ގެއްލިފައި ހުރި ފުރުޞަތުތަކާމެދު ހިތާމަކުރަމެވެ. އެދުވަސް އެނބުރި އަންނާނެ ނަމައޭ ހިތަށް އަރާފަހަރުވެސް މަދެއްނުވާނެއެވެ. ނަމަވެސް އެކަންކަމާމެދު އަބަދު ވިސްނުމަކީ އަމިއްލަ ނަފްޞަށް ހިތާމަ ގެނުވާކަންކަން ނަމަ އެކަމާ ދުރުހެލި ވާށެވެ. މާޒީން އިބްރަތް ޙާސިލްކޮށް ކުރިމަގު އުޖާލާކުރެވޭތޯ ބަލާށެވެ.
2. ކޮންމެކަމަކާމެދު ބޯހާސްވާވަރަށް ވިސްނުން: މާބޮޑަށް ކަންކަމާމެދު ވިސްނުމަކީ ސިކުނޑި ހާސްވާކަމެކެވެ. އަދި އަމިއްލަ އަށް ނިންމާ ނިންމުންތަކާމެދު ދެވަނަ ވިސްނުމަކަށް އަބަދުވެސް ދާންޖެހޭ ކަމެކެވެ. އަދި ބައެއް ފަހަރު އަމިއްލަ ނަފްޞުވެސް ވަރުބަލިކޮށްލާ ކަމެކެވެ. މާބޮޑަށް އެކަމާމެދު ވިސަނައިގެން އޭގެ ނަތީޖާ ވަކި ބަދަލުކުރެވޭ ހެއްޔެވެ! އެހެންކަމަށްވާނަމަ އެކަމަށް އަހަރެމެންގެ އުފަލާއި ހިތުގެ ހަމަޖެހުން ނަގާލަނީ ކީއްވެހެއްޔެވެ! އުފަލާއެކު އުމުރު ހޭދަކުރަން ބޭނުންނަމަ މާބޮޑަށް ކަންތަށްތަކާ ނުވިސްނާށެވެ. ވިސްނުންތެރިކަމާއެކު މިހާރާމެދު ފަރުވާތެރިވާށެވެ.
3. އަމިއްލަ ސިއްޙަތާމެދު އިޙްމާލުވުން: މީ އަހަރެމެންގެ ތެރެއިން އެންމެންގެވެސް ކަށީގައި ހިފާފައި ހުންނަ ނުބައި އާދައެކެވެ. މަސައްކަތުގެ މާޙައުލުގަ އާއި ދިރިއުޅުމާއި ދަރިންގެ ކަންކަމުގައި އަވަދިނެތި އުޅޭއިރު އެންމެ ބޮޑަށް އިޙްމާލުވެވެނީ އަމިއްލަ ސިއްޙަތާއި ދުޅަހެޔޮކަމަށެވެ. ސިއްހަތަކީ ނެގޯޝިއޭޓް ނުކުރެވޭނެ ކަމަކަށް ހަދާށެވެ. ދިރިއުޅުމުގެ ވައްޓަފާޅިއަށް ގެނެވޭ ކުޑަކުޑަ ބަދަލަކުންވެސް މިކަމަށް ބަދަލެއް ގެނެވިދާނެއެވެ.
4. ހިތުގައި އުފެދިފައިވާ ނުތަނަވަސްކަމުގެ ގިނި ނިވާލާށެވެ: އަހަރެމެން އެންމެންނަކީވެސް ހަޔާތުގެ ކޮންމެވެސް ހިސާބެއްގައި ކޮންމެވެސް ގޮތަކުން އެހެން މީހެއްގެ ފުށުން ހިތްދަތިކަމެއް ލިބިފައިވާ މީހެކެވެ. އެއީ މީހަކު ބުނެލި ބަހެއްކަމުގައިވެސް ވެދާނެއެވެ. އެކަމަކު އެކަން ހިތުގައި އަޅައިގެން, އެކަން ބަރަކަށް ހަދައިގެން އުޅުމަކީ ބުރަކަށީގައި ބަރު ދަބަހެއް ބާއްވައިގެން ދިރިއުޅުން ކަހަލަ ކަމެކެވެ. އޭގެ ސަބަބުން ތިބާ ކުރަން ބޭނުންވާ ކަންތައް ކުރުމުގައި ކުރިއަށް ނުދެވި އުޅެންޖެހޭ ފަހަރުވެސް އާދެއެވެ. ރުޅިވެރިކަމާއި, ނަފްރަތާއި އެކު މީހަކު ތިމާއާ ދޭތެރޭ ކޮށްފައިވާ އަމަލެއް އަބަދު ހިތުގައި އަޅައިގެން އުޅުމުން ހަޤީގަތުގައި އެމީހުންނަށް އަހަރެމެންނަށް އެދެވެނީ ބާރުވެރިކަމެކެވެ. އެއީ އެ އިޙްސާސްތައް ތިމާ ގައިދުކުރުވާތީއެވެ. އެހެން ކަމުން ބޭކާރު ސްޓްރެސް އާއި ހިތްނުތަނަވަސް ކަމުން ދުރުވުމަށް އެކަންތަކުން ސަލާމަތްވެ އަމިއްލަ ނަފްޞު މިނިވަންކުރާށެވެ. އެކަން އެގޮތަށް ކުރުމަކީ އެކަންކަން ހަނދާން ނައްތާލުމެއް ނޫނެވެ. އަދި އެކަން ނުވާކަމަށް ހެދުމެއްވެސް ނޫނެވެ. ނަމަވެސް އެއީ ހިތިކަމާއި ހަމަނުޖެހުމެއްގެ މައްޗަށް ސިކުނޑިއަށް ހަމަޖެހުމާއި ނަފްސަށް އުފާވެރިކަން ހޯދުމެވެ. އެހެންކަމުން, އުމުރު މަތިވަމުންދާއިރު އުފާވެރިކަމުގައި ހުންނަން ބޭނުންނަމަ ހިތުގައި އުފެދިފައިވާ ހިތިކަން ފިލުވާލާލާށެވެ. ނަފްސުގެ މިނިވަންކަން އަންނާނި މަޢާފުކުރުމަކުންނެވެ. (ފުރަތަމަ ބައި)
ރިއެކްޝަންސް
