ބެލެނިވެރިންގެ ފަރާތުން ކުދިން ސިއްރުން ދަސްކުރާ 8 ކަމެއް...ފަހުބައި
ކުޑަކުދިންނަކީ އަބަދުވެސް އެކުދިންގެ މާހައުލުން ކަންކަން ދަސްކުރާ ބައެކެވެ. އެކުދިންގެ ފުރަތަމަ ރޯލް މޮޑެލުންނަކީ މައިންބަފައިންނެވެ. އެކުދިންގެ އަމަލުތަކުން ތިމާ އުޅޭއުޅުމަށް ސަމާލުކަން ދޭހެން ހީނުވިއަސް ތިމާގެ އުޅުން އެކުދިން ވަރަށް ގާތުންބަލައެވެ. ޙާއްސަކޮށް ތިމާގެ އަމަލުތައް އެހެން މީހުންނާމެދު ބަހައްޓާގޮތް އެކުދިންގެ ސަބްކޮންޝަސް މައިންޑްގައި ރައްކާކުރެވެއެވެ. އަދި އެކަންކަން އެކުދިންގެ ހެދިބޮޑުވުމުގައި މުޙިއްމު ދައުރެއް އަދާކުރެއެވެ. އެހެންކަމުން ކުޑަކުދިންގެ ތެރޭގައި އުޅޭއިރު އެފަދަ ކަންކަމަށް ފަރުވާތެރިވުން މުޙިއްމެވެ. މި އާޓިކަލްގެ ފުރަތަމަ ބައި ކުރިން ގެނެސްދީފައިވާނެއެވެ. އެހެން ކަމުން މިފަހަރު ބަލާލާނީ:
5. ސްޓްރެސް މެނޭޖްކުރާގޮތް: ކުދިން އެކުދިންގެ މައިންބަފައިންގެ ޖަޒުބާތުތައް ވަރަށް ފަސޭހައިން ނަގައިގަންނާނެއެވެ. ޙާއްސަކޮށް ކަމާކާ ހާސްވެ ފިކުރުބޮޑުވެގެން އުޅޭނަމަ އެކުދިންނަށް އެކަން ވަރަށް ބޮޑަށް އިޙްސާސް ކުރެވޭނެއެވެ. އަދި އެފަދަ ވަގުތުތަކުގައި ކުދިންނަށްނާ މެދު ކަންކުރާގޮތްވެސް އެކުދިން ކޮޕީކުރާނެއެވެ. އެހެންކަމުން ދިރިއުޅުމުގައި ދިމާވާ ކަންކަމުގައި ހާސްކަން ފިލުވާލުމަށް ސިއްހަތަށް ފައިދާވާ ގޮތްގޮތް ހިޔާރުކުރާށެވެ. އެއީ ފުންކޮށް ނޭވާލާ, މީހާގެ ނަފްސު ހަމަޔަކަށް އަޅުވާލާ ކުދިންގެ ކުރިމަތީގައި ވީހާވެސް ކުޑަކޮށް ހާސްކަމުގެ އަސަރު ކުޑަކުރުމަށްޓަކައެވެ. އެގޮތުން އެކުދިންނަށްވެސް ބޮޑެތިވަމުން އަންނައިރު ދިމާވާ ކުދިކުދި ކަންތަކުގައި ނަފްސު ހަމައަކަށް އަޅުވަން ދަސްކުރާނެއެވެ.
6. މަސައްކަތުގެ މާހައުލާއި ދިރިއުޅުން ބެލެންސްކުރުން: ތިމާގެ ޕްރޮފެޝަނަލް އަދި ޒާތީ ދިރިއުޅުން ބެލެންސް ކުރާގޮތް ކުދިން ދަސްކުރާނެއެވެ. ގޭތެރޭގައި އަބަދު އޮފީހުގެ މަސައްކަތުގައި ބޯހާސްވެގެން އުޅޭނަމަ ކުދިންނާއި އާއިލާއާއެކު ރަނގަޅު އަދި އުފާވެރި ވަގުތުތަކެއް ހޭދަކުރުމަށް ހުރަސް އެޅޭނެއެވެ. އެހެން ކަމަށް ވާނަމަ މަސައްކަތް އެކުދިން ފާހަގަކުރާނީ ދިރިއުޅުމަށް ނުރަނގަޅު އަސަރުކުރާ ކަމެއްގެ ގޮތުގައެވެ. ގެއަށް އައުމަށްފަހު މަސައްކަތުގެ މާހައުލު ގޭގައި ނުހުޅުވާށެވެ. އަދި އާއިލީ ދިރިއުޅުން އިސްކުރާށެވެ.
7. ފައިސާއާ އޮންނަ ގުޅުން: ފައިސާއާ ގުޅޭ ކަންބޮޑުވުންތައް ނުވަތަ ހަރަދުތައް ހަމަޖެއްސުމާގުޅޭގޮތުން އާންމުކޮށް ގޭތެރޭގައި ދެކެވޭ ވާހަކަތަކަށް ކުދިން ސަމާލުކަންދޭލެއް ބޮޑުވާނެއެވެ. އަދި ހަރަދުތައް ހަމަޖެއްސުމުގައި ތިމާ ކުރިއަށްނެރޭ ގޮތްތައްވެސް އެކުދިން ބަލާނެއެވެ. ޙާއްސަކޮށް ދިރިއުޅުމުގައި ފައިސާ ހޭދަކުރާއިރު އިސްކަންދޭ ތަރުތީބާއި ފަހަށް ދޫކޮށްލާ ކަންކަން ދޫކޮށްލެވޭ ސަބަބުވެސް މެއެވެ. އަދި ފައިސާ ރައްކާ ކުރަނީ ކޮންކަމަކަށްތޯވެސް ދައްކާވާހައިގެ ތެރެއިން އެކުދިން ދަސްކުރާނެއެވެ.
8. ދިރިއުޅުމުގައި ކުރިއަށްދާ ގޮތާއި ކަންކަން ދަސްކުރާގޮތް: ދިރިއުޅުމުގައި ދިމާވާ އާ ގޮންޖެހުންތަކާ ތިމާ ކުރިމަތިލާގޮތްވެސް ކުދިން ބަލަމުން ދާނެއެވެ. އާ ހުނަރެއް ތަރައްޤީ ކުރާނަމަ އެކަމެއް, ނުވަތަ އާ ފުރުޞަތަކަށް ތިމާ ތައްޔާރުވާގޮއްވެސް މެއެވެ. އެކަންކަމުގައި ކުރިއަށް ދިއުމަށް ތިމާ ކުރާ މަސައްތަތަކާއި ދަސްކުރާ ކަންކަމަކީ އެކުދިން ހެދިބޮޑެތިވެ ދިރިއުޅުމާއި ކުރިމަތިލާއިރު އެކުދިންގެ އިންސްޕިރޭޝަން އަށް ނަގާނެ ކަންކަމެވެ. އެއީ އެކުދިންގެ ގްރޯތް މައިންޑްސެޓް ގެ ބިންގަލެވެ. އެހެންކަމުން ކުދިންގެ ކުރިމަތީގައި ތިމާގެ އަމަލުތަކާމެދު އަބަދުވެސް ފަރުވާތެރި ވާށެވެ.
ރިއެކްޝަންސް
