ދަރިންގެ ހެދުމާއި ބޫޓް ހަލާކުވެ, ފިނިމޫސުން އަންނަ އިރު ޣައްޒާގެ މައިންބަފައިގެ ހިތްހަލާކުވެފައި
(ދިއެރް އެލް-ބަލަޙް), ޣައްޒާ, ފަލަޞްޠީން – ވިއްސިވިހާލި ވެފައިވާ މީހުން ދިރިއުޅޭ ކޭމްޕްތަކުގައި އަންހެނަކު އޭނާގެ ޓެންޓްގެ ބޭރުގައި ދަމާފައި ހުރި ރޯނެއްގައި އެއްޗެހި ހިއްކަން އަޅުވަން ހުއްޓެވެ. އޭނާގެ މޫނުމަތިން ފެންނަނީ ވަރުބަލި ކަމެވެ. އެއީ 34 އަހަރުގެ ރަވާން ބަދްރް އެވެ. ފިރިމީހާއާއި 11 އަހަރުގެ އަންހެން ދަރިފުޅު ޔާރާ, 8 އަހަރުގެ މުޙައްމަދު, އަދި 3 އަހަރުގެ ޙާލިދް އަދި މައްސަ އާއެކު ޣައްޒާ ސިޓީގައި އުފަލުގައި ދިރިއުޅުން ކުޑަކުޑަ އާއިލާއެކެވެ. 2023 އޮކްޓޯބަރު މަހު ޣައްޒާ ސިޓީއިން ނިކުތީ ވަރަށް މަދު ސާމާނު ކޮޅަކާއެކީއެވެ. އަލުން އަނބުރާ ގެއަށް އަވަހަށް ދެވޭނެ ކަމުގެ އުއްމީދުގައެވެ. އޭގެ ފަހުން މިއީ އޭނާ ބަދަލުވި ކިތަށްވަނަ ޓެންޓް ކަމެއް ހުދު ބަދްރު އަކަށްވެސް ނޭނގެއެވެ. އޭނާ ހުރީ ދިރިއުޅުމާމެދު ނާއުއްމީދު ވެފައެވެ.
"އަހަރެން އައީ ހުރިހާ އެއްޗެއް ދޫކޮށްލާފަ. ކުދިންގެ ދެތިން ހެދުމެއް ދޮވެދޮވެގެން ލައްވާތާ އަހަރަކަށް ވުރެ ގިނަ ދުވަސްވެއްޖެ. މިއެއްޗެހި މިހުރީ ބާވެ, ތަންކޮޅު ކޮޅު ވީދިފަ" ބަދްރު އަލްޖަޒީރާގެ ނޫސްވެރިޔާއަށް ބުންޏެވެ.
ބައެއް ފަހަރު އޭނާގެ ކުދިން, އެކުދިންގެ ވަކި ހެދުމެއް ހަނދާންވެގެން އެހެދުމުގެ ވާހަކަ އެކުދިން އަހާކަމުގައި ބަދްރު ބުންޏެވެ. ޙާއްސަކޮށް މައްސަ, އޭނާގެ ޢީދު ހެދުމުގެ ވާހަކަ އާއި އޭނާ އެންމެ ގަޔާވި ނިދާ ހެދުމުގެ ވާހަކަ އަހާކަމަށް ބަދްރު ބުންޏެވެ. 'އަހަންނަކަށް ނޭނގެ އެދަރިފުޅަށް ދޭނެ ޖަވާބެއް".
"އަހަރެން ކޮންމެ ދުވަހަކު އެކުދިން ކައިރީ ބުނަން އަހަރެމެން ގެއަށްދާނަމޭ. އެކަމަކު އަހަރެން ހަދަނީ ދޮގެއް. އަހަންނަށް އެނގޭ އަހަރެމެންނަށް ދެން އަލުން އަނބުރާ ގެއަށް ނުދެވޭނެކަން" ވާހަކަ ދެއްކުން ހުއްޓާލަމުން ބުރުގާގެ ކަނަކުން އޭނާގެ ކަރުނަތައް ފުހެލިއެވެ. އެހެން މަންމައިންހެން ބަދްރުވެސް އޭނާގެ އަތުގައި ފައިސާ ހުރިއިރު ކުދިން ބޭނުންވާ ތަކެތި ގަނެދީ ހެދިއެވެ. ނަމަވެސް މިހާރު ކުދިން ލައްވަނީވެސް ތަންތަނުން ލިބޭ އަންނައުނެވެ. ބައެއްފަހަރު އެކުދިންނަށް ބޮޑެތިކޮށް ހުއްޓަސް އިތުރު ގޮތެއް ނޯވެއެވެ. މައްސަގެ ބޫޓް ހަލާކުވެގެން އެކުއްޖާއަށް ބޫޓެއް ގަންނަން 40 ޑޮލަރު ހޭދަކޮށް ޖެހިގެން އައި ހަފުތާގައި މުޅި އާއިލާ ތިބީ ބަނޑަށް ކަމުގައި ބަދްރު ބުންޏެވެ.
ހަނގުރާމައަށް އަހަރެއްވެ ޣާއްޒާގެ ރައްޔިތުންގެ އަތްމަތި ވަނީ ދަތިވެފައެވެ. މެދުރެތޭ ޣައްޒާގައި މިހާރު އެންމެ ބާރުބޮޑުވެފައިވަނީ މަގުމަތީގައި ފަހާފޮށި ބަހައްޓަގެން ބޮޑެތި ހެދުންތައް ކުޑަކޮށް, ހަލާކުވެފައި ހުންނަ ބޫޓު ހަދާ މީހުންނަށެވެ. އެސަރަޙައްދުގައި މުޅިންވެސް އޮތީ ޣައްޒާގެ އެހެން ސަހަޙައްދުތަކުން ހަނގުރާމައާއެކު ތޮއްޖެހިފައި އޮތް މީހުންނެވެ. ގިނަ މީހުން ކާބޯތަކެތި ލިބޭތޯ ބަލާއިރު ބޫޓެއް ނުވަތަ ހެދުމެއް ހަދަން އައިސްވެސް އެތައްބަޔަކު ކިއޫގައި ތިބެއެވެ. ގިނަމީހުން ބަލަބަލާފައި ދަނީ ބޭނުންކޮށްފައި ހުރި ބޫޓެއްވެސް ގަނެވޭނެ ފައިސާ ނެތީމައެވެ. އެކަމަކު 27 އަހަރުގެ ރާއިދު ބަރްބަހް އަކީވެސް އެމަސައްކަތްކޮށްގެން އާއިލާއަށް ކާބޯތަކެތި ހޯދުމަށް މަސައްކަތް ކުރަންޖެހޭ ފަރާތަކަށް ވާތީ އެއްވެސް ކަމެއް ހިލޭ ކޮށްދެވޭނެ ގޮތެއް އޭނާއަކަށްވެސް ނެތެވެ. ބަރްބަހް އުތުރު ގައްޒާއިން ދިއެރް އެލް-ބަލަހް އަށް އައިއިރު އޭނާ ގެންގުޅުނު ފަހާފޮށި ހިފައިން އާދެވުމަކީ ބޮޑު ނަސީބެއްގެ ގޮތުގައި އޭނާ ސިފަކުރެއެވެ.
"އަހަރެން ހެނދުނު 7 ން ރޭގަނޑު 7 ޖަހަންދެން މަސައްކަތްކުރަން. ބައިވަރު މީހުން އާދޭ ކޮންމެވެސް ހެދުމެއް ކުޑަކުރަން ނޫނީ, ވީދިފަ ހުންނަ ތަނެއް ހަދާލަންވެސް. އެކަމަކު މި މިސައްކަތުގައި 10 އަހަރުވީއިރު ފުރަތަމަ ފަހަރަށް އަހަރެން މި މަސައްކަތަށް ނަފުރަތު ކުރަން މިހާރު" އޭނާ އަލްޖަޒީރާއަށް ބުންޏެވެ. އެއީ މީހުން އެމީހުންގެ ހެދުންތައް ހިފައިގެން އައިސް ކުދިންނަށް އެ ހެދުންތަކުން ހެދުން ފަހައިދޭން ބުނާ އިރު އެމީހުންގެ އެ ގުރުބާނީ ހިތަށްވަދެ, އެމީހުން ގޮތްހުސްވެފައިވާކަން ހިތަށް އަރާ ދެރަވާ ވަރުން ކަމަށްވެސް އޭނާ ބުންޏެވެ.
ބަރްބަހް އާ ޖެހިގެން އިން ސްޓޯލްގައި އިނީ 40 ގެ އަހަރުތައް ގުނަމުންދާ ސައީދު ހަސަން އެވެ. އޭނާގެ ވަށައިގެން ބޫޓްހަދަން އައިސް ތިބި މީހުން ތޮއްޖެހިފައި އޮތެވެ. ބާވެ ހަލާކުވެފައިވާ ބޫޓެއް ހިފައިގެން އިނދެ އެ ބޫޓު ހަދާނެ ގޮތަކާމެ ހަސަން ފަރުވާތެރިވެ ބަލަން އިނެވެ. އޭނާގެ ކައިރީގައި ބޫޓް ފަހަން ގެންގުޅޭ ކައްޓާއި މަރުތޭލު އޮތެވެ. ބައެއް ފަހަރު ހެދޭނެ އެއްވެސް ގޮތެއް ނެތް ބޫޓް ހިފައިގެންވެސް މީހުން އޭނާ ކައިރިއަށް އަންނަ ކަމަށް ހަސަން ބުންޏެވެ. އަދި ކޮންމެވެސް ގޮތަކުން އެ ބޫޓް ހަދައިދޭތޯ އާދޭސްކުރާ ކަމަށްވެސް ޙަސަން ބުންޏެވެ. "އެކި ތަންތަނުން އެކި އެތިކޮޅުލައިގެން އެ ހެދޭތޯ އަހަރެން މަސައްކަތް ކުރަން. އަހަންނަށްވެސް އިނގޭ އެމީހުން އާދޭސްކުރަނީ އިތުރު އެހެން ގޮތެއް ނެތިގެންކަން. އެކަމަކު އެއީ ފަސޭހަ ކަމެއް ނޫން. އެއްދުވަހަކު ބައްޕައަކު އައި ފުޅިމަދުގެ ބައިތަކެއް ހިފައިގެން. އޭނާ އަހަރެން ކައިރީ އާދޭސްކުރި އޭގެން އެނާގެ ދެ ދަރިންނަށް ބޫޓު ހަދައިދޭން. އަހަރެން ކިހިނެއް އޭގެން ބޫޓެއް ހަދާނީ. ބުނެބަލަ!" ޙަސަން ބުންޏެވެ.
ފިނި މޫސުމާ ކުރިމަތިލާއިރު ޓެންޓުތަކުގައި ދިރިއުޅެމުންދާ ޣައްޒާގެ ރައްޔިތުން ދަނީ އެހީގެ ގޮތުގައި ލިބިފައިވާ ރަޖާތަކުން ފިނި ހެދުން ތައްޔާރުކުރަން މަސައްކަތްކުރަމުންނެވެ. ހަނގުރާމަ އަދިވެސް ހުއްޓުމެއްނެތި ކުރިއަށް ދާއިރު ފިނި މޫސުމާއެކު ޣައްޒާގެ ރައްޔިތުންނަށް އަނެއްކާވެސް އޮތީ ދިރިތިބުމާ މަރާ ހަނގުރާމަ ކުރުމުގެ އިތުރު އިމްތިހާނެކެވެ.
ރިއެކްޝަންސް
