އިޒްރާއިލްއިން އީރާނަށް ހަމަލާދީފި
އިޒްރާއިލްގެ އަސްކަރިއްޔާއިން އީރާނުގެ އަސްކަރީ ތަންތަނަށް އަމާޒުކޮށް ހަމަލާތަކެއް ދީފިއެވެ. އިޒްރާއިލްއިން ބުނެފައިވަނި މިއީ އީރާނުން 1 އޮކްޓޯބަރުގައި އިޒްރާއިލްއަށް ދިން މިސައިލް ހަމަލާތަކުގެ ރައްދު ހަމާލާ ކަމުގައެވެ. އަދި އީރާނާއި ގުޅުންހުރި ޖަމާއަތްތަކުން އިޒްރާއިލް އަށް ދޭ ހަމަލާތަކުގައި ރައްދު ކަމަށްވެސް ބުނެފައެވެ.
އީރާނުގެ އަސްކަރިއްޔާއިން ވަނީ އިޒްރާއިލްގެ ހަމަލާތައް އަމާޒުވި ތަންތަން ހާމަކޮށްފައެވެ. އެއީ އިލާމް, ޚުޒެސްތާން އަދި ތެޙްރާންގައި ހުންނަ އިރާނުގެ 20 އަސްކަރީ މަރުކަޒެކެވެ. ނަމަވެސް އިޒްރާއިލްގެ ހަމަލާތަކުގެ ސަބަބުން އެތަންތަނަށް ލިބިފައިވަނީ "ކުޑަ ގެއްލުމެއް" ކަމަށް އީރާނުގެ އަސްކަރިއްޔާއިން ބުނެއެވެ. އަލްޖަޒީރާއިން އާންމުކޮށްފައިވާ ވީޑިއޯއެއްގައި ފެންނަ ގޮތުގައި ތެޙްރާނަށް ދިން ހަމާތައް ތެޙްރާނުގެ އެއާ ޑިފެންސް ސިސްޓަމުން ވަނީ ހުއްޓުވާފައެވެ. ނަމަވެސް އެހެން ސަރަޙައްދުތަކުން ކޮންމެވެސް ވަރަކަށް ބައެއް މިސައިލްތަސް ގޮވާތަން ފެނެއެވެ.
ހަމާލާ ދިނުމަށްފަހު އިޒްރާއިލްއިން ވަނީ މި ހަމަލާތަކުގެ ބަދަލުގައި ރައްދުހަމަލާ އިރާނުން ދިފިނަމަ އޭގެ ބަދަލު ހިފާނެކަމަށް އިންޒާރު ދީފައެވެ. އަދި ބަދަލު ހިފަން މަޖުބޫރު ވާނެ ކަމަށާއި ހަމަލާދޭނެ އިތުރު ޓާގެޓްތައްވެސް ކަނޑައަޅާފައި ހުރި ކަމަށްވެސް ވަނީ ބުނެފައެވެ. އިޒްރާއިލްގެ އަސްކަރިއްޔާއިން "ޑޭސް އޮފް ރެކޮނިންގ" ގެ ނަމުގައި ކުރިއަށް ގެންދިޔަ މި އޮޕަރޭޝަން މިހާރު ނިންމާލާފައިވާކަމަށްވެސް އިޒްރާއިލްގެ އަސްކަރިއްޔާއިން މައުލޫމާތު ދެއެވެ. އަދި ހަމަލާ އަމާޒުކޮށްފައި ވާނީ އިރާންގެ މިސައިލް އުފައްދާ އަސްކަރީ މަރުކަޒުތަކަށް ކަމަށްވެސް އިޒްރާއިލްއިން ވަނީ ބުނެފައެވެ.
އިޒްރާއިލްގެ ހަނގުރާމައިގެ ބައިވެރިޔާ, އެމެރިކާއިން ވަނީ އިޒްރާއިލްއިން އީރާނަށް ހަމަލާދޭން ނިންމާފައިވާކަން އެނގޭ ކަމަށާއި ނަމަވެސް އެކަމުގައި އެމެރިކާގެ ބައިވެރިވުމެއް ނެތް ކަމަށް ބުނެފައެވެ. ވޮޝިންގްޓަންގައި ހުންނަ ޔޫއެސް ނެޝަނަލް ސެކިއުރިޓީ ކައުންސިލްގެ ތަރުޖަމާނު ވިދާޅުވެފައިވާ ގޮތުގައި އެއީ އިޒްރާއިލްގެ "ސެލްފް ޑިފެންސް" އޮޕަރޭޝަނެކެވެ.
ރިއެކްޝަންސް
