ގުޅިފަޅުން ގޯތި ލިބޭ ފަރާތްތައް ކަނޑައަޅަން އަލުން ގުރުއަތު ލަނީ
ގުޅިފަޅުން ގޯތި ލިބޭ ފަރާތްތައް ކަނޑައަޅަން އަލުން ގުރުއަތު ލާން ނިންމާ, އެކަން ގެދޮރުވެރިކަމާ ބެހޭ ވުޒާރާއިން އިއުލާނުކޮށްފިއެވެ. އެވުޒާރާގެ އިއުލާނުގައި ވަނީ އަލުން ގުރުއަތު ލަނީ ލޭންޑް ޔޫޒް ޕްލޭނަށް އައި ބަދަލާ ގުޅިގެން ކަމަށެވެ. ގެދޮރުވެރިކަމާބެހޭ ވުޒާރާއިން ރޭ ގެޒެޓްކުރި އިއުލާނުގައި ބުނެފައިވަނީ ލޭންޑް ޔޫޒް ޕްލޭނަށް އައި ބަދަލާ ގުޅިގެން ބައެއް ފަރާތްތަކުގެ ގޯތީގެ ލޮކޭޝަނަށް ބަދަލު އައިސްފައިވާ ކަމަށެވެ.
މިބަދަލާއެކު މިނިސްޓްރީން ނިންމާފައިވަނީ ލޮކޭޝަން ބަދަލުވި ގޯތީގެ ވެރިފަރާތްތަކާއި, އަދި މިހާތަނަށް ގުޅިފަޅުން ގޯތި ހަވާލުކޮށްފައިވާ ފަރާތްތަކާއި, ގިރާވަރު ފަޅުން ލިބުނު ގޯތި ގުޅި ފަޅަށް ބަދަލުކުރި ފަރާތްތަކުގެ ތެރެއިން ޖޫން މަހު ނެގުނު ގުރުއަތުން ގޯތި ލިބުނު ފަރާތްތަކުގެ މެދުގައި އަލުން ގުރުއަތު ލުމަށެވެ. ގުރުއަތުލުން މިނިސްޓްރީން ތާވަލްކޮށްފައި ވަނީ މިމަހުގެ 29 ވަނަ ދުވަހަށެވެ. ގުރުއަތުލުން ބާއްވަނީ ދަރުބާރުގޭ ރަންންބަނޑޭރި މާލަމުގައެވެ.
ގުޅީފަޅުން ދޫކުރާ ގޯތިތަކުގެ ބޮޑުމިނަކީ:
- 1250 އަކަފޫޓްގެ 669 ގޯތި
- 1650 އަކަފޫޓްގެ 1234 ގޯތި
- 2050 އަކަފޫޓްގެ 916 ގޯތި
- 2450 އަކަފޫޓްގެ 473 ގޯތި
- 2850 އަކަފޫޓްގެ 158 ގޯތި
- 3250 އަކަފޫޓްގެ 49 ގޯތި
- 3650 އަކަފޫޓްގެ 21 ގޯތި
އިއުލާނާއެކު މިނިސްޓްރީން ވަނީ ގުޅިފަޅުން ގޯތި ލިބޭ މީހުންގެ ލިސްޓެއްވެސް އިއުލާނުކޮށްފައެވެ. ގުރުއަތުލާނީ މިނިސްޓްރީން އެކުލަވާލާފައިވާ ލިސްޓްގެ ތަރުތީބުން މިނިސްޓްރީގެ މުވައްޒަފުން ކަމަށް ގެދޮރިވެރިކމާ ބެހޭ ވުޒާރާއިން ބުންޏެވެ. ގުރުއަތުލުން ވަގުތުން ދައްކާނެއެވެ. އަދި ގުރުއަތަށް ހޮވުނު ފަރާތްތަކަށް ގުރުއަތުލާ މާލަމަށް ވަދެވޭނެ ކަމަށްވެސް މިނިސްޓްރީން ބުންޏެވެ.
ރިއެކްޝަންސް
