ބިދޭސީންގެ ނުފޫޒު ގަދަ ދެ ސަރަހައްދަކުން 25 ބިދޭސީން އިމިގްރޭޝަންގެ ބެލުމުގެ ދަށަށް
ބިދޭސީންގެ ނުފޫޒު ގަދަ ދެ ސަރަހައްދަކުން 25 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ. މޯލްޑިވްސް އިމިގްރޭޝަނުން ބުނީ އެއިދާރާގެ ބެލުމުގެ ދަށަށް ގެންދިޔައީ ގަވާއިދާ ހިލާފަށް އުޅެމުންދިޔަ ބިދޭސީން ކަމަށެވެ.
ބިދޭސީންގެ ނުފޫޒުގަދަ ދެ ސަރަހައްދު ކަމަށް އިމްގްރޭޝަނުން ބުނީ ހީނާމާގެ ޕާކިންގ ސަރަހައްދާއި މާލޭ ލޯކަލް މާރުކޭޓެވެ. އެދެސަރަހައްދުގައި ރެއިޑް އޮޕަރޭޝަން ހިންގީ 'އިމިގްރޭޝަން ވޮޗް' އަށް ލިބުނު މައުލޫމާތަކާ ގުޅިގެން ކަމަށް އިމިގްރޭޝަނުން ބުންޏެވެ.
މިއަދު ކުރިއަށްގެންދިޔަ ޚާއްޞަ ރެއިޑްގައި 137 ބިދޭސީން ބަލައި ފާސްކުރި ކަމަށް އިމިގްރޭޝަނުން ބުންޏެވެ. އޭގެތެރެއިން އެމުއައްސަސާގެ ބެލުމުގެ ދަށަށް ގެންދިޔައީ ގަވާއިދާ ހިލާފް ބިދޭސީންނެވެ. ރެއިޑު އޮޕަރޭޝަންގައި ކޮންޓްރޯލަރ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަޙީދު އާއި ޑެޕިއުޓީ ކޮންޓްރޯލަރ، އަހުމަދު އަޝްފާން އަމަލީ ގޮތުން ބައިވެރިވެ ވަޑައިގެންނެވިއެވެ.
ލޯކަލް މާރުކޭޓު ސަރަހައްދަކީ ގިނަ ބިދޭސީންތަކެއް ހަރަކާތްތެރިވާ ސަރަހައްދަކެވެ.
އިމިގްރޭޝަނުން ކުރިއަށްގެންދިޔަ ބޮޑު ރެއިޑު އޮޕަރޭޝަންގައި އެ ސަރަހައްދުގައި އަޅާފައިވާ އުޅަނދު ފަހަރާއި، އެ ސަރަހައްދުން ލަފާ/ފުރާ އުޅަނދުފަހަރު ވެސް ބަލައި ފާސްކުރިއެވެ. އެގޮތުން އެސަރަހައްދުން ޖުމްލަ 148 ބިދޭސީން ބަލައި ފާސްކޮށް، ގަވާއިދާ ހިލާފަށް އުޅޭ ބިދޭސީ 22 ފިރިހެނަކާއި 01 އަންހެނަކު ވަނީ އިމިގްރޭޝަންގެ ބެލުމުގެ ދަށަށް ގެންދިޔަ ކަމަށް ބުންޏެވެ.
ރިއެކްޝަންސް
