ބިންވެރިޔާ ސްކީމާ ގުޅޭ މައްސަލައިގައި ހިމެނޭ އެންމެންގެ އިލެކްޓްރޯނިކް ސާމާނު ހިފަހައްޓައިފި
ބިންވެރިޔާ ސްކީމާ ގުޅޭ މައްސަލައިގައި ހިމެނޭ އެންމެންގެ އިލެކްޓްރޯނިކް ސާމާނުތައް ހިފަހައްޓައިފިއެވެ. ފުލުހުން މިރޭ އެންމެ ފުރަތަމަ ބުނީ ފަޒީލްގެ ފޯނު ހިފެހެއްޓި ކަމަށެވެ. ނަމަވެސް ކުޑައިރުކޮޅެއްގެ ތެރޭގައި ބުނީ އެމައްސަލާގައި ހިމެނޭ އެންމެންގެ އިލެކްޓްރޯނިކް ސާމާނު ކޯޓް އަމުރެއްގެ ދަށުން ހިފަހައްޓާފައިވާ ކަމަށެވެ.
" މިމައްސަލައިގައި ހިމެނޭ ހުރިހާ ފަރާތްތަކެއްގެ އިލެކްޓްރޯނިކް އައިޓަމްސްތައް ކޯޓް އަމުރެއްގެ ދަށުން ވަނީ ހިފަހައްޓާފަ" ފުލުހުން މީޑިޔާ ތަކާ ހިއްސާކުރެއްވި މެސެޖްގައި ވެއެވެ. އެކަމަކު ހިފެހެއްޓިއިރެއް ފުލުހުން ނުބުނެއެވެ.
މީގެކުރިން ފުލުހުން ވަނީ އެޗްޑީސީގެ ކުރީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ދިރިއުޅޭ ގެ ބަލާ ފާސްކޮށް, އޭނާގެ އިލެކްޓްރޯނިކް ސާމާނުތައްވެސް ހިފަހައްޓާފައެވެ. ފަޒީލް އަކީ އޭނާގެ ބޭބެއެވެ. އުސޫލުން ބޭރުން ބިން ލިބުނު އެއް ފަރާތަކީ ފަޒީލް އެވެ. އޭނާއާއި އެހެން ބައެއް މީހުންނަށްވެސް ގޯތި ދިންއިރު ޝަރުތު ހަމައެއް ނުވެއެވެ.
މިމައްސަލައިގައި އެޗްޑީސީގެ ބޯޑް ޗެއަރމަން ފިޔަވާ އެހެން ބޭފުޅުންނާއި, އެޗްޑީސީގެ މެނޭޖްމަންޓް ބައެއް ބޭފުޅުން ސަސްޕެންޑް ކުރިއެވެ. އަދި ބައެއް މީހުން ވަޒީފާއިން ވަކިކޮށް, އަލުން ވަޒީފާ ދިނުމަށްފަހު ސަސްޕެންޑް ކުރިއެވެ. އިލެކްޓްރޯނިކް ސާމާނު ހިފަހައްޓާފައިވަނީ އެމީހުންގެއެވެ.
މައްސަލާގައި އެޗްޑީސީގެ 15 މީހަކާއި, ހައުސިންގ މިނިސްޓްރީގެ 10 މީހަކު ސަސްޕެންޑްކުރިއެވެ. ފުލުހުންނާއި އޭސީސީން ދަނީ މައްސަލަ ތަހުގީގު ކުރަމުންނެވެ.
ރިއެކްޝަންސް
