އިޒްރޭލް ޕާސްޕޯރޓް މަނާކުރާ ބިލްގެ މަސައްކަތް ފަށަނީ
ބިލްގެ މަސައްކަތް ތާވަލްކޮށްފައި ވަނީ އަންގާރަ ދުވަހަށް
އިޒްރޭލް ޕާސްޕޯރޓް މަނާކުރާ ބިލްގެ މަސައްކަތް ފަށަން ރައްޔިތުންގެ މަޖިލިހުގެ ކޮމިޓީގައި ތާވަލް ކޮށްފިއެވެ. އެބިލް ކޮމިޓީއަށް ފޮނުވި ނަމަވެސް މަސައްކަތް ނުފަށާ ލަސްކުރަމުންދާކަމަށް ބުނެ އިދިކޮޅު މެމްބަރުން ފާޑުކިޔަމުން ދަނިކޮށް, އެބިލްގެ މަސައްކަތް އަންނަ އަންގާރަ ދުވަހު ފަށަން ވަނީ ތާވަލްކޮށްފައެވެ.
ރައްޔިތުންގެ މަޖިލިހުގެ ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް ހުށަހެޅުއްވި ބިލް ފޮނުވާފައި ވަނީ 241 ކޮމިޓީ އަށެވެ. އެބިލް 241 ކޮމިޓީއަށް ފޮނުވީ ޖޫން މަހުއެވެ.
ބިލްގެ މަސައްކަތް ތާވަލްކޮށް ތާވަލްކޮށްފައި ވަނީވެސް 241 ކޮމިޓީގައެވެ. ބިލްގައި މައިގަނޑު ގޮތެއްގައި ފާހަގަކޮށްފައިވަނީ އިޒްރޭލް ރައްޔިތުންނަށް ރާއްޖެ އެތެރެވުން މަނާކުރުމަށެވެ. އެއީ އެހެން ގައުމެއްގެ ޕާސްޕޯޓެއްގައި ވިޔަސް, އިޒްރޭލް ޕާސްޕޯރޓެއް އޮތް މީހަކަށް ރާއްޖެ އެތެރެ ނުވެވޭ ގޮތަށެވެ. ނަމަވެސް މިއީ ބިލް ހުށަހެޅުއްވި އިރުވެސް ހިޔާލު ތަފާތުވެފައި އޮތް ކަމެކެވެ.
ބިލްގެ މަސައްކަތް ލަސްވާތީ އިދިކޮޅު މެމްބަރުން ފާޑުކިޔަސް ސަރުކާރު މެމްބަރުން ގެންދަވަނީ އެކަން މިސަރުކާރުން ކުރައްވާނެ ކަމުގެ ޔަގީންކަން ދެއްވަމުންނެވެ. އިޒްރޭލް ރައްޔިތުން ރާއްޖެ އެތެރެވުން މަނާކުރަން ނިންމެވިކަންވެސް ޖޫން މަހު ސަރުކާރުން ވަނީ އިއުލާނުކުރައްވާފައެވެ. އެނިންމުން ނިންމެވީ ވަޒީރުންގެ މަޖިލިހުގައިވެސް މަޝްވަރާ ކުރެއްވުމަށްފަހުއެވެ.
އިޒްރޭލް ޕާސްޕޯރޓް މަނާކުރަން އިސްލާހު ހުށަހަޅާފައިވަނީ އިމިގްރޭޝަން ޤާނޫނަށެވެ. އެހެންނަމަވެސް މީކާއިލް ހުށަހެޅުއްވި ގޮތަށް ފާސް ނުކުރާނެ ކަމުގެ އިޝާރާތެއް ދައުލަތުގެ ބަންޑާރަ ނައިބު ވަނީ ދެއްވާފައެވެ.
ރިއެކްޝަންސް
