އެމެރިކާ އާއި އިނގިރޭސިވިލާތުން ޔަމަނަށް ވައިގެ ހަމަލާތަކެއްދީފި
ޔަމަނުގެ ވެރިރަށް ސަނައާ އަށްވެސް ހަމަލާ ދިފައިވޭ
އެމެރިކާއާއި އިނގިރޭސި ވިލާތުން ޔަމަނަށް ވައިގެ ހަމަލާތަކެއް ދީފިއެވެ. ހަމަލާ ދީފައިވާ ސިޓީ ތަކުގެ ތެރޭގައި ޔަމަނުގެ ވެރިރަށް ސަނައާ ވެސް ހިމެނޭ ކަމުގައި ހޫތީންގެ އަލް މަޞީރަހް ޓީވީން ރިޕޯޓްކޮށްފައިވެއެވެ. ހަމަލާ ދީފައިވަނީ އެންމެ ޒަމާނީ ހަތިޔާރު ރައްކާކޮށްފައިވާ ސްޓޯރޭޖް ފެސިލިޓީއަކަށް އަމާޒުކޮށްކަމަށް ޕެންޓަގަން އިން ބުނެފައިވާ ކަމަށްވެސް ހޫތީ ޓީވީން ވަނީ ރިޕޯރޓް ކޮށްފައެވެ.
އާދިއްތަ ދުވަހު ދިން ހަމަލާތައް ސަނައާގެ އިތުރުން ޔަމަނުގެ އުތުރު އަމްރާންގެ ސަރަޙާއްދުތަކަށްވެސް ފޯރާފައިވެއެވެ. ނަމަވެސް އެއްވެސް މީހަކު ޒަޚަމްވި ކަމުގެ މަޢުލޫމާތު މިހާތަނަށް އަދި ލިބިފައެއް ނުވެއެވެ. މަންޒަރު ދުށް މީހަކާ ހަވާލާދީ އަލްޖަޒީރާގައި ރިޕޯޓްކޮށްފައިވާ ގޮތުގައި ސަނައާ ގެ މަތިން އުދުހޭ އަޑާއިއެކު ސަނައާގެ އެކި ސަރަހައްދުތަކުގައި ގޮވުންތައް ގޮވާފައިވެއެވެ.
ޕެންޓަގަންއާ ޙަވާލާދީ އޭއެޕްފީ އިން މަޢުލޫމާތު ދީފައިވާ ގޮތުގައި ހަމަލާތައް އަމާޒުކޮށްފައިވާނީ ޔަމަނުގެ އާންމުން އަދި ސިފައިންނާ ދެކޮޅަށް ބޭނުންކުރާ ހަތިޔާރު އުފުލާ އުޅަނދުތައް ރަތްކަނޑާއި ގަލްފް އޮފް އެޑެން އަށް ދަތުރުކުރަން ފަށާފައި ވަނިކޮށެވެ.
އެމެރިކާ އާއި އިނގިރޭސި ވިލާތުން މިއަހަރުގެ ޖެނުއަރީން ފެށިގެން އަންނަނީ ހޫތީންނާ އަމާޒުކޮށް ވައިގެ ހަމާތައް ދެމުންނެވެ. އެއީ ރަތްކަނޑުން ދަތުރުކުރާ އިޒްރާއިލްއާ ގުޅުންހުރި ބޯޓްފަހަރަށް ހޫތީން ހަމަލާދޭކަމަށް ބުނެ ހުތީންގެ ބާރު ކަނޑުވާލުމަށްކަމަށް އެމެރިކާއިން ވަނީ ބުނެފައެވެ. ޔަމަނުގެ ހޮދައިދާ ޕޯޓް އަށް ޖުލައިމަހު ދިން ހަމަލާގައި 16 މީހަކު މަރުވެފައިވާ ކަމަށް ހޫތީން ވަނީ ބުނެފައެވެ.
ހޫތީންނަކީ ވެރިރަށް ސަނައާ ހިމެނޭހެން ޔަމަނުގެ ބޮޑުބައެއް ކޮންޓްރޯލް ކުރާ މުޖާހިދުންގެ ގްރޫޕެކެވެ. ފަލަޞްޠީނުގައި އިޒްރާއިލްއިން ހިންގަމުންދާ އުދުވާނު ފެށުނީއްސުރެ ހޫތީން ދަނީ ފަލަޞްޠީނާ އެކު ތިބިކަން ހާމަކުރުމުގެ ގޮތުން ރަތްކަނޑުން ދަތުރުކުރާ އިޒްރާއިލާ ގުޅުންހުރި ހަތިޔާރު އުފުލާ އުޅަނދުތަކަށް ހަމަލާދެމުންނެވެ.
ރިއެކްޝަންސް
