މިޞްރުގެ ސުއޭޒް ކެނަލް އިން އިޒްރާއިލްގެ ހަނގުރާމަމަތީ މަނަވަރެއް ހުރަސްކުރާ ވީޑިއޯއަކާ އެކު އާންމުން ރަތަށް
މިޞްރުގެ ސުއޭޒް ކެނަލްއިން އިޒްރާއިލްގެ ހަނގުރާމަމަތީ މަނަވަރެއް ހުރަސްކުރި ވީޑިއޯއަކާއެކު އާންމުންގެ ނުރުހުން މިޞްރުގެ ސަރުކާރަށް އަމާޒުވެއްޖެއެވެ. ސޯޝަލް މީޑިއާގައި ދައުރުވަމުންދާ ވީޑިއޯއާ ގުޅިގެން އެތައްބަޔަކު ދަނީ މިޞްރުގެ ސަރުކާރުން އިޒްރާއިލްގެ ހަނގުރާމަމަތީ މަނަވަރު ސުއޭޒް ކެނަލް ހުރަސްކުރަން ހުއްދަ ދީފައިވާ މައްސަލަ ކުށްވެރިކޮށް އިޒްރާއިލްއިން ޣައްޒާގައި ހިންގަމުންދާ އުދުވާނުގައި މިޞްރުގެ ބައިވެރިވުން އޮތް މިންވަރު ހާމަވާކަމަށް ބުނެފައެވެ. މިކަމާ ގުޅިގެން މިޞްރުގެ ސަރުކާރުން ބުނެފައިވަނީ ބައިނަލްއަޤުވާމީ މުއާހަދާ (ކޮންސްޓޭންޓިނޯޕްލް ކޮންވެންޝަން, 1988)ގެ ދަށުން ކޮންމެ އުޅަނދަކަށްވެސް ކެނަލް ހުރަސްކުރުމަކީ ކުރެވިދާނެ ކަމެއްކަމަށް ބުނެފައެވެ.
މިޞްރުގެ ތަވާފިޤް ބަނދަރުން ނަގާފައިވާ ވީޑިއޯގައިވެސް އާންމުން ދިޔައީ އެމަނަވަރު އެހެން ހުރަސްކުރެވިގެން ނުވާނެކަމަށްބުނެ ނުރުހުން ފާޅުކުރަމުންނެވެ. މަނަވަރުގައި އިޒްރާއިލްގެ ދިދަ އާއެކު މިޞްރުގެ ދިދަވެސް ނަގާފައި ހުއްޓެވެ. "އެމީހުން މިހާރު އެދަނީ ކޮންބައެއް މަރަން"! ވީޑިއޯގައި މީހަކު ބުނާ އަޑު އިވެއެވެ.
އެ މަނަވަރަކީ އިޒްރާއިލްގެ 'ސައްއަރު ކްލާސް -6' ގެ އުޅަނދެވެ. 90 މީޓަރުގެ މި އުޅަނދަކީ އެއްފަހަރާ ގިނަ އަދަދެއްގެ މިސައިލް ރައްކާކުރެވޭގޮތަށް 2015 ވަނަ އަހަރު ބަނދެފައިވާ އުޅަނދެކެވެ. އަދި މި އުޅަނދަކީ ޣައްޒާއަށް ކަނޑުގެ މަގުން ހަމަލާދިނުމަށް އިޒްރާއިލްގެ އަސްކަރިއްޔާއިން މިހާރުވެސް ބޭނުންކުރަމުންދާ މަނަވަރެކެވެ.
މީގެ ދުވަސްކޮޅެއްކުރިންވެސް މިޞްރުގެ އެލެގްޒެންޑްރިއާގައި އިޒްރާއިލް އަށް ހަތިޔާރު ފޯރުކޮށްދިނުމަށް ޖަރުމަނުގެ މަނަވަރެއް ބަނދަރުކުރި ވާހަކަތައް ރިޕޯޓް ކުރުމާއެކު މިޞްރުން ވަނީ އިޒްރާއިލްއިން ޣައްޒާގައި ހިންގާ އަސްކަރީ އޮޕަރޭޝަންސް ތަކުގައި މިޞްރުގެ ބައިވެރިވުމެއް ނޯންނާނެކަމަށް ބުނެފައެވެ.
ރިއެކްޝަންސް
