ރަސްމާލެ ހިއްކުމުގެ މަސައްކަތް އަލުން ފަށައިފި
މެދުކެނޑިފައި އޮތް ރަސްމާލެ ހިއްކުމުގެ މަސައްކަތް އަލުން ފަށައިފިއެވެ. މަސައްކަތް އަލުން ފެށިކަން އިއުލާނުކޮށް, ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީން) ކުރި ޓްވީޓެއްގައި ބުނީ އެކަން އަލުން ފެށުމަކީ ތަރައްޤީއާ ކުރިއެރުމަށް އެޅުނު އިތުރު ފިޔަވަޅެއް ކަމަށެވެ. އެޗްޑީސީގެ ޕޯސްޓްގައި ފޮޓޯތައްވެސް ހިމަނާފައި ވެއެވެ.
ރަސްމާލެ ހިއްކުމުގެ މަސައްކަތް އަލުން ފެށީ އެހެން ކުންފުންޏަކާ ހަވާލުކޮށްގެންނެވެ. އެމައުލޫމާތެއް އެޗްޑީސީން ނުދެއެވެ. ކުރިން ރަސްމާލެ ހިއްކުމުގެ މަސައްކަތް ކުރީ ކެޕިޓަލް މެރިން އެންޑް އިންވެސްޓްމަންޓް (ސީއެމްސީ) އިން ނެވެ. އެއީ އެކުންފުންޏަށް ހުޅުމާލެއިން 10 ހެކްޓަރު އަދި ރަސްމާލެއިން 60 ހެކްޓަރު ދޭ ގޮތަށެވެ. ރަސްމާލެ މަޝްރޫއަކީ ރައީސް ޑރ.މުހައްމަދު މުއިއްޒުގެ ގެދޮރުވެރި ކަމުގެ އެންމެ ބޮޑު މަޝްރޫއު ކަމަށްވީ ނަމަވެސް މިއަހަރަށް ބަޖެޓް ފާސްކުރިއިރު އެމަޝްރޫއަށް ބަޖެޓްގައި ފައިސާ ހިމަނާފައެއް ނެތެވެ. އެމްޑީޕީގެ މެޖޯރިޓީ އޮތް އޭރުގެ މަޖިލިހުން ބަޖެޓް ފާސްކުރީ ބައި އުނިކޮށްފައެވެ. އެހެންކަމުން އެމަޝްރޫއު ފެށީ ބިން ދޭގޮތަށެވެ. އެކަމަށް ފާޑުކިއުންތައްވެސް އަމާޒު ވިއެވެ.
https://x.com/hdcmaldives/status/1855532861245510132
އެކަމަކު ސީއެމްސީއާއެކު އޮތް އެއްބަސްވުން ނިމުމަކަށް ގެނެސް މިހާރު އަލުން ރަސްމާލެ ހިއްކަނީ އެއްވެސް ބަޔަކަށް ބިން ނުދީއެވެ. އެއްބަސްވުން ބާތިލްކުރީ ތާވަލާ އެއްގޮތަށް ސީއެމްސީ އަށް މަސައްކަތް ނުކުރެވުމުންނެވެ. އެމަޝްރޫއު އޭރު ހަވާލުކުރީ 8 މަސް ދުވަހުގެ ތެރޭގައި ހިއްކާ ނިންމާ ގޮތަށެވެ.
ކޮންސްޓަރަކްޝަން މިނިސްޓަރ ޑރ.އަބްދުالله މުއްތަލިބު އޭރު ވިދާޅުވެފައިވަނީ އެޕްރޮޖެކްޓް ދެން ކުރިއަށް ގެންދާނީ ކޮންޓްރެކްޓަރުން މެދުވެރިވެގެން ފައިސާ ހަމަޖައްސައިގެން ކަމަށެވެ. ފުށިދިއްގަރު ފަޅުގައި މިސަރުކާރުން ތަރައްޤީ ކުރާ ރަސްމާލެ އަލުން ހިއްކަން ފެށީ ހަމަސް ދުވަހުން ފަހުންނެވެ.
ރަސްމާލޭގައި 30,000 ހައުސިންގ ޔުނިޓް އެޅުމުގެ މަޝްރޫއެއްގައި މިހާރު ވަނީ ޗައިނާ ސަރުކާރާއެކު ސޮއިވެސް ކޮށްފައެވެ. ރައީސް މުއިއްޒުގެ ވައުދަކީ މިދައުރު ނިމޭއިރު ބޯހިޔާވަހިކަން ބޭނުންވާ އެންމެންނަށް ބޯހިޔާވަހިކަން ފޯރުކޮށްދިނުމެވެ.
ރިއެކްޝަންސް
