ފަތުރުވެރިކަމުގެ ސިނާއަތުގެ ކުރިމަގު އިތުރަށް ކާމިޔާބުވެ ފާގަތިވާނެކަމުގެ ޔަގީންކަން އެބައޮތް: މިނިސްޓަރ ސަޢީދު

ދިވެހިރާއްޖޭގެ ފަތުރުވެރިކަމުގެ ސިނާއަތުގެ ކުރިމަގު އިތުރަށް ކާމިޔާބުވެ، ފާގަތިވާނެކަމުގެ ފުރިހަމަ ޔަގީންކަމާއި އިތުބާރު އެބައޮތް ކަމަށް އިގްތިސާދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ ގައުމީ ފަތުރުވެރިކަމުގެ ދުވަހުގެ މުނާސަބަތުގައި މީސްމީޑިއާ މެދުވެރިކުރައްވައި ފޮނުއްވި ހާއްސަ މެސެޖެއްގައެވެ. ވަޒީރުގެ މެސެޖުގައި ވިދާޅުވީ، މިއަދު މި ފާހަގަކުރެވެނީ ދިވެހިރާއްޖޭގެ ޒަމާނީ ތާރީހުގައި ލިޔެވިފައިވާ އެންމެ ފަހުރުވެރި ގައުމީ ކާމިޔާބީއަށް 54 އަހަރު ފުރުނު ތާރީހީ މުނާސަބަތު ކަމަށެވެ. އެގޮތުން، ނުހަނު އާދައިގެ ގޮތަކަށް ފެށި މި ދަތުރު، މިއަދު މުޅި ދުނިޔެ ޝައުޤުވެރިވާ އަދި އިހުތިރާމްކުރާ ފަދަ ފުރިހަމަ ސިނާއަތަކަށް ބަދަލުވެ، ބައިނަލްއަގުވާމީ ފެންވަރުގައި ދިވެހިރާއްޖެއަކީ އެންމެ މަގުބޫލު އެއް މަންޒިލްގެ ގޮތުގައި ވިދާލާފައިވާކަން ވަޒީރު ފާހަގަކުރެއްވިއެވެ.

މި އުފާވެރި މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި، މި ސިނާއަތުގެ ބިންގާ އަޅުއްވައިދެއްވި ހިކުމަތްތެރި ބާނީންނަށް ވަޒީރު ވަނީ ދުވަހުގެ ހެޔޮއެދުންތައް އަރިސްކުރައްވާފައެވެ. މީގެއިތުރުން، މި ދާއިރާގައި އަގުނުކުރެވޭފަދަ ހިދުމަތްތަކެއް ކުރައްވަމުން ގެންދަވާ މުރާލި މުވައްޒަފުންނަށާއި، އިންވެސްޓަރުންނާއި، ވިޔަފާރިވެރިންގެ އިތުރުން މި ސިނާއަތުގެ ކުރިއެރުމަށް ގަދައަޅައި މަސައްކަތްކުރައްވާ އެންމެހައި ފަރާތްތަކަށް ވެސް ވަޒީރު ވަނީ ތަހުނިޔާ ވިދާޅުވެފައެވެ.

ފަތުރުވެރިކަމަކީ ރާއްޖޭގެ އިގްތިސާދަށް އިންގިލާބީ ބޮޑު ބަދަލެއް ގެނުވައި، ދިވެހި އެތައް ޖީލަކަށް އާމްދަނީއާއި ކުރިއެރުމުގެ ފަހި ފުރުސަތުތައް ހުޅުވައިދިން މައިގަނޑު ސިނާއަތްކަން ވަޒީރު ފާހަގަކުރެއްވިއެވެ. އަދި ދިވެހިރާއްޖެ ބައިނަލްއަގްވާމީ މައިދާނާ ގުޅުވައިދީ، ދުނިޔޭގެ ޗާޓުގައި ރާއްޖެއަށް ހާއްސަ ގަދަރަކާއި ޝަރަފުވެރި ނަމެއް ހޯދައިދިނީ ވެސް މި ސިނާއަތުން ކަމަށް ވިދާޅުވިއެވެ. ވަޒީރު ސަޢީދު އިތުރަށް ވިދާޅުވީ މިއަދު ފާހަގަކުރެވެމުން މިދަނީ މި ކާމިޔާބު ގައުމީ ދަތުރުގެ ފަހަތުގައިވާ އެންމެހައި ފަރާތްތަކުގެ އަގުހުރި ގުރުބާނީއާއި ބުރަ މަސައްކަތް ކަމުގައެވެ.