މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވޭ ގޮތަށް ޤާނޫނަށް ގެނައި އިސްލާހަށް އަމަލުކުރަން ފަށައިފި
މަސްތުވާތަކެތި ރާއްޖެއަށް އެތެރެކުރާ މީހުންނާއި، އޭގެ ވިޔަފާރިކުރާ މީހުންނަށް މަރުގެ އަދަބު ދެވޭ ގޮތަށް މަސްތުވާތަކެއްޗާ ބެހޭ ގާނޫނަށް ގެނައި މުހިންމު އިސްލާހަށް އިއްޔެއިން ފެށިގެން އަމަލުކުރަން ފަށައިފިއެވެ.
މި އިސްލާހަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ ފަރާތުން، މަސްތުވާތަކެތީގެ ވަބާއިން ގައުމު ސަލާމަތްކުރުމަށް ކުރަމުންދާ މަސައްކަތުގެ ދަށުން ހުށަހެޅި ބިލެކެވެ. 2024 ވަނަ އަހަރުގެ ޑިސެމްބަރު މަހު ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ލ. ގަމު ދާއިރާގެ ޕީއެންސީ މެންބަރު ޔޫސުފް ރަޝީދު އެވެ. ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ގެ ރިޔާސަތުގައި މި ބިލު ފާސްކޮށްފައިވަނީ މަސްތުވާތަކެތީގެ ބޮޑެތި މައްސަލަތަކުގައި ހަރުކަށި އަދަބު ދިނުމަށް ބާރުއެޅުމުގެ ގޮތުންނެވެ.
މަސްތުވާތަކެއްޗާ ބެހޭ ގާނޫނަށް ގެނައި މި ބަދަލުގެ ދަށުން، ވަކި ޝަރުތުތަކެއް ފުރިހަމަވާ ހާލަތްތަކުގައި މަސްތުވާތަކެތި އެތެރެކުރުމާއި ބޭރުކުރުމުގެ ކުށުގެ އަދަބަކީ މަރުގެ އަދަބު ކަމަށް ވަނީ ކަނޑައަޅާފައެވެ. އެގޮތުން މަރުގެ އަދަބު ދެވޭނެ ހާލަތްތަކަކީ:
- ރާއްޖެއަށް އެތެރެކުރި ކެނެބިސްގެ ބަރުދަން 350 (ތިންސަތޭކަ ފަންސާސް) ގްރާމަށް ވުރެ އިތުރުވުން.
- ރާއްޖެއަށް އެތެރެކުރި ޑައިމޯފިންގެ ބަރުދަން 250 (ދުއިސައްތަ ފަންސާސް) ގްރާމަށް ވުރެ އިތުރުވުން.
- ކެނެބިސް ނުވަތަ ޑައިމޯފިން ފިޔަވައި، ގާނޫނުގެ ޖަދުވަލު 1 ގައި ހިމެނޭ އެހެން މަސްތުވާއެއްޗެއް 100 (ސަތޭކަ) ގްރާމަށް ވުރެ އިތުރަށް އެތެރެކުރުން.
މީގެ އިތުރުން، މި އަދަބު ކަނޑައެޅޭނީ އެމީހަކު ދިވެހިރާއްޖެއަށް އެތެރެވިއިރު އެތެރެކުރި އެއްޗަކަށް އެ ތަކެތި ވާނަމައެވެ. ގާނޫނުގައިވާ ގޮތުން، މީހެއްގެ މައްޗަށް މަރުގެ އަދަބު ކަނޑައެޅި ނަމަވެސް، އެ އަދަބު ތަންފީޒުކުރެވޭނީ ވަރަށް ވަރުގަދަ ގާނޫނީ މަރުހަލާތަކެއް ފުރިހަމަވުމަށްފަހުގައެވެ. އެގޮތުން، ދިވެހިރާއްޖޭގެ ސުޕްރީމް ކޯޓުގެ މައްސަލަ ބަލާ ފަނޑިޔާރުންގެ ބެންޗުގެ އިއްތިފާގުން އެގޮތަށް ހުކުމް ކުރުމުން ނޫނީ މަރުގެ އަދަބު ތަންފީޒެއް ނުކުރެވޭނެއެވެ. މި އިސްލާހަށް އަމަލުކުރަން ފެށުމާއެކު، މަސްތުވާތަކެތީގެ ވިޔަފާރިކުރާ ބޮޑެތި ނެޓްވޯކްތަކަށް ހުއްޓުމެއް އަންނާނެ ކަމަށް ސަރުކާރުން އުންމީދު ކުރެއެވެ.
ރިއެކްޝަންސް
