އައްޑޫގެ ކަރަންޓު މައްސަލަ 20 އަހަރަށް ހައްލުކުރުމުގެ މަޝްރޫޢެއްގައި ސޮއިކޮށްފި
ކުރިއަށް އޮތް 20 އަހަރަށް އައްޑޫ ސިޓީގެ ކަރަންޓުގެ މައްސަލަ ދާއިމީކޮށް ހައްލުކުރެވޭނެ ބިޔަ މަޝްރޫޢެއްގައި ސޮއިކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ.
ރައީސުލްޖުމްހޫރިއްޔާ މިކަން ހާމަކުރެއްވީ ރޭ ބޭއްވި "ދަ ގްރޭޓަރ އައްޑޫ ވިޝަން" ގެ ތަފްސީލު ލޯންޗުކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އައްޑޫ ސިޓީގެ ތަރައްޤީއަށް ކުރަހާފައިވާ ތަޞައްވުރު ހާމަކުރައްވަމުން ރައީސް ވިދާޅުވީ، އައްޑޫގެ ރައްޔިތުންނަށް މިވަގުތު ދިމާވެފައިވާ އެންމެ ބޮޑު ތަކުލީފަކީ ކަރަންޓުގެ މައްސަލަ ކަމަށެވެ. އަދި މިއީ އެތައް ދައުރެއް ފާއިތުވެގެން ދިޔައިރުވެސް އެކަށީގެންވާ ހައްލެއް ނުލިބި އޮތް ބޮޑު މައްސަލައެއްކަން އެމަނިކުފާނު ފާހަގަކުރެއްވިއެވެ.
އައްޑޫގެ ކަރަންޓުގެ މައްސަލައަށް ދާއިމީ ހައްލެއް ގެނައުމަށްޓަކައި، އެކަމަށް ބޭނުންވާ މުހިންމު އެއްބަސްވުމުގައި އިއްޔެ ސޮއިކޮށްފައިވާކަން ރައީސް އިޢުލާނު ކުރެއްވިއެވެ. މި މަޝްރޫޢުގެ ދަށުން އައްޑޫގައި 26 މެގަވޯޓުގެ ކަރަންޓު ފޯރުކޮށްދެވޭނެ ނިޒާމެއް އަލަށް ގާއިމުކުރެވިގެންދާނެއެވެ.
މި މަޝްރޫޢުގެ ތާވަލާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، އަންނަ އަހަރުގެ ޖުލައި މަސް އަންނައިރު މި މަޝްރޫޢުގެ ހުރިހާ މަސައްކަތްތަކެއް އެއްކޮށް ނިމި، އައްޑޫގެ ކަރަންޓުގެ ވިއުގައަށް ބޮޑު ބަދަލެއް އަންނާނެ ކަމަށެވެ.
މި މަޝްރޫޢަކީ އައްޑޫ ސިޓީގެ ރައްޔިތުންގެ ދިރިއުޅުމުގެ ފެންވަރު މަތިކުރުމަށް ސަރުކާރުން އިސްކަންދީގެން ކުރިއަށްގެންދާ މުހިންމު މަސައްކަތެއްގެ ގޮތުގައި ރައީސުލްޖުމްހޫރިއްޔާ ފާހަގަކުރެއްވިއެވެ.
ރިއެކްޝަންސް
