ޚިޔާލުފާޅުކުރުމުގެ މިނިވަންކަމަކީ އެހެން މީހުންގެ އަބުރަށް އަރައިގަތުމަށް އޮތް ހުއްދައެއް ނޫން: މެންބަރު އިއްބެ

ޚިޔާލުފާޅުކުރުމުގެ މިނިވަންކަމަކީ އެހެން މީހުންގެ އަބުރާއި އިއްޒަތަށް އަރައިގަތުމަށް ލިބިދޭ ހުއްދައެއް ނޫންކަމަށް ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސެއިން (އިއްބެ) ވިދާޅުވެއްޖެއެވެ.

މެންބަރު އިއްބެ މިހެން ވިދާޅުވެފައިވަނީ، ދާދިފަހުން "އަދަދު" ނޫހުން ނެރުނު "އައިޝާ" ނަމަކަށް ކިޔާ ޑޮކިއުމަންޓްރީއާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަބުރު ކަތިލާފައިވާ ކަމަށް ބުނެ، މީސްމީޑިއާގައި ބޮޑެތި ފާޑުކިޔުންތަކެއް އަމާޒުވެފައިވާ ދަނޑިވަޅެއްގައެވެ. މި ޑޮކިއުމަންޓްރީއަކީ އެއްވެސް ހަގީގަތެއް ނެތް ވާހަކަތަކެއް ފަތުރައި، މުޖުތަމައުގައި ފިތުނަ އުފެއްދުމަށް ޝާއިއުކޮށްފައިވާ ޒިންމާދާރުކަން ކުޑަ އަމަލެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.

މިކަން ހަރުކަށި އިބާރާތުން ކުށްވެރިކުރައްވައި މެންބަރު އިއްބެ ވިދާޅުވީ، ދޮގާއި ފިތުނަ ފަތުރައިގެން މީހުންގެ އަބުރު ކަތިލުމަކީ ހިންގޭ ބޮޑުވެގެންވާ ޖަރީމާއެއް ކަމަށެވެ.

 "ހަގީގީ މިނިވަންކަމުގެ އަސާސަކީ، އެއާ ގުޅިފައިވާ ޒިންމާދާރުކަން އިސްކޮށް، ތެދުބަހުން ވާހަކަދެއްކުން،" މެންބަރު އިއްބެ ވިދާޅުވިއެވެ.

މި މައްސަލައާ ގުޅިގެން ފުލުހުން މިހާރު ދަނީ ޚާއްސަ ތަހުގީގެއް ހިންގަމުންނެވެ. އެގޮތުން "އަދަދު" ނޫހުގެ ޗީފް އެޑިޓަރު އަދި ސީއީއޯ ހުސެއިން ފިޔާޒް މޫސާގެ ޕާސްޕޯޓު ހިފަހައްޓައި، އެ ނޫހުގެ އޮފީސް ފާސްކުރުމުގެ މަސައްކަތް ފުލުހުން ވަނީ ފަށާފައެވެ. އަދި ދާދިފަހުން ރާއިސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ، އެ ޑޮކިއުމަންޓްރީގައި ހުރި ވާހަކަތަކަކީ އެއްވެސް އަސާސެއް ނެތް ދޮގު ވާހަކަތަކެއް ކަމަށެވެ. އަދި އެއީ އޭއައި ބޭނުންކޮށްގެން އެމަނިކުފާނުގެ އަބުރު ކިލަނބުކޮށްލުމަށް ތައްޔާރުކޮށްފައިވާ ވީޑިއޯއެއް ކަމަށް ރައީސް ތުހުމަތު ކުރެއްވިއެވެ. މިފަދަ ދޮގު މައުލޫމާތު ފަތުރާ ފަރާތްތަކާ މެދު ގާނޫނީ ފިޔަވަޅު އެޅުމަށް ކަމާބެހޭ އިދާރާތަކުގައި އެދިވަޑައިގެންފައިވާނެ ކަމަށްވެސް ރައީސް ވިދާޅުވިއެވެ.

ނަމަވެސް "އަދަދު" ނޫހުން ބުނަމުންދަނީ އެ ޑޮކިއުމަންޓްރީއަކީ އެ ނޫހަށް ލިބިފައިވާ ހެކިތަކުގެ މައްޗަށް ބިނާކޮށް އުފައްދާފައިވާ ތަހުގީގީ ރިޕޯޓެއް ކަމަށެވެ. މި މައްސަލައިގެ ތަހުގީގު ފުލުހުން ކުރިއަށް ގެންދާއިރު، މިއީ ނޫސްވެރިކަމުގެ މިނިވަންކަމާއި އަބުރާ ބެހުމުގެ ހުދޫދުތަކާ މެދު މުޖުތަމައުގައި ބޮޑު ބަހުސެއް އުފެދިފައިވާ ކަމެކެވެ.