އީރާނަށް ދެމުންދާ ޙަމަލާތަކުގައި ޝަހީދުވި މީހުންގެ އަދަދު 1,300 އަށްވުރެ މައްޗަށް
އެމެރިކާއާއި ޔަހޫދީން ގުޅިގެން އީރާނުގެ ރައްޔިތުންނާ ދެކޮޅަށް ފަށާފައިވާ ޣައިރުޤާނޫނީ ހަނގުރާމައިގައި، ޢާންމުން ދިރިއުޅޭ ސަރަޙައްދުތަކަށް އަމާޒުކޮށް ދެމުންދާ ރަޙުމުކުޑަ ޙަމަލާތަކުގައި ޝަހީދުވި މީހުންގެ އަދަދު 1,332 އަށް އުފުލިއްޖެއެވެ.
މި ހިތާމަވެރި ތަފުސީލުތައް ހާމަކުރައްވަމުން، އީރާނުން އެކުވެރި ދައުލަތްތައް (އދ) އަށް ކަނޑައަޅާފައި ހުންނަވާ ސަފީރު އަމީރު ސަޢީދު އީރުވާނީ ވިދާޅުވީ، އެމެރިކާއާއި ޔަހޫދީންގެ ޙަމަލާތަކުގައި މިހާތަނަށް އެތަކެއް ހާސް ބަޔަކު ޒަޚަމުކޮށްލާފައިވާ ކަމަށެވެ. އަދި މި ހަނގުރާމައިގައި އީރާނުގެ ޢާންމުންނަށް ގަސްދުގައި ޙަމަލާތައް އަމާޒުކުރަމުންދާކަން ވަނީ ހާމަވެފައެވެ.
އެގޮތުން، ހަނގުރާމައިގެ ފުރަތަމަ ދުވަހުވެސް ޔަހޫދީންނާއި އެމެރިކާ ގުޅިގެން އީރާނުގެ އަންހެން ކުދިންގެ މަދަރުސާއަކަށް ބޮންއަޅައި، 180 އެއްހާ ކިޔަވާ ކުދިން ޝަހީދުކޮށްލާފައިވާކަން ސަފީރު ފާހަގަކުރެއްވިއެވެ.
އީރުވާނީ އިތުރަށް ވިދާޅުވީ، ދުޝްމަނުންގެ އުދުވާނަށް ރައްދު ދިނުމުގެ ގޮތުން އީރާނުން ޙަމަލާ ދެމުންދިޔަ ނަމަވެސް، އެއްވެސް ޙާލެއްގައި ޢާންމުން ދިރިއުޅޭ ސަރަޙައްދުތަކަށް އީރާނުން ޙަމަލާ އަމާޒުކޮށްފައި ނުވާނެ ކަމަށެވެ. އީރާނުގެ ރައްދު ޙަމަލާތައް އަމާޒުކުރަމުން ދަނީ ޔަހޫދީ ދައުލަތުގެ އަސްކަރީ މަރުކަޒުތަކުގެ އިތުރުން، ގަލްފާއި ޢަރަބި ޤައުމުތަކުގައި އެމެރިކާއިން ޤާއިމުކޮށްފައިވާ އަސްކަރީ މަރުކަޒުތަކަށާއި އެމެރިކާގެ މަސްލަޙަތު އޮތް ތަންތަނަށް ކަމަށް އޭނާ ވިދާޅުވިއެވެ.
އީރާނުން މިކަން ބައިނަލްއަޤުވާމީ މުޖުތަމަޢުގެ ސަމާލުކަމަށް ގެނެސްފައިވަނީ، އެމެރިކާއާއި ޔަހޫދީން ބައިނަލްއަޤުވާމީ ޤާނޫނުތަކާ ޚިލާފަށް ހިންގަމުންދާ ޖަރީމާތައް ވަގުތުން ހުއްޓުވުމަށް ގޮވާލަމުންނެވެ.
ރިއެކްޝަންސް
