ދޫނި ފިހާރަ ޤުރުއާން މުބާރާތުގައި ބައިވެރިވުމުގެ ފުރުސަތު ހުޅުވާލައިފި
މިއަހަރު ބޭއްވުމަށް ހަމަޖެހިފައިވާ "ދޫނި ފިހާރަ ޤުރުއާން މުބާރާތް" ގައި ބައިވެރިވުމުގެ ފުރުސަތު މިއަދު ހުޅުވާލައިފިއެވެ. މިއީ މުއިވެޔޮ ފަސްއަނގޮޅި ކަންމަތީގެ ޒުވާނުންތަކެއްގެ އިސްނެގުމުގެ މަތިން، ދޫނި ފިހާރައިގެ ފަރާތުން އިންތިޒާމްކޮށްގެން ބާއްވާ މުބާރާތެކެވެ.
މި މުބާރާތަކީ ދީނީ ހޭލުންތެރިކަން އިތުރުކުރުމާއި، ކުޑަކުދިންގެ ހިތްތަކުގައި ޤުރުއާނަށް ލޯބި ޖެއްސުމުގެ މަގުސަދުގައި ބާއްވަމުން އަންނަ މުބާރާތެކެވެ. މިއަހަރު ބޭއްވެނީ މި މުބާރާތުގެ ތިންވަނަ އެޑިޝަނެވެ. މުބާރާތް އިންތިޒާމްކުރާ ފަރާތުން މައުލޫމާތު ދޭ ގޮތުގައި، މިއަހަރުގެ މުބާރާތް ފެށުމަށް ހަމަޖެހިފައިވަނީ ބަރަކާތްތެރި ރަމަޟާން މަހުގެ 27 ވަނަ ދުވަހުއެވެ.
މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ތިން އުމުރުފުރާއަކަށް ބަހާލައިގެންނެވެ. އެއީ:
6 އަހަރުން ދަށުގެ އުމުރުފުރާ
9 އަހަރުން ދަށުގެ އުމުރުފުރާ
12 އަހަރުން ދަށުގެ އުމުރުފުރާ
މިފަހަރުގެ މުބާރާތުގައިވެސް ގިނަ އިނާމުތަކެއް ހުށަހެޅިފައިވާއިރު، މުބާރާތް އިންތިޒާމްކުރާ ފަރާތުން ބުނީ ކުރިއެކޭ އެއްގޮތަށް ކޮންމެ ބޭފުޅަކަށްވެސް ކިޔަވާ ކުދިންނަށް އިނާމު ހުށަހެޅުމުގެ ފުރުސަތު އޮންނާނެ ކަމަށެވެ. އަދި މިފަހަރުގެ މުބާރާތް ބައްޓަންކޮށްފައިވަނީ މުބާރާތުގައި ކިޔަވާ ކޮންމެ ކުއްޖަކަށްވެސް އިނާމެއް ލިބޭނެ ގޮތަށެވެ.
މުއިވެޔޮ ފަސްއަނގޮޅި ސަރަހައްދުގެ ގިނަ އާއިލާތަކާއި ވިޔަފާރިވެރިންގެ ބޮޑު އެއްބާރުލުމެއް މި މުބާރާތަށް ލިބެމުންދެއެވެ. އެގޮތުން މިދިޔަ އަހަރު ބޭއްވި މުބާރާތުގައިވެސް ގިނަ ފަރާތްތަކަކުން އެހީތެރިކަން ފޯރުކޮށްދީފައިވާކަން އިންތިޒާމްކުރާ ފަރާތުން ފާހަގަކުރެއެވެ.
މިދިޔަ އަހަރު ބޭއްވި މުބާރާތުގައި ތިން އުމުރުފުރާއިން ޖުމްލަ 22 ދަރިވަރުން ބައިވެރިވެ ވާދަކޮށްފައިވެއެވެ. އެފަހަރު މުބާރާތުގެ އެއްވަނައަށް 10,000 ރުފިޔާ، ދެވަނައަށް 7,000 ރުފިޔާ އަދި ތިންވަނައަށް 5,000 ރުފިޔާގެ ފައިސާގެ އިނާމު ވަނީ ދީފައެވެ. މިއަހަރުގެ މުބާރާތްވެސް މިއަށްވުރެ ކުލަގަދަކޮށް ކުރިއަށް ގެންދިއުމަށް ވަނީ ރޭވިފައެވެ.
ރިއެކްޝަންސް
