ދިވެހި ވަޠަނީ ޚިދުމަތުގެ ފަންނީ ތަމްރީނުގެ 2 ވަނަ ބެޗުން 73 ދަރިވަރަކު ދަސްވެނިވެއްޖެ
ދިވެހި ވަޠަނީ ޚިދުމަތުގެ ފަންނީ ތަމްރީނު ޕްރޮގްރާމުގެ ދެވަނަ ބެޗު ފުރިހަމަކޮށް، 73 ދަރިވަރަކު ކާމިޔާބުކަމާއެކު ދަސްވެނިވެއްޖެއެވެ.
މި ތަމްރީނަކީ ދިވެހި ވަޠަނީ ޚިދުމަތުގެ ޕްރޮގްރާމްތަކުގެ ތެރެއިން "ނޭޝަނަލް ސަރވިސް އިނީޝިއަލް ޓްރެއިނިންގ" ފުރިހަމަކުރާ ދަރިވަރުންނަށް އަމާޒުކޮށްގެން ހިންގާ ހާއްސަ ޕްރޮގްރާމެކެވެ. މިއަހަރުގެ ޖޫން މަހުގެ 3 ވަނަ ދުވަހުން ފެށިގެން މިއަދުގެ ނިޔަލަށް 16 ހަފްތާގެ މުއްދަތަކަށް ކުރިއަށްގެންދިޔަ މި ބެޗުގައި ރާއްޖޭގެ 17 އަތޮޅަކުން ޖުމްލަ 75 ދަރިވަރުން ބައިވެރިވިއެވެ. އޭގެ ތެރެއިން ކޯސް ފުރިހަމަކޮށްފައިވަނީ 60 ފިރިހެން ދަރިވަރުންނާއި 13 އަންހެން ދަރިވަރުންނެވެ.
މި ޕްރޮގްރާމްގެ ތެރެއިން ދަރިވަރުންނަށް އަމަލީ މައިދާނަށް ބޭނުންވާ މުހިންމު ސިނާއީ އެތައް ދާއިރާއަކުން ވަނީ ފަންނީ ހުނަރުތައް އުނގަންނައިދީފައެވެ. އޭގެ ތެރޭގައި އޮޓޯ މޯބައިލް އިންޖިނިއަރިންގ، މެރިން އިންޖިނިއަރިންގ، އިލެކްޓްރީޝަން، ރެފްރިޖެރޭޝަން އެންޑް އެއަރ ކަންޑީޝަނިންގ، ވެލްޑިންގ، މެޓަލް ފެބްރިކޭޝަން އަދި އޮފީސް މެނޭޖުމަންޓް ހިމެނެއެވެ.
ފަންނީ ތަފާތު ދާއިރާތަކުގެ ތަޖުރިބާކާރު ސިފައިންގެ އިންސްޓްރަކްޓަރުން ކިޔަވައިދެއްވި މި ތަމްރީނު ފުރިހަމަކުރި ދަރިވަރުންނަށް ލިބިގެންދަނީ މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ޤަބޫލުކުރާ ލެވެލް 3 ގެ ސަނަދެކެވެ. މިއީ ޒުވާނުން ބާރުވެރިކުރުވައި ވަޒީފާގެ ބާޒާރަށް ތައްޔާރުކުރުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ.
ރިއެކްޝަންސް
