ފަތުރުވެރިކަން ކުރިއެރުވުމުގައި ސަރުކާރުން އަބަދުވެސް އެއްބާރުލުން ދޭނެ: މިނިސްޓަރ އަމީން

ރާއްޖޭގެ ފަތުރުވެރިކަމުގެ ދާއިރާ އިތުރަށް ކުރިއެރުވުމަށް އެއްބާރުލުން ދިނުމުގައި ސަރުކާރުން އަބަދުވެސް ދެމިއޮންނާނެ ކަމުގެ ޔަޤީންކަން ފަތުރުވެރިކަމާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން ދެއްވައިފިއެވެ. ވަޒީރު މިހެން ވިދާޅުވީ ޤައުމީ ފަތުރުވެރިކަމުގެ ދުވަހުގެ މުނާސަބަތުގައި ދެއްވި ޚާއްސަ މެސެޖެއްގައެވެ.

ޤައުމީ ފަތުރުވެރިކަމުގެ ދުވަހުގެ ތަހުނިޔާ އަރިސްކުރައްވައި، ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވަޒީރު އަމީން ވިދާޅުވީ، ދިވެހިރާއްޖެއަކީ ދުނިޔޭގެ ފަތުރުވެރިކަމުގެ އެއްވަނަ މަންޒިލްގެ ގޮތުގައި ދެމިއޮތުމަށްޓަކައި ކެނޑިނޭޅި މަސައްކަތްކޮށްދެއްވާ ހުރިހާ ފަރާތްތަކުގެ އަގުހުރި ޚިދުމަތް ފާހަގަކުރައްވާ ކަމަށެވެ. އަދި ދިވެއްސެއްގެ ހައިސިއްޔަތުން ރާއްޖޭގެ ފަތުރުވެރިކަމުގެ ސިނާޢަތާމެދު ފަޚުރުވެރިވާ ކަމަށްވެސް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ، މި ސިނާޢަތަކީ މުޅި ދުނިޔެއާ ރާއްޖެ ގުޅުވައިދޭ އަދި ރާއްޖޭގެ އިޤްތިޞާދުގެ މައި ތަނބު ކަމަށެވެ. އަދި މިއީ ދިވެހި އެތައް ރައްޔިތުންނަކަށް އަގުހުރި ގިނަގުނަ ވަޒީފާގެ ފުރުޞަތުތަކެއް ފަހިކޮށްދީފައިވާ ދާއިރާއެއްކަން ވަޒީރު ފާހަގަކުރެއްވިއެވެ.

ކޮންމެ އަހަރެއްގެވެސް އޮކްޓޫބަރު މަހުގެ 3 ވަނަ ދުވަހަކީ ދިވެހިރާއްޖޭގެ ފަތުރުވެރިކަމުގެ ދުވަހުގެ ގޮތުގައި ފާހަގަކުރަން ފެށީ 2021 ވަނަ އަހަރުއެވެ. މި ދުވަސް ޚާއްސަކޮށްފައިވަނީ 1972 ވަނަ އަހަރުގެ އޮކްޓޫބަރު 3 ގައި ރާއްޖޭގެ އެންމެ ފުރަތަމަ ރިސޯޓު ކަމަށްވާ މާލެ އަތޮޅު ވިހަމަނާފުށި (ކުރުނބާ މޯލްޑިވްސް) 30 ކޮޓަރިއާއި 60 އެނދާއެކު ހުޅުވުނު ތާރީޚީ ދުވަހާ ގުޅުވައިގެންނެވެ.

ރާއްޖޭގެ ޖުމްލަ ޤައުމީ އުފެއްދުންތެރިކަމުގެ (ޖީޑީޕީ) 28 އިންސައްތަ އަދި ލިބޭ ބޭރު ފައިސާގެ 60 އިންސައްތަ ފަތުރުވެރިކަމަށް ބިނާވެފައިވާއިރު، މި ސިނާޢަތުގައި ވަޒީފާ އަދާކުރާ 55،800 އަށްވުރެ ގިނަ މީހުންގެ ތެރެއިން 41.4 އިންސައްތައަކީ ދިވެހިންނެވެ. ވުމާއެކު، މިއީ ރާއްޖޭގެ އިޤްތިޞާދީ ދިރުމާއި ދިވެހިންގެ ދިރިއުޅުމުގެ އެންމެ މުހިންމު ބިންގަލެވެ.