އީގަލް ހިލްސްގެ އެގްރީމަންޓުގައި ޤާނޫނުއަސާސީއާ ޚިލާފު އެއްވެސް ކަމެއް ނެތް: މެންބަރު އިއްބެ

ސަރުކާރުން ކުރިއަށްގެންދާ ރަސްމާލެ މަޝްރޫޢުގެ ދަށުން އީގަލް ހިލްސް ކުންފުންޏާއެކު ވެފައިވާ އެއްބަސްވުމުގައި ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ނޯންނާނެ ކަމަށް ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާގެ މެންބަރު އިބްރާހީމް ޙުސައިން (އިއްބެ) ވިދާޅުވެއްޖެއެވެ.

ސަންގު ޓީވީގެ "ޚަބަރަށްފަހު" ޕްރޮގްރާމްގައި ވާހަކަދައްކަވަމުން މެންބަރު އިއްބެ ވިދާޅުވީ، ރަސްމާލެ މަޝްރޫޢާ ގުޅިގެން އީގަލް ހިލްސްއާއެކު ވެފައިވާ އެއްބަސްވުމަކީ ޤާނޫނާއި ޤަވާއިދުތަކުގެ ތެރެއިން ފުރިހަމަކުރެވިފައިވާ އިޖުރާއާތުތަކެއްގެ މަތިން ވެފައިވާ އެއްބަސްވުމެއް ކަމަށެވެ. އަދި އިދިކޮޅު ފަރާތްތަކުން މި އެއްބަސްވުމާ ގުޅުވައިގެން ދައްކަމުންދާ ވާހަކަތަކަކީ ރައްޔިތުންގެ މެދުގައި ފިތުނަ އުފައްދައި، ބައިބައިކުރުމުގެ މަޤްޞަދުގައި ދައްކަމުންދާ ދޮގު ވާހަކަތަކެއް ކަމަށް މެންބަރި އިއްބެ ވިދާޅުވިއެވެ.

މެންބަރު އިއްބެ އިތުރަށް ވިދާޅުވީ، މި މަޝްރޫޢަކީ ރައްޔިތުންގެ ލާބައާއި މަންފާއަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ފަށާފައިވާ މުހިންމު މަޝްރޫޢެއް ކަމަށެވެ.

" މި ޕްރޮޖެކްޓް އެއްވެސް ފަރާތަކަށް ނުހުއްޓުވޭނެ. އަދި އީގަލް ހިލްސް ކުންފުނި އޮތީ މި މަޝްރޫޢުގެ މަސައްކަތްތައް ބާރުމިނުގައި ކުރިއަށް ގެންދިއުމުގެ ފުރިހަމަ ތައްޔާރީގައި " މެންބަރު އިއްބެ ވިދާޅުވިއެވެ.

މީގެއިތުރުން، އީގަލް ހިލްސް ފަދަ ދުނިޔޭގެ ފެންވަރުގެ ބޮޑު ކުންފުންޏަކުން ރާއްޖޭގެ މިފަދަ ބިޔަ މަޝްރޫޢަކަށް އިންވެސްޓްކުރުމަކީ ބައިނަލްއަޤްވާމީ ދުނިޔޭގެ ސަމާލުކަން ރާއްޖެއަށް ލިބިގެންދިޔަ ކަމެއްކަން މެންބަރު ފާހަގަކުރެއްވިއެވެ. މި އިންވެސްޓްމަންޓާއެކު، މުޅި ދުނިޔޭގެ އެކި ކަންކޮޅުތަކުގެ އިންވެސްޓަރުން މިހާރު ދަނީ ރާއްޖޭގައި އިންވެސްޓްކުރެވެން ހުރި އިތުރު ފުރުޞަތުތަކަށް ޝައުޤުވެރިކަމާއެކު ބަލަމުންކަމަށްވެސް މެންބަރު އިއްބެ ވިދާޅުވިއެވެ. 

ރަސްމާލެ މަޝްރޫޢަކީ މިހާތަނަށް ރާއްޖޭގެ ތާރީޚުގައިވެސް ހިންގޭ އެންމެ ބޮޑު އެއް މަޝްރޫޢެވެ. މި މަޝްރޫޢުގެ އެއްބަސްވުމުގެ ދަށުން، ހިއްކާ ބިމުގެ ތެރެއިން އީގަލް ހިލްސް ކުންފުންޏަށް ވަނީ 500 މިލިއަން ހެކްޓަރުގެ ބިން ދިނުމަށް އެއްބަސްވެފައެވެ.

މެންބަރު އިއްބެގެ ވާހަކަ ނިންމަވާލައްވަމުން ވިދާޅުވީ، ސަރުކާރުން ކުރިއަށްގެންދާ މިފަދަ ތަރައްޤީގެ ބޮޑެތި މަޝްރޫޢުތަކުގެ ސަބަބުން ރާއްޖޭގެ އިޤްތިޞާދަށް ބޮޑެތި ކުރިއެރުންތަކެއް ލިބި، ރައްޔިތުންނަށް ދިމާވެފައިވާ ގެދޮރުވެރިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމަށެވެ.