އިދިކޮޅު ފަރާތްތަކުން ދައްކާ ވާހަކައިގެ އެއްވެސް "އޮއްޓަރެއް" ނެތް: މެންބަރު އިއްބެ

ރަސްމާލެ މަޝްރޫޢާ ގުޅިގެން އިދިކޮޅު ފަރާތްތަކުން ދައްކަމުންދާ ވާހަކަތަކަކީ އެއްވެސް ބުރަދަނެއް އަދި އޭގައި އެއްވެސް "އޮއްޓަރެއް" ހުރި ވާހަކަތަކެއް ނޫން ކަމަށް ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާގެ މެންބަރު އިބްރާހީމް ޙުސައިން (އިއްބެ) ވިދާޅުވެއްޖެއެވެ.

މެންބަރު އިއްބެ މިހެން ވިދާޅުވެފައިވަނީ، އިދިކޮޅު ފަރާތްތަކުން މި މަޝްރޫޢުގެ ސަބަބުން ރާއްޖޭގެ މިނިވަންކަމާއި އިސްތިޤްލާލު ގެއްލި، ދީނީ އެއްބައިވަންތަކަމަށް ބުރޫއަރައި އެހެން ދީންތަކަށް ފުރުސަތު ފަހިވެގެންދާނެ ކަމަށް ބުނެ އަޑުފަތުރަމުންދާ ދަނޑިވަޅެއްގައެވެ. 

މިކަމާއި ގުޅިގެން ސަންގު ޓީވީގެ "ޚަބަރަށްފަހު" ޕްރޮގްރާމުގައި ވާހަކަދައްކަވަމުން މެންބަރު އިއްބެ ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖެއަށް މިފަދަ ބޮޑު އިންވެސްޓްމަންޓެއް ގެނައުމުން، އިދިކޮޅު ފަރާތްތަކަށް އެކަން ބަލައިގަންނަން ދަތިވެގެން އުޅުއްވާ ކަމަށެވެ. އަދި އެ މަޝްރޫޢު ހުއްޓުވުމުގެ ބޭނުމުގައި އެކި ކަހަލަ ހަގީގަތާ ޚިލާފު ވާހަކަތައް ފަތުރަމުންދާ ކަމަށް މެންބަރު އިއްބެ ވިދާޅުވިއެވެ.

މެންބަރު އިއްބެ ވަނީ ކުރީގެ ސަރުކާރުތަކުން ހިންގާފައިވާ ބޮޑެތި މަޝްރޫޢުތަކުގެ އަގުތަކާ މި މަޝްރޫޢު އަޅާކިޔުއްވާފައެވެ. އެގޮތުން، އެމްޑީޕީގެ ވެރިކަމުގައި ފުށިދިއްގަރުފަޅުން 650 ހެކްޓަރު ވިއްކާލާފައިވަނީ އެންމެ 2 މިލިއަން ޑޮލަރަށް ކަމަށާއި، ނަމަވެސް މި ސަރުކާރުން ރަސްމާލެ މަޝްރޫޢު ކުރިއަށް ގެންދަނީ 500 މިލިއަން ޑޮލަރުގެ އަގުހުރި އިންވެސްޓްމަންޓެއްގެ ގޮތުގައި ކަމަށް މެންބަރު ފާހަގަކުރެއްވިއެވެ. މިއީ ކުރީގެ އަގަށްވުރެ 250 އިންސައްތަ ބޮޑު އަގެއް ކަމަށާއި، މި ސަރުކާރުން ހިންގާ މަޝްރޫޢުތަކުގެ އަގާއި މަންފާ ކުރީގެ ސަރުކާރުތަކަށްވުރެ އެތައް ގުނައެއް ބޮޑުކަމަށް ވިދާޅުވިއެވެ.

މީގެއިތުރުން، ރައީސް ޔާމީންގެ ސަރުކާރުގައި އެނބޫދޫފަޅުން 650 ހެކްޓަރު ދޫކޮށްލީ 40 މިލިއަން ޑޮލަރަށް ކަން ފާހަގަކުރައްވައި، މިއަދުގެ ސަރުކާރުން މި މަޝްރޫޢު ހަވާލުކޮށްފައިވަނީ އޭގެ 20 ގުނަ އިތުރު އަގެއްގައި ކަމަށްވެސް މެންބަރު އިއްބެ ވިދާޅުވިއެވެ.

މެންބަރު އިއްބެ ވާހަކަފުޅު ނިންމަވާލައްވަމުން ވިދާޅުވީ، އިދިކޮޅު ފަރާތްތަކުން ކިތަންމެ ވަރަކަށް ހަގީގަތް އޮޅުވާލަން މަސައްކަތް ކުރި ނަމަވެސް، ރަސްމާލެ މަޝްރޫޢަކީ ދިވެހި ރައްޔިތުންނަށްވެސް މަންފާވާނެހެން މި ސަރުކާރުން އިޚްލާޞްތެރިކަމާއެކު ފަށާފައިވާ މުހިންމު މަޝްރޫޢެއް ކަމަށެވެ. އަދި މިފަދަ ތަރައްޤީގެ ބޮޑެތި މަޝްރޫޢުތަކުގެ ސަބަބުން ޤައުމުގެ އިޤްތިޞާދަށް އިންގިލާބީ ބޮޑެތި ބަދަލުތަކެއް އަންނާނެކަމުގެ ޔަޤީންކަން ވެސް މެންބަރު އިއްބެ ވަނީ ދެއްވާފައެވެ.