ޑްރަގް ވިއްކައިގެން މަންފާ ހޯދޭނެ އެއްވެސް ޖާގައެއް ދެން ރާއްޖޭގައި ނޯންނާނެ: މިނިސްޓަރ އިޙްސާން

މަސްތުވާތަކެތި ވިއްކައިގެން މަންފާ ހޯދުން ނިމުމަކަށް ގެނައުމަށް ސަރުކާރުން ކުރަމުން އަންނަ މަސައްކަތްތަކުގެ ދަށުން، އެފަދަ އެއްވެސް ވިޔަފާރިއެއް ރާއްޖޭގައި މިހާރު ކުރެވޭނެ އެއްވެސް ޖާގައެއް ނޯންނާނެ ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ވޭތުވެދިޔަ އާދީއްތަ ދުވަހުގެ ރޭ ބޭއްވި ސަރުކާރުގެ "އަހާ" ފޯރަމުގައި، މަސްތުވާތަކެއްޗާ ގުޅޭގޮތުން އާންމުންގެ ފަރާތުން ހުށަހެޅި ސުވާލުތަކަށް ޖަވާބުދެއްވަމުންނެވެ.

ވަޒީރު އިޙްސާން ވިދާޅުވީ، މަސްތުވާތަކެތީގެ ވިޔަފާރިކޮށްގެން އެއިން ނާޖާއިޒު މަންފާ ހޯދަމުންދާ އެތައް ބަޔަކު ރާއްޖޭގައި ތިބިއިރު، މި ސަރުކާރުން އެކަން ހައްލުކުރުމަށްޓަކައި ދެ ގޮތަކަށް އަމާޒުހިފައިގެން މަސައްކަތްތައް ފަށާފައިވާ ކަމަށެވެ. އެގޮތުން، މަސްތުވާތަކެތީގެ ޝިކާރައަކަށްވެފައިވާ ފަރާތްތަކަށް ފަރުވާ ދިނުމުގެ ނިޒާމު ހަރުދަނާ ކުރުމާއި، ޑްރަގް ނެޓްވޯކުތައް ހުއްޓުވުމަށް ފާއިތުވި ދެ އަހަރާއި ބައިގެ ތެރޭގައި މުހިންމު މަސައްކަތްތަކެއް ކުރެވިފައިވާކަން ވަޒީރު ފާހަގަކުރެއްވިއެވެ.

ރާއްޖެއަށް މަސްތުވާތަކެތި އެތެރެކޮށް ވިޔަފާރިކުރާ ފަރާތްތައް ހުއްޓުވުމަށް ކުރާ މަސައްކަތުގެ ތެރެއިން މިހާތަނަށް މުޅި ރާއްޖެއިން 24 ނެޓްވޯކެއް ދެނެގަނެވިފައިވާ ކަމަށް ވަޒީރު ވިދާޅުވިއެވެ. މީގެ ތެރެއިން 3 ނެޓްވޯކެއްގެ މައްސަލަ ތަހުގީގުކޮށް މިހާރު ކޯޓު މަރުހަލާގައި އޮތްއިރު، އެ މައްސަލަތަކުގައި 3.6 މިލިއަން ރުފިޔާ އާއި 148،000 އެމެރިކާ ޑޮލަރުގެ ނަގުދު ފައިސާގެ އިތުރުން ގިނަ އަދަދެއްގެ މުދާ ވެސް ހިފަހައްޓާފައިވާ ކަމަށް ވިދާޅުވިއެވެ. އަދި ޝަރީއަތް ނިމުމުން އެ ހުރިހާ ފައިސާއާއި މުދަލެއް ދައުލަތަށް ނެގޭނެ ކަމަށްވެސް ވަޒީރު ވިދާޅުވިއެވެ.

މީގެއިތުރުން، ރާއްޖޭގެ އެކި ސަރަހައްދުތަކުގައި ކެފޭތަކުގެ ގޮތުގައި މަސްތުވާތަކެތި ބޭނުންކޮށް ވިއްކާ ތަންތަން ބަންދުކުރުމަށް ގާނޫނަށް ގެނައި އިސްލާހުތަކާއެކު މިހާތަނަށް ޖުމްލަ 17 ތަނެއް ބަންދުކޮށްފައިވާ ކަމަށް ވަޒީރު ހާމަކުރެއްވިއެވެ. އޭގެ ތެރޭގައި ހިމެނެނީ މާލޭގެ 12 ތަނަކާއި، އައްޑޫ ސިޓީގެ 4 ތަނެއްގެ އިތުރުން ފުވައްމުލައް ސިޓީގެ ތަނެކެވެ. ވަޒީރު ވިދާޅުވީ ކުރިއަށް އޮތް ނޮވެމްބަރު މަހުގެ ނިޔަލަށް މާލޭގައި މިފަދަ ގޮތްގޮތަށް ބޭނުންކުރާ ހުރިހާ ތަނެއް އެއްކޮށް ބަންދުކުރުމަކީ އަމާޒެއް ކަމަށެވެ.

ރާއްޖެއަށް މަސްތުވާތަކެތި އެތެރެވުން ހުއްޓުވުމަށް ކުރެވުނު މަސައްކަތްތަކަށް އަލިއަޅުއްވާލައްވަމުން ވަޒީރު ވިދާޅުވީ، ވޭތުވެދިޔަ ދެ އަހަރާއި ބައިގެ ތެރޭގައި 1.3 ޓަނުގެ މަސްތުވާތަކެތި އަތުލައިގަނެވިފައިވާ ކަމަށެވެ. އަދި މިއީ މީގެ ކުރީގެ ސަރުކާރުތަކުގެ ފުރަތަމަ 3 އަހަރާ އަޅާބަލާއިރު ވަރަށް ބޮޑުތަނުން އިތުރު އަދަދެއްކަން ވެސް ވަޒީރު އިޙްސާން ފާހަގަކުރެއްވިއެވެ.