އަމީނީ މަގުން މަރާމާތުކުރި ބައި އާދިއްތަ ދުވަހު ހުޅުވާލަނީ

އަމީނީ މަގުން މަރާމާތުކުރި ސަރަޙައްދު އަންނަ އާދިއްތަ ދުވަހު ޢާންމު ދަތުރުފަތުރަށް ހުޅުވާލާނެ ކަމަށް އިމާރާތްކުރުމާއި ޢުމްރާނީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

މި މަސައްކަތް އެމްޓީސީސީއާ ހަވާލުކޮށްފައިވަނީ މިދިޔަ ޖޫން މަހުގެ 15 ވަނަ ދުވަހުއެވެ. އަމީނީ މަގުގައި ހަލާކުވެފައިވާ ސަރަޙައްދުތައް ޒަމާނީ ފެންވަރަށް މަރާމާތުކުރުމުގެ މަސައްކަތް ކުރިއަށް ގެންދަނީ މައިގަނޑު ދެ ސެގްމަންޓަކަށް ބަހާލައިގެންނެވެ. އޭގެ ތެރެއިން އާދިއްތަ ދުވަހު ދަތުރުފަތުރަށް ހުޅުވާލުމަށް ތައްޔާރުވަމުންދަނީ ސެގްމަންޓް 1 ގައި ހިމެނޭ، ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަޙައްދެވެ.

ސެގްމަންޓް 2 ގެ ދަށުން، ދިވެހިރާއްޖޭގެ އަޑު ކުރިމަތީ ހަތަރުއަނގޮޅި ކަންމަތީގައި ތާރު އެޅުމުގެ މަސައްކަތްވެސް މިހާރު ވަނީ އެއްކޮށް ނިންމާލާފައެވެ. މި މަޝްރޫޢުގެ ދަށުން އެ ސަރަޙައްދުތަކުގައި ކުރިން އަޅާފައިވާ ތާރުގަނޑު ނަގައި، އަޑީގެ އެންމެހައި ނެޓްވޯކްތައް ވަނީ އަލުން ތަރުތީބުކޮށްފައެވެ.

ތާރު އެޅުމުގެ މަސައްކަތް ނިމިފައިވާއިރު، މިހާރު ކުރިއަށްދަނީ މަގުމަތީގެ ނިޝާންތައް ކުރެހުމާއި ފިނިޝިންގގެ އެންމެ ފަހުގެ މަސައްކަތްތަކެވެ. މިނިސްޓްރީން މަޢުލޫމާތު ދެއްވި ގޮތުގައި، ހުރިހާ މަސައްކަތެއް ފުރިހަމަކޮށް އާދިއްތަ ދުވަހު އެ ސަރަޙައްދު ދަތުރުފަތުރަށް ހުޅުވާލެވޭނެއެވެ.

މި ބައި ނިމުމާއެކު ދެން ފެށުމަށް ހަމަޖެހިފައިވަނީ ސެގްމަންޓް 3 ގެ މަސައްކަތެވެ. މި ސެގްމަންޓުގައި ހިމެނެނީ އިއްޒުއްދީން މަގާ ހަމައިން ފެށިގެން ކޯރުކެނޑި ހިނގުމާ ދެމެދު އޮންނަ ސަރަޙައްދެވެ.

އަމީނީ މަގުގެ މާފަންނު ފަޅި މަރާމާތުކުރަން ޖެހުނީ، އެ ސަރަޙައްދުގެ ތާރުގަނޑު ވަރަށް ބޮޑަށް ހަލާކުވެ ވަޅުގަނޑުތައް ހެދި، އުޅަނދުތައް ދުއްވުމަށް ބޮޑެތި ދަތިތަކާ ކުރިމަތިލާން ޖެހުމުންނެވެ. މި ސަރަޙައްދަކީ ޢާންމު ދަތުރުފަތުރުގެ ބަސްތަކާއި ބޮޑެތި އުޅަނދުތައް (ހެވީ ވެހިކަލް) ގިނަ ޢަދަދަކަށް ބޭނުންކުރާ މުހިންމު މަގުބައެކެވެ.
މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން، މާލޭގެ ހުޅަނގު ފަރާތު ބޭރުމަގު ތަރައްޤީކުރުމުގެ ޢަމަލީ މަސައްކަތް ފެށުމަށްވެސް މިހާރު އަންނަނީ ތައްޔާރުވަމުންނެވެ. އެގޮތުން ފެންހިންދާ ނިޒާމުގެ މަސައްކަތްތަކަށްޓަކައި ވެސްޓް ޕާކް ސަރަޙައްދުން ބައެއް މިހާރު ވަނީ ބަންދުކޮށްފައެވެ.
ބޮޑުތަކުރުފާނު މަގުގައި ތާރުއަޅައިގެން ތަރައްޤީކުރުމުގެ މަޝްރޫޢުގެ ދަށުން، ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް އޮތް ސަރަޙައްދުގެ މަސައްކަތް މިހާރު ވަނީ މުޅިން ނިންމާލާފައެވެ. މިއާއެކު، އެ ސަރަޙައްދުގެ ޓްރެފިކް ތޮއްޖެހުމަށް ބޮޑު ލުޔެއް ލިބި، ދަތުރުފަތުރަށް ވަނީ ބޮޑެތި ފަސޭހަތަކެއް ލިބިގެން ގޮސްފައެވެ.