ޓްރެފިކް ޤަވާއިދުތަކާ ތަކުރާރުކޮށް ޚިލާފުވާ ފަރާތްތަކާމެދު ހަރުކަށި ފިޔަވަޅު އަޅަނީ

މަގުމަތީގެ އުސޫލުތަކާއި ޓްރެފިކް ޤާނޫނާއި ޤަވާއިދުތަކަށް ތަކުރާރުކޮށް ޚިލާފުވާ ފަރާތްތަކާމެދު ޚާއްސަ ހަރުކަށި ފިޔަވަޅުތަކެއް އަޅަމުންދާނެކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވެއްޖެއެވެ.

ކޮމިޝަނަރ އޮފް ޕޮލިސް މިހެން ވިދާޅުވީ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކާ ތަކުރާރުކޮށް ޚިލާފުވާ ފަރާތްތަކާމެދު ފިޔަވަޅު އެޅުމާ ގުޅޭގޮތުން ދެއްވި ޚާއްސަ މެސެޖެއްގައެވެ.

ސީޕީގެ މެސެޖުގައި ފާހަގަކުރައްވާފައިވާ ގޮތުގައި، ޓްރެފިކްގެ އާއްމު އުސޫލުތަކަށާއި އަދަބުތަކަށް ބޯނުލަނބާ މަދު ބައެއްގެ ސަބަބުން، ގިނަ ރައްޔިތުންތަކެއްގެ ޙައްޤުތައް ގެއްލި، ނުރައްކާތެރި އެކި ހާދިސާތައް ދަނީ ހިނގަމުންނެވެ. އެހެންކަމުން އެފަދަ ޒިންމާދާރުކަން ކުޑަ އަމަލުތައް ހިންގާ ފަރާތްތަކާމެދު ފަސްޖެހުމެއްނެތި ހަރުކަށި ފިޔަވަޅު އަޅުއްވާނެ ކަމަށާއި، އެފަދަ ފަރާތްތައް ދެނެގަނެ ފިޔަވަޅު އެޅުމަށް ކަމާބެހޭ އިދާރާތަކަށް މިހާރު އަންގަވާފައިވާނެ ކަމަށްވެސް ސީޕީ ވިދާޅުވިއެވެ.

މިފަދަ ޚާއްސަ ފިޔަވަޅުތަކެއް އެޅުމުގެ މައިގަނޑު މަޤްޞަދަކީ ރާއްޖޭގެ މަގުތަކަކީ އެންމެހާ ރައްޔިތުންނަށް އަމާން އަދި ރައްކާތެރި ތަނަކަށް ހެދުމާއި، މަގުމަތީގައި ހިނގާ ނުރައްކާތެރި ހާދިސާތައް ހުއްޓުވުން ކަމަށް ސީޕީ ފާހަގަކުރެއްވިއެވެ. މި ފިޔަވަޅުތައް ތަންފީޒުކުރަމުން ގެންދާނީ ކަމާގުޅުންހުރި އެންމެހާ މުއައްސަސާތަކާއި އިދާރާތައް ގުޅިގެންނެވެ. އަދި ހަމައެކަނި މާލެ ސަރަހައްދުގައި ނޫން ކަމަށާއި، އަތޮޅުތެރޭގެ އެކި ރަށްރަށުގައި ވެސް މި އުސޫލުން ފިޔަވަޅުތައް އަޅަމުން ގެންދާނެ ކަމަށް އެމަނިކުފާނު ވިދާޅުވިއެވެ.

މީގެއިތުރުން، މަގުމަތީގެ އަމާންކަން ޤާއިމުކުރުމަށްޓަކައި ދިވެހި ފުލުހުންގެ ޚިދުމަތުން ކުރަމުންދާ މިފަދަ މުހިންމު މަސައްކަތްތަކަށް އެންމެހާ ރައްޔިތުންނާއި ފަރާތްތަކުން ފުރިހަމަ އެއްބާރުލުން ދެއްވުމަށް ކޮމިޝަނަރ އޮފް ޕޮލިސް ވަނީ އިލްތިމާސްކުރައްވާފައެވެ.

ޤަވާޢިދާ ޚިލާފުވާ ފަރާތްތަކާމެދު ހަރުކަށި ފިޔަވަޅު އަޅުއްވާނެކަން ސީޕީ ހާމަކުރައްވާފައި މިވަނީ، މިފަހަކަށް އައިސް މާލެއާއި ހުޅުމާލެ ހިމެނޭހެން މާލެ ސަރަޙައްދުގައި ނުރައްކާތެރި އެކްސިޑެންޓްތަކެއް ހިނގައި، އެކި ފަރާތްތަކަށް ބޮޑެތި އަނިޔާތަކެއް ލިބުމުގެ އިތުރުން ބައެއް ފަރާތްތަކުގެ އަގުހުރި ފުރާނަ ގެއްލިފައިވާ ދަނޑިވަޅެއްގައެވެ.