ސިޔާސީ ވާދަވެރިކަމުގައި ރައްޔިތުންގެ ޙައްޤުތައް މަޑުޖެހިގެން ނުވާނެ، ސިޔާސީވާންވެސް ޖެހެނީ ވަކި ވަރަކަށް: މެންބަރު އިއްބެ

ސިޔާސީ ވާދަވެރިކަމުގެ ސަބަބުން ދިވެހި ރައްޔިތުންނަށް ލިބިދޭންޖެހޭ ޙައްޤުތަކާއި ފައިދާތައް މަޑުޖެހިގެން ނުވާނެ ކަމަށާއި، މި ސަރުކާރުންވެސް ރައްޔިތުންނަށް ފައިދާހުރި ކަމެއް ކުރާނަމަ އެކަން އިދިކޮޅުފަރާތްތަކުން ބަލައިގަންނަން ޖެހޭނެ ކަމަށް ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާގެ މެންބަރު އިބްރާހީމް ޙުސައިން (އިއްބެ) ވިދާޅުވެއްޖެއެވެ.

މެންބަރު އިއްބެ މިހެން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ ރަސްމާލެ މަޝްރޫޢު ތަރައްޤީކުރުމަށް، ދުބާއީގެ އީގަލް ހިލްސް ކުންފުންޏަށް  ދިނުމަށް ނިންމާފައިވާ ނިންމުމާ ގުޅިގެން އިދިކޮޅު ފަރާތްތަކުން ފާޑުކިޔަމުންދާ ދަނޑިވަޅެއްގައެވެ. މި މައްސަލައިގައި އިދިކޮޅު ފަރާތްތަކުން ވަނީ 99 އަހަރަކީ ނިމުމެއް ނެތް މުއްދަތެއްގެ ގޮތުގައި ސިފަކޮށް، ސުޕްރީމް ކޯޓަށާއި އެންޓި-ކޮރަޕްޝަނަށް ހުށަހަޅައި، ތަކުރާރުކޮށް ސަރުކާރަށް ފާޑުކިޔަމުންނެވެ.

އެގޮތުން އިދިކޮޅުން ސުޕްރީމް ކޯޓަށް ހުށަހެޅުއްވި މައްސަލައިގައި ބުނެފައި ވަނީ ރަސްމާލޭގެ ބިމުން 500 ހެކްޓަރު އީގަލް ހިލްސް ކުންފުންޏަށް 99 އަހަރަށް ދޭން ސަރުކާރުން ނިންމާފައި ވަނީ ގާނޫނުއަސާސީގެ 250 ވަނަ މާއްދާއާ ހިލާފަށް ކަމަށެވެ.

މިކަމާއި ގުޅިގެން ސަންގު ޓީވީގެ "ޚަބަރަށްފަހު" ޕްރޮގްރާމްގައި ވާހަކަދައްކަވަމުން މެންބަރު އިއްބެ ވިދާޅުވީ، ދިވެހި ރައްޔިތުންގެ ލާބަޔާއި މަންފާއަށް ކަމެއް ހިނގާނަމަ އެކަން ބަލައިގަތުމަކީ މުހިންމު ކަމެއް ކަމަށާއި އިދިކޮޅު ފަރާތްތަކުން ސިޔާސީވާންވެސް ޖެހޭނީ ވަކި ވަރަކަށް ކަމަށެވެ. 

އިދިކޮޅު ފަރާތްތަކުގެ މި ތުހުމަތުތަކަށް ރައްދު ދެއްވަމުން މެންބަރު އިއްބެ ވިދާޅުވީ، ރާއްޖޭގެ ބިމެއް 99 އަހަރަށް މިގޮތަށް ކުއްޔަށްދީފައިވަނީ އަލަށް ނޫން ކަމަށާއި، މިހާރުވެސް އެތައް އަހަރަކަށް ކުއްޔަށް ދީފައިވާ ގިނަ އަދަދެއްގެ ރިސޯޓުތައް ރާއްޖޭގައި އެބަހުރި ކަމަށެވެ.

އަދި ބޭރުގެ ބޮޑެތި އިންވެސްޓްމަންޓްތައް ރާއްޖެއަށް ގެނައުމަކީ ފަސޭހަކަމެއް ނޫން ކަމަށާއި، ދުނިޔޭގެ ފެންވަރުގެ ބޮޑު ކުންފުންޏަކުން ރާއްޖެއާމެދު ޝައުޤުވެރިކަން އުފެއްދުމަކީ ވަރަށް މަސައްކަތުން ކުރެވޭ ކަމެއް ކަމަށާއި އެކަން ބަަލައިގަތުން މުހިއްމު ކަމަށެވެ.

"މިފަދަ ބޮޑެތި މަޝްރޫޢުތަކުގެ ސަބަބުން ލިބިގެންދާ ފައިދާއަކީ ޤައުމަށާއި ދިވެހި ރައްޔިތުންނަށް ލިބިގެންދާނެ ބޮޑު ކުރިއެރުމެއް. މިފަދަ އަގުހުރި ފުރުޞަތުތައް ދޫކޮށްލުމަކީ އެދެވިގެންވާ ކަމެއް ނޫން"  މެންބަރު އިއްބެ ވިދާޅުވިއެވެ. 

މެންބަރު އިއްބެ އިތުރަށް ފާހަގަކުރެއްވި ގޮތުގައި، ސިޔާސީ ޕާޓީތަކުގެ މެދުގައި އޮންނަ ވާދަވެރިކަމުގެ ސަބަބުން، ރައްޔިތުންނަށް ލިބެންޖެހޭ ފައިދާތައް ހޯދައިދިނުމުގައި ސަރުކާރާ ގުޅިގެން މަސައްކަތް ކުރުމުގެ އެއްވެސް ވިސްނުމެއް އިދިކޮޅު ފަރާތްތަކުގެ ނެތްކަމަށެވެ.

"ސިޔާސީ ވާދަވެރިކަން އޮތް ނަމަވެސް، ޤައުމީ ކަންކަމުގައި ސިޔާސީވާން ވާނީ ވަކި ވަރަކަށް" މެންބަރު އިއްބެ ވިދާޅުވިއެވެ.

ރަސްމާލޭގައި މެރީނާއެއް ތަރައްގީކޮށް ހިންގުމަށް ސަރުކާރުން ވަނީ ޔޫއޭއީގެ މަޝްހޫރު ކުންފުންޏެއް ކަމަށްވާ އީގަލް ހިލްސްއާއެކު 20 ބިލިއަން ޑޮލަރުގެ ބޮޑު އެއްބަސްވުމެއްގައި ސޮއިކޮށްފައެވެ. އީގަލް ހިލްސްއަކީ ދުނިޔޭގެ 18 އަށް ވުރެ ގިނަ ގައުމުގައި އިންވެސްޓްކޮށްފައިވާ އަދި 45 ހޮޓަލުގެ ޕޯޓްފޯލިއޯއެއް އޮންނަ، އެންމެ މަތީ ފެންވަރުގެ މިކްސްޑް-ޔޫސް މަޝްރޫއުތައް ހިންގާ ދުނިޔޭގެ ފެންވަރުގެ ކުންފުންޏެކެވެ.

ރާއްޖޭގެ މުޅި ޖީޑީޕީ ގާތްގަނޑަކަށް 8 ބިލިއަން ޑޮލަރުގައި ހުރިއިރު، މި މަޝްރޫއުގެ އިންވެސްޓްމެންޓަކީ ރާއްޖޭގެ ޖީޑީޕީއަށްވުރެ ދެ ގުނަ ބޮޑު އަދަދެކެވެ. ރަސްމާލޭން ހިއްކާ 500 ހެކްޓަރުގެ ތެރޭގައި މި މަޝްރޫއު ކުރިއަށް ގެންދިޔަ ނަމަވެސް، ރައްޔިތުންނަށް ދިނުމަށް ކަނޑައަޅާފައިވާ ގޯއްޗާއި ފްލެޓުގެ އަދަދަށް އެއްވެސް ބަދަލެއް ނާންނާނެ ކަމަށް ހައުސިން މިނިސްޓްރީން ވަނީ ކަށަވަރުކޮށްދީފައެވެ.