މޯލްޑިވިއަންގެ މުވައްޒަފުންގެ ހައުސިންގ މަޝްރޫޢަށް ދެ ބިމެއް ހަވާލުކޮށްފި
ޤައުމީ އެއާލައިން، މޯލްޑިވިއަންގެ މުވައްޒަފުންނަށް ޚާއްޞަކޮށްގެން ހިންގުމަށް ހަމަޖެހިފައިވާ ހައުސިންގ މަޝްރޫޢަށް ދެ ބިމެއް ހަވާލުކޮށްފިއެވެ.
މިކަން ހާމަކުރެއްވީ މޯލްޑިވިއަން ސީޕްލޭންގެ އައު ޓާމިނަލް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން، ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން އެވެ.
ވަޒީރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމާޒަކީ ކުންފުނީގެ އެސެޓްތައް އިތުރުކުރުމުގެ އިތުރުން، މުވައްޒަފުންނަށް ފުރިހަމަ ފުރުޞަތުތަކެއް ފަހިކޮށްދޭ ތަނަކަށް މޯލްޑިވިއަން ހެއްދެވުން ކަމަށެވެ. އެގޮތުން، މުވައްޒަފުންގެ ބޯހިޔާވަހިކަމަށް ޚާއްޞަ މަޝްރޫޢެއް ކުރިއަށް ގެންދިއުމަށް މިހާރު ދެ ބިމެއް ހަވާލުކުރެވިފައިވާ ކަމަށާއި، ވަރަށް އަވަހަށް މި މަޝްރޫޢުގެ ޢަމަލީ މަސައްކަތް ފެށިގެންދާނެ ކަމަށް ވަޒީރު ވިދާޅުވިއެވެ.
މީގެއިތުރުން، މީގެކުރިން އެކި ތަންތަން ކުއްޔަށް ހިފައިގެން ދަތި ހާލުގައި ކުންފުނި ހިންގަމުން އައި އައުމަށް ނިމުމެއް ގެނައުމަށްޓަކައި ސަރުކާރުން ފަށާފައިވާ މަސައްކަތްތަކުގެ ދަށުން، މޯލްޑިވިއަންގެ އަމިއްލަ ޚާއްޞަ އިމާރާތުގެ މަސައްކަތްވެސް މިހާރު ނިމެމުންދާކަން ވަޒީރު އަމީން ފާހަގަކުރެއްވިއެވެ.
ރިއެކްޝަންސް
