މިއަދު އެއްވާން އުޅޭކަން ނާންގާ: ފުލުހުން
މިއަދު މާލޭގައި ބޭއްވުމަށް ރާވަމުންދާ އެއްވުމަކީ އެއްވެސް ހުއްދައެއް ނުނަގައި އަދި އެއްވެސް މައުލޫމާތެއް ހިއްސާނުކޮށް ބާއްވަން އުޅޭ އެއްވުމެއް ކަމަށް ދިވެހި ފުލުހުން މިއަދު ބުނެފިއެވެ.
ފުލުހުން މިފަދައިން ބުނެފައިވާއިރު މިއަދު ހަވީރު މާލޭގައި އެއްވުމެއް ބޭއްވުމަށް ރާވަމުންދަނީ ސަރުކާރާ ދެކޮޅު ފަރާތްތަކުންނެވެ.
ފުލުހުން މިއަދު ނެރުނު ނޫސްބަޔާނުގައި ބުނީ މިއަދު ބޭއްވުމަށް ރާވަމުންދާ އެއްވުމުގައި ބައިވެރިވާ ފަރާތްތަކުގެ ސަލާމަތާއި ރައްކާތެރިކަމާއި އާންމު ދަތުރުފަތުރާއި ހިނގާބިނގާވެ އުޅޭ ފަރާތްތަކަށް ދިމާވެދާނެ ދަތިތަކާ ގުޅޭގޮތުން އެއްވެސް ފަރާތަކުން ފުލުހުންނަށް މިހާތަނަށް އެއްވެސް މައުލޫމާތެއް ހިއްސާކޮށްފައި ނުވާ ކަމަށެވެ.
އެހެންކަމުން ކުރިން އެންގުމަކާ ނުލައި އެއްވުމަށް ހުއްދަކޮށްފައިވާ ތަންތަން ފިޔަވައި އެހެން ތަންތަނަށް އެއްނުވުމަށާއި އެ އެއްވުން ޤާނޫނީ އިމުގެ ތެރެއިން ބޭއްވުމަށް އެއްވުން އިންތިޒާމުކުރާ ފަރާތްތަކަށް ފުލުހުން ވަނީ އަންގައިފައެވެ.
މީގެއިތުރުން މިފަދަ އެއްވުންތަކުގެ ސަބަބުން އާންމު ދަތުރުފަތުރަށާއި ހިނގާބިނގާވެ އުޅޭ ފަރާތްތަކަށް ދަތިތަކާ ކުރިމަތިލާން ޖެހިދާނެތީ އެއްވެސް ފަރާތަކަށް ދަތި ނުވާނޭހެން ގާނޫނީ އިމުގެ ތެރެއިން ކަންކަން އިންތިޒާމު ކުރުމަށް ފުލުހުން ވަނީ ނަސޭހަތްތެރިވެފައެވެ. އަދި އެ އެއްވުމުގައި ޤާނޫނާއި ޤަވާޢިދާ ޚިލާފަށް ހިންގާ އަމަލުތައް ވަގުތުން ހުއްޓުވައި ފިޔަވަޅު އަޅާނެ ކަމަށްވެސް ފުލުހުންގެ ބަޔާނުގައިވެއެވެ.
ރިއެކްޝަންސް
