ލަންކާއަށް އެތެރެކުރާ ވަޅޯމަހުގެ ޑިއުޓީ ބޮޑުތަނުން ކުޑަކޮށްފި

ސްރީލަންކާއަށް އެތެރެކުރާ ވަޅޯމަހުން ނަގާ ޑިއުޓީ ބޮޑުތަނުން ކުޑަކޮށް، ކިލޯއަކަށް ނަގާ އަގު 302 ރުޕީސް އިން 10 ރުޕީސްއަށް ދަށްކޮށްފިއެވެ. މިއީ ދިވެހިރާއްޖޭގެ މަސް އުފައްދާ ފަރާތްތަކަށާއި، މަހުގެ ބާވަތްތައް އެކްސްޕޯޓްކުރާ ވިޔަފާރިވެރިންނަށް ލިބިގެންދިޔަ ވަރަށް ބޮޑު ހިތްވަރަކާއި އައު ފުރުސަތުތަކެކެވެ.

މި ބަދަލު ރަސްމީކޮށް އިއުލާނުކުރެއްވީ އިއްޔެ ސްރީލަންކާގެ ޕާލިމެންޓަށް، އެ ގައުމުގެ ރައީސް އަދި ފިނޭންސް މިނިސްޓަރު އަނޫރާ ކުމާރާ ދިސާނާޔަކަ ހުށަހެޅުއްވި ބަޖެޓުގެ ތެރެއިންނެވެ. އަލުން ކަނޑައެޅުނު މި ލުއި ޑިއުޓީއަށް މިއަދުން ފެށިގެން ވަނީ އަމަލުކުރަން ފަށާފައެވެ. އަދި މިއީ ސްރީލަންކާގެ ކަސްޓަމްސް ކްލެސިފިކޭޝަންގެ ކަމާބެހޭ ބައިގެ ދަށުން އެތެރެކުރާ ހުރިހާ ވަޅޯމަހަކަށް ވެސް ހިނގާނެ އުސޫލެކެވެ.

މި އައު ނިންމުމުގެ ދަށުން، އެތެރެކުރާ ވަޅޯމަހުން ނަގާ "ސްޕެޝަލް ކޮމޮޑިޓީ ލެވީ" (ހާއްސަ މުދަލުގެ ޓެކްސް) ވަނީ ކިލޯއަކުން 292 ރުޕީސް ކުޑަކޮށްފައެވެ. މިއީ ކުރިން ނަގަމުން އައި އަދަދާ އަޅާބަލާއިރު 96.7 އިންސައްތައިގެ ބޮޑު ދަށްވުމެކެވެ. މި ލުއި ބަދަލަށް 31 ޑިސެމްބަރު 2027 ގެ ނިޔަލަށް އަމަލުކުރަމުން ގެންދާ ގޮތަށް ވަނީ ހަމަޖެހިފައެވެ.

ރާއްޖޭގެ ވަޅޯމަހަކީ ސްރީލަންކާގެ ރައްޔިތުންގެ މެދުގައި ވަރަށް ބޮޑު މަގުބޫލުކަމެއް އޮންނަ، އަދި އެ ގައުމުގެ ސަގާފީ ކެއުންތައް ކަމަށްވާ ސަމްބޯލް އަދި ރިހަ ފަދަ ތަކެތި ތައްޔާރުކުރުމަށް އާންމުކޮށް ބޭނުންކުރާ މުހިންމު ބާވަތެކެވެ. މި ގެނެވުނު ލުޔާއެކު ލަންކާއަށް މަސް އެތެރެކުރާ ފަރާތްތަކަށް ހޭދަވާ ހަރަދު ވަރަށް ބޮޑަށް ކުޑަވެގެންދާނެއެވެ. އެގޮތުން 1،000 ކިލޯގެ ވަޅޯމަސް އެތެރެކުރާ ފަރާތަކަށް ބަލާއިރު، ދައްކަންޖެހޭ ސްޕެޝަލް ކޮމޮޑިޓީ ލެވީ 302،000 ރުޕީސް އިން 10،000 ރުޕީސްއަށް މިހާރު ވަނީ ކުޑަވެފައެވެ.
މި ބަދަލުގެ ސަބަބުން ސްރީލަންކާގެ ބާޒާރުގައި ދިވެހިރާއްޖޭގެ ވަޅޯމަހުގެ އަގު ހެޔޮވެ، އެހެން ގައުމުތަކުގެ އުފެއްދުންތަކާ އަޅާބަލާއިރު ދިވެހި އުފެއްދުންތަކުގެ ވާދަވެރިކަން އިތުރުވެ، ދިވެހި މަސްވެރިންނަށާއި އެކްސްޕޯޓަރުންނަށް އިތުރު މާލީ މަންފާތަކެއް ލިބިގެންދާނެ ކަމަށް ވަނީ ބެލެވިފައެވެ.