މާލޭގެ އުތުރު ފަރާތު ޖެޓީތައް ތަރައްގީކުރުމުގެ މަސައްކަތް ފެށުމަށް ތައްޔާރުވެއްޖެ

މާލޭގެ އުތުރު ފަރާތު ބަނދަރު ބޭނުންކުރުމުގައި އާންމުންނަށާއި އުޅަނދުފަހަރަށް ދިމާވަމުންދާ ދަތިތަކަށް ދާއިމީ ހައްލެއް ހޯދައިދިނުމުގެ ގޮތުން، އެ ސަރަހައްދުގެ ޖެޓީތައް ތަރައްގީކުރުމުގެ މަސައްކަތް ފެށުމަށް މިނިސްޓްރީ އޮފް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމަންޓުން ނިންމައިފިއެވެ.

މި މަޝްރޫއުގެ ދަށުން ޖެޓީތައް ހެދުމުގެ އަމަލީ މަސައްކަތް ފެށުމަށްޓަކައި، މިނިސްޓްރީން ކުރި އިއުލާނެއްގައި ބުނެފައިވަނީ، މަސްވެރިންގެ ޕާކު ސަރަހައްދުން ފެށިގެން ނާދީ ގޯޅިއާ ހަމައަށް އަޅާފައިވާ އެންމެހާ އުޅަނދުފަހަރު 2 އޮކްޓޫބަރު 2026 ވާ ހުކުރު ދުވަހުގެ ރޭގަނޑު 11:00 ގެ ކުރިން އެ ސަރަހައްދުން ނަގައި ހުސްކުރަންޖެހޭނެ ކަމަށެވެ. އަދި ކަނޑައެޅިފައިވާ ތާރީހުގެ ފަހުން އެ ސަރަހައްދުގެ ފަޅުތެރެއިން ނުނަގާ ހުންނަ އުޅަނދުފަހަރުތައް، މިނިސްޓްރީގެ ފަރާތުން ނަގާނެ ކަމުގެ އިންޒާރުވެސް ވަނީ ދީފައެވެ.

މާލޭގެ އުތުރު ފަރާތު ބަނދަރަކީ ރާއްޖޭގެ އެކި އަތޮޅުތަކުން މާލެއަށް މުދަލާއި މީހުން އުފުލާ އޮޑިދޯނިފަހަރާއި، މާލެއާއި ވިލިމާލެ، ތިލަފުށި އަދި ގުޅީފަޅު ދެމެދު ދަތުރުކުރާ އުޅަނދުފަހަރު ބާރުބޮޑުކޮށް ބޭނުންކުރަމުންދާ މުހިންމު ސަރަހައްދެކެވެ.

އުތުރު ފަރާތު ބަނދަރުގެ ޖެޓީތައް ޒަމާނީ ފެންވަރަށް ތަރައްގީކުރުމުގެ މި މަސައްކަތަކީ، މާލޭގެ ބޮޑުތަކުރުފާނު މަގު އަލުން ތާރުއަޅާ ފުޅާކޮށް، އިގުތިސާދީ ގޮތުން މާލޭގެ އުތުރު ފަރާތު ސަރަހައްދު މުޅިން ބަދަލުކޮށްލުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ ބޮޑު މަޝްރޫއުގެ މުހިންމު ބައެކެވެ.

ސަރުކާރުން މިހާރުވެސް ވަނީ ބޮޑުތަކުރުފާނު މަގުގެ އުތުރު ފަރާތުގެ ބޮޑު ބައެއްގައި ތާރުއަޅައި ނިންމާފައެވެ. މީގެ އިތުރުން، ސުނާމީ ބިނާއިން ފެށިގެން އެމްޕީއެލްއާ ހަމައަށް މަގު ހެދުމުގެ މަސައްކަތް ކުރިއަށް ގެންދިއުމަށްޓަކައި، އޮކްޓޫބަރު 3 ގެ ކުރިން އެ ސަރަހައްދުގައި ހުރި ތަކެއްޗާއި އުޅަނދުތައް ނެގުމަށްވެސް މިނިސްޓްރީން ވަނީ އަންގާފައެވެ.