ރާއްޖޭގެ ތަރައްޤީގެ ދަތުރުގައި ޗައިނާއަކީ ސާބިތު ބައިވެރިއެއް: ރައީސް

ދިވެހިރާއްޖޭގެ ތަރައްޤީގެ ދަތުރުގައި ޗައިނާއަކީ މުހިންމު އަދި ސާބިތު ބައިވެރިއެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޗައިނާގެ 77 ވަނަ ޤައުމީ ދުވަހުގެ މުނާސަބަތުގައި ސޯޝަލް މީޑިއާ މެދުވެރިކުރައްވައި ފޮނުއްވެވި ތަހުނިޔާގެ މެސެޖުގައެވެ.

ރައީސުލްޖުމްހޫރިއްޔާގެ މެސެޖުގައި، ޗައިނާގެ ޤައުމީ ދުވަހުގެ ހެޔޮއެދުންތައް އެ ޤައުމުގެ ރައީސް ޝީ ޖިންޕިންގ އަށާއި، ސަރުކާރަށާއި އަދި އެކުވެރި ރައްޔިތުންނަށް ވަނީ އަރިސްކުރައްވާފައެވެ.

މި މެސެޖުގައި ރައީސް ފާހަގަކުރެއްވި ގޮތުގައި، ދިވެހިރާއްޖެއާއި ޗައިނާއާ ދެމެދު އޮތީ އެއް ޤައުމު އަނެއް ޤައުމަށް ކުރާ އިޙްތިރާމާއި އިތުބާރުގެ މައްޗަށް ބިނާވެފައިވާ ވަރުގަދަ އަދި ބަދަހި ރަޙުމަތްތެރިކަމުގެ ގުޅުމެކެވެ. އަދި ދެ ޤައުމުންވެސް ގެންގުޅެނީ ތަރައްޤީއާއި ފާގަތިކަމަށް އަމާޒުކުރެވިފައިވާ އެއްގޮތް ތަޞައްވުރެއް ކަމަށާއި، މި ގުޅުމުގެ ސަބަބުން ދެ ޤައުމުގެ ރައްޔިތުންނަށް މާނަހުރި އެތައް ފުރުޞަތުތަކެއް ފަހިވަމުންދާކަން އެމަނިކުފާނު ފާހަގަކުރެއްވިއެވެ.

މީގެއިތުރުން، ދެ ޤައުމުގެ ދެމެދުގައި ޤާއިމުކުރެވިފައިވާ އިސްތިރާޖީ ގުޅުން އިތުރަށް ހަރުދަނާކޮށް، އައު ހަރުފަތަކަށް ގެންދިއުމުގައި ދިވެހި ސަރުކާރު އަބަދުވެސް ސާބިތުކަމާއެކު ދެމިއޮންނާނެ ކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ. އަދި ދެ ޤައުމުގެ ރައްޔިތުންގެ މެދުގައި އޮތް ގާތް ގުޅުން ކުރިއަށް އޮތް ތަނުގައި އިތުރަށް ބަދަހިވެ، ޗައިނާއަށް މެދުކެނޑުމެއްނެތް ކުރިއެރުމާއި ފާގަތިކަމަށް އެމަނިކުފާނު އެދިވަޑައިގެންނެވިއެވެ.

ކޮންމެ އަހަރެއްގެވެސް އޮކްޓޫބަރު މަހުގެ 1 ވަނަ ދުވަހު ޗައިނާގެ ޤައުމީ ދުވަސް ފާހަގަކުރަނީ 1949 ވަނަ އަހަރު ޕީޕަލްސް ރިޕަބްލިކް އޮފް ޗައިނާ އުފެދުނު މުނާސަބަތާ ގުޅުވައިގެންނެވެ. އެއީ 23 އަހަރުގެ ދާޚިލީ ހަނގުރާމައަށްފަހު، ކުރީގެ ވެރިކަންކުރި ޗައިނީސް ނެޝަނަލިސްޓް ޕާޓީގެ މައްޗަށް ޗައިނީސް ކޮމިއުނިސްޓް ޕާޓީން ކާމިޔާބީ ހޯދި ތާރީޚީ ދުވަހެވެ.
ދިވެހިރާއްޖެއާއި ޗައިނާއާ ދެމެދު ރަސްމީކޮށް ސިޔާސީ ގުޅުން ޤާއިމުކުރެވުނީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހުއެވެ. މިއަހަރަކީ ދެ ޤައުމުގެ ސިޔާސީ ގުޅުމަށް 54 އަހަރު ފުރޭ ތާރީޚީ އަހަރެވެ.