ބޮގަރު ކައްކާ ވިޔަފާރި ކުރަމުންދިޔަ ދެ މީހަކު ލ.ގަމުން ހައްޔަރު ކޮށްފި

ބޮގަރު ކައްކާ ވިޔަފާރި ކިރަމުންދިޔަ ދެ މީހަކު ލ.ގަމުން ހައްޔަރު ކޮށްފި އެވެ. މައްސަލައިގައި ހައްޔަރުކުރީ 42 އަހަރުގެ ދިވެހި ފިރިހެނަކާއި, 57 އަހަރުގެ ދިވެހި ފިރިހެނެއް ކަމަށް ފުލުހުން ބުންޏެވެ.

އެދެމީހުން ހައްޔަރުކުރީ ލ.ގަމު ތުނޑިވިލެޖް ގޭގައި މަސްތުވާތަކެތި ގެންގުޅެ, ވިޔަފާރިކުރުމާއެކު ބޮގަރު ކައްކާ އޭގެ ވިޔަފާރިވެސް ކުރާކަމަށް ލިބުނު އިންޓެލިޖެންސް މައުލޫމާތަކާ ގުޅިގެން ހިންގި އޮޕަރޭޝަނެއްގައި ކަމަށް ފުލުހުން ބުންޏެވެ. އެމީހުން ހައްޔަރުކުރީ ކޯޓް އަމުރެއްގެ ދަށުން އެގެ ބަލާފާސްކުރުމަށްފަހު ކަމަށް ފުލުހުން ބުންޏެވެ. 

ފުލުހުން ބުނީ އެގޭ ތެރެއިން 24.42 ގްރާމް ހެރޮއިން ކަމަށް ޝައްކުކުރެވޭ މަސްތުވާ އެއްޗެއް ފެނުނު ކަމަށެވެ. އަދި ބޮގަރުކަމަށް ޝައްކުކުރެވޭ ދެ ރުނބަޔާއި, 5 ލީޓަރު ފުޅިއެއް ފެނުނު ކަމަށް ފުލުހުން ބުންޏެވެ. މީގެއިތުރުން ބޮގަރު ކައްކަން ބޭނުންކުރާ ސާމާނުވެސް އެގެއިން ފެނުނު ކަމަށް ދިވެހި ފުލުހުންގެ ޚިދުމަތުން ބުންޏެވެ. ފުލުހުން ބުނީ މައްސަލަ ތަހުގީގު ކުރަމުންދާ ކަމަށެވެ.