ސަރުކާރުގެ "މާލެ ޓެކްސީ" ޚިދުމަތް: ތަފާތު ތިން ސައިޒެއްގެ 150 ކާރާއެކު ދަތުރުތަކަށް އިންގިލާބީ ބަދަލެއް
މާލެ ސަރަހައްދުގައި ދިމާވެފައިވާ ޓެކްސީގެ ދަތިކަމަށް ދާއިމީ ހައްލެއް ހޯދައިދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އިސްނަގައިގެން ފަށާ "މާލެ ޓެކްސީ" ޚިދުމަތް ފެށުމުގެ ތައްޔާރީތައް ބާރަށް ކުރިއަށް އެބަދެއެވެ. މި ޚިދުމަތަކީ މާލޭގެ މަގުތަކުގެ ހާލަތާއި ރައްޔިތުންގެ ބޭނުންތަކަށް ބަލައި، ޚާއްސަ ދިރާސާއަކަށްފަހު ފަރުމާކުރެވިފައިވާ ޚިދުމަތެކެވެ.
މި ޚިދުމަތުގެ ފުރަތަމަ ބެޗުގެ ކާރުތައް ފެނުމާއެކު، މާލޭގެ ހަނި މަގުތަކުގައި ބޮޑެތި ކާރުތައް ދުއްވާނެ ގޮތަކާމެދު އާންމުންގެ މެދުގައި ސުވާލުތަކެއް އުފެދުނެވެ. ނަމަވެސް، ސަރުކާރުން ހާމަކޮށްފައިވާ ގޮތުގައި މި ޚިދުމަތް ފަރުމާކޮށްފައިވަނީ ތަފާތު ތިން ސައިޒެއްގެ ޖުމުލަ 150 ކާރު ހިމެނޭ ގޮތަށެވެ. މީގެ ތެރޭގައި ހިމެނެނީ:
ލޫމިން ސައިޒު (70 ކާރު): މިއީ މާލޭގެ އެތެރޭގެ ދަތުރުތަކަށް ޚާއްސަ އެންމެ ކުދި ސައިޒުގެ ކާރުތަކެވެ. ތިން ޕެސެންޖަރުންގެ ޖާގަ ހިމެނޭ މި ކާރުތަކަކީ މާލޭގެ ހަނި މަގުތަކުގައި ފަސޭހައިން ދުއްވޭނެ ގޮތަށް ފަރުމާކޮށްފައިވާ އުޅަނދުތަކެވެ. މި ކާރުތަކުގައި ކުދި ސައިޒުގެ ލަގެޖު އެރުވޭނެ ޖާގަ އޮވެއެވެ.
S05 ސައިޒު (60 ކާރު): މިއީ މެދު ސައިޒުގެ ކާރުތަކެވެ.
S07 ސައިޒު (20 ކާރު): މިއީ އެންމެ ތަނަވަސް ކާރުތަކެވެ.
S05 އަދި S07 މޮޑެލްގެ ކާރުތަކަކީ ޖުމުލަ 4 ޕެސެންޖަރުންނަށް ދަތުރުކުރެވޭ، ޖާގަ ތަނަވަސް އުޅަނދުތަކެވެ. މި ކާރުތަކުގެ ފަހަތު ޑިކީގެ އިތުރުން ކުރީކޮޅުގައިވާ ޓްރަންކްވެސް ލަގެޖު އެރުވުމަށް ބޭނުންކުރެވޭނެއެވެ. އެހެންކަމުން، މިއީ އެއާޕޯޓް ދަތުރުތަކަށާއި އާއިލީ ދަތުރުތަކަށް އެންމެ އެކަށީގެންވާ އުޅަނދުތަކެވެ.
މި ޚިދުމަތުގައި ބޭނުންކުރާ ހުރިހާ އުޅަނދަކީވެސް ތިމާވެއްޓާ ރައްޓެހި، އިލެކްޓްރިކް ވެހިކަލް (EV) ތަކެކެވެ. ބެޓެރި ހަކަތައިން ދުއްވާ މި ކާރުތަކަކީ އަޑުމަޑު، ދުއްވަން ފަސޭހަ އަދި ބެލެހެއްޓުމުގެ ޚަރަދު ކުޑަ އުޅަނދުތަކެކެވެ. ކާރުގެ އެތެރެ ފަރުމާކޮށްފައިވަނީ ފަސިންޖަރުންނަށް އަރާމު ގޮނޑިތަކަކާއެކު ހިތްފަސޭހަ މާހައުލެއް ލިބޭނެ ގޮތަށެވެ.
"މާލެ ޓެކްސީ" ޚިދުމަތް ހޯދުމަށް ޚާއްސަ އެޕްލިކޭޝަނެއް ބޭނުންކުރެވޭނެއެވެ. ސަރުކާރުގެ އަމާޒަކީ މި ޚިދުމަތަކީ ރާއްޖޭގެ ޓެކްސީ ޚިދުމަތުގެ ފެންވަރު މަތިކުރުމަށްޓަކައި ކަނޑައެޅޭ "ބެންޗްމާކް" އަކަށް ހެދުމެވެ. މިގޮތުން، ޚާއްސަ ތަމްރީނު ލިބިފައިވާ ޑްރައިވަރުންނާއެކު، އެއް ހަމައެއްގެ އަގުތަކެއްގައި އިތުބާރު ހުރި ޚިދުމަތެއް ރައްޔިތުންނަށް ފޯރުކޮށްދިނުމަކީ ސަރުކާރުގެ މައިގަނޑު މަގުސަދެވެ.
ރިއެކްޝަންސް
