ކޮންޓެންޓް ކްރިއޭޓަރުންނަށް ލުއި ލޯނު ދެނީ
ކޮންޓެންޓް ކްރިއޭޓަރުންނަށް ލުއި ލޯނު ދޭން ނިންމާ, އެކަމުގެ ފަންނީ މަސައްކަތްތައް ނިމުމަކާ ހަމައަށް ގޮސްފައިވާ ކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވީ ކޮންޓެންޓް ކްރިއޭޓަރުންނަށް ލުއި ލޯނު ދެނީ މެނިފެސްޓޯގައިވާ ވައުދު ފުއްދެވުމަށް ކަމަށެވެ. އެމަނިކުފާނު ވިދާޅުވީ މެނިފެސްޓޯ ގައިވާ ވަޢުދު ތަކުގެ ތެރެއިން ރާއްޖޭގެ ކޮންޓެންޓް ކްރިއޭޓަރުންނަށް ޚާއްސަކޮށްގެން ލުއިލޯނު ދިނުމުގެ ސްކީމެއް ހުޅުވާލުމަށް ކުރަންޖެހޭ ފަންނީ މަސައްކަތްތައް ނިމުމަކާ ހަމަޔަށް ގޮސްފައިވާ ކަމަށެވެ.
މި ލޯނު ސްކީމް ގެ މަޤްޞަދަކީ ކްރިއޭޓިވް އިކޮނޮމީގެ ދައުރު އިތުރަށް ފުޅާކޮށް، އެދާއިރާގައި އިތުރަށް ހަރަކާތްތެރިވުމުގެ ފުރުސަތު ދިވެހި ޒުވާނުންނަށް ފަހިކޮށްދިނުންކަމަށް ރައީސް ވިދާޅުވިއެވެ.
މީގެތެރޭގައި، މީޑިއާ ކޮންޓެންޓް، އޯޑިއޯ ވީޑިއޯ އިމޭޖް ޕްރޮޑަކްޝަން، އެންޓަރޓެއިންމަންޓްގެ އިތުރަށް ސޭލްސްއާއި މާކެޓިންއަށް ޚާއްސަ ކޮންޓެންޓްގެ ދާއިރާއަށް ފުރުސަތު ލިބޭގޮތަށް މި ސްކީމް ޑިޒައިންކޮށް، ކުރިޔަށް 2 ހަފްތާ ތެރޭގައި ހުޅުވާލަން ދަންނަވާފައިވާކަމަށް ރައީސް ވިދާޅުވިއެވެ.
މިފަދަ ނިންމެވުމެއް ތަންފީޒުކުރައްވާކަން ރައީސް މިއިއުލާނުކުރެއްވީ މިހާރު ރައްޔިތުންގެ މަޖިލިހުގައި އޮތް މީޑިޔާ ބިލުން ކޮންޓެންޓް ކްރިއޭޓަރުންނަށްވެސް ހުރަސް އެޅޭކަމަށް ނޫސްވެރިންގެ ޖަމްއިއްޔާ އާއި ބައެއް ކޮންޓެންޓް ކްރިއޭޓަރުންނާއި އިދިކޮޅު ފަރާތްތަކުންވެސް ބުނަމުން ދަނިކޮށެވެ.
ރިއެކްޝަންސް
