އަލީބާބާއާ ގުޅިގެން އޮންލައިން ވޯރކްޝޮޕެއް ބާއްވަނީ
އަލީބާބާ.ކޮމްގެ ޕްލެޓްފޯމްގައި މުދާ ވިއްކޭނެ ސެލާރ އެކައުންޓް ހުޅުވުމުގެ ފުރުޞަތު ލިބޭނެ
އަލީބާބާއާ ގުޅިގެން އެއް ދުވަހުގެ އޮންލައިން އޮންލައިން ވޯރކްޝޮޕެއް ބާއްވަން އިކޮނޮމިކް މިނިސްޓްރީން ނިންމައިފިއެވެ.
އިކޮނޮމިކް މިނިސްޓަރ މުޙައްމަދު ސައީދު މިއަދު ވިދާޅުވީ މިމަހުގެ 16 ވަނަ ދުވަހު ވާއްވާ ވޯކްޝޮޕްގައި މައުލޫމާތު ހިއްސާކުރާނީ މަޝްހޫރު އީކޮމާރސް ޕްލެޓްފޯމް އަލީބާބާ.ކމްގެ ތަޖުރިބާކާރުން ކަމަށެވެ. މިއީ މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް އާއި ދުނިޔޭގެ ނަންމަޝްހޫރު އީކޮމަރސް ޕްލެޓްފޯމްތަކާއެކު ކުރެވެމުންދާ މަސައްކަތްތަކުގެ ތެރެއިން ކުރިއަށްގެންދާ އޮންލައިން ވޯކްޝޮޕެއް ކަމަށް މިނިސްޓަރ ސައީދު ވިދާޅުވިއެވެ.
މިވޯކްޝޮޕް އަމާޒުކޮށްފައިވަނީ ރާއްޖޭގެ އީކޮމާރސް އަދި އޮންލައިން ވިޔަފާރިކުރާ އަދި އެކަމަށް ޝައުގުވެރިވާ ފަރާތްތަކަށެވެ.
އަލީބާބާ.ކޮމް އާއެކު ކުރެވުނު މަސައްކަތުގެ ސަބަބުން ދިވެހީންގެ ތެރޭގައި އޮންލައިން ވިޔަފާރިކުރަން ބޭނުންވާ ފަރާތްތަކަށް އަލީބާބާ.ކޮމްގެ ޕްލެޓްފޯމްގައި އެފަރާތްތަކުގެ މުދާ އޮންލައިންކޮށް ވިއްކޭނެ ގޮތަށް، ސެލާރ އެކައުންޓް ހުޅުވޭނެ ފުރުސަތު ފަހިވެގެންދާނެކަމަށްވެސް މިނިސްޓަރ ސައީދު ވިދާޅުވިއެވެ.
ވަޒީރު ވިދާޅުވީ މިއީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވަޢުދުފުޅެއް ކަމުގައިވާ ދުނިޔޭގައި އެންމެ ފުޅާ ދާއިރާއެއްގައި ބޭނުންކުރެވެމުންދާ އީކޮމާރސް ޕްލެޓްފޯމްތަކުގައި ދިވެހީންނަށް ސެލަރ އެކައުންޓްސް ހުޅުވޭނެގޮތް ހަދައިދީ، އެ ޕްލެޓްފޯމްތަކުގައި އޮންލައިން ވިޔަފާރި ކުރެވޭނެގޮތް ހަމަޖައްސަވައިދެއްވުމަށް، ވެވަޑައިގެންނެވި ވަޢުދު ފުއްދެވުމުގެ މަސައްކަތްކުރުމުގެ ތެރެއިން ކުރެވޭ މުހިއްމު މަސައްކަތެއް ކަމަށެވެ.
ރިއެކްޝަންސް
