މާދަމާ ސަރުކާރު ބަންދު
ސަރުކާރު ބަންދުކުރީ ވިއްސާރައިގެ ސަބަބުން
ރާއްޖެއަށް މިހާރު ކުރަމުންދާ ވިއްސާރައާއި ގުޅިގެން މާދަމާސަރުކާރު ބަންދު ކުރަން ރައީސުލްޖުމްހޫރިއްޔާ ހަމަޖައްސަވައިފިއެވެ.
މާދަމާ ސަރުކާރު ބަންދު ދުވަހެއްކަމުގައި ރައީސުލްޖުމްހޫރިއްޔާ މި ހަމަޖެއްސެވީ، ރާއްޖޭގެ ވަރަށް ގިނަ ރަށްތަކަށް ބޯކޮށް ވާރޭވެހި މޫސުން ގޯސްވުމުގެ ސަބަބުން، ކިޔަވާ ކުދީންނާ ވަޒީފާ އަދާކުރާ ފަރާތްތަކަށްވެސް ދަތުރުފަތުރުކުރުމާ ހިނގާބިނގާވާން ދަތިވުމާއި ގުޅިގެން ދެއްވާ ލުޔެއްގެ ގޮތުގައި ކަމަށް ތަރުޖަމާނު ހީނާ ވަލީދު ވިދާޅުވިއެވެ.
މިހާރު ކުރަމުންދާ ވިއްސާރައިގާ ގޯތިގެދޮރަށާ ޢާއިލާތަކަށް ލިބޭ ގެއްލުން ކުޑަކޮށްދިނުމަށާ، ރައްޔިތުންނަށް އެހީތެރިކަން ފޯރުކޮށްދިނުމަށް، ސަރުކާރުން ޚާއްޞަ އިސްކަމެއްދީގެން ރޭގަނޑާއި ދުވާލު މަސައްކަތްކުރަމުން ގެންދަވާނެކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވައިފައެވެ.
މާލޭގެ އިތުރުން އެހެން ރަށްތަކަށްވެސް މެދުނުކެނޑި ބޯކޮށް ވާރޭ ވެހެމުންދާތީ ޢާއްމު ދިރިއުޅުމަށް ވަނީ ދަތިވެފައެވެ. އަދި ގޭގެއަށާއި, ވިޔަފާރިތަކަށް ފެންވަދެ އެކިވަރުގެ ގެއްލުން ދަނީ ލިބެމުންނެވެ. މާލޭގެ މަގުތަކުގައިވެސް ވަނި ކަކުލުން މައްޗަށް ފެންބޮޑުވެފައެވެ.
މިއަދު ވެސް މެންދުރުފަހު ދަންފަޅީގައި ސްކޫލްތަކުގެ ކިޔެވުން ބަންދު ނުކުރުމުން ބައެއް ފަރާތްތަކުން ވަނީ ނުރުހުންވެސް ފާޅުކޮށްފައެވެ. މާލެއަށް ބޯކޮށް ވާރޭ ވެހެން ފެށީ މެންދުރު ވަނިކޮށެވެ.
ރިއެކްޝަންސް
