ލީކުވި އިޒްރާއިލްގެ އިންޓެލިޖެންސް ރިޕޯޓް ބުނާގޮތުން ޣައްޒާގައި މަރާލި %83 މީހުންނަކީ އާންމުން
މިއީ ފަހުގެ ތާރީހެއްގައި ހަމަނުޖެހުންތަކުގައި އާންމުންގެ މިހާ ގިނަ ބަޔަކު މަރާލި ފަހަރު
އިޒްރާއިލްގެ އަސްކަރިއްޔާގެ ޑޭޓާބޭސްއިން އެކުކަވާލާފައިވާ އިންޓެލިޖެންސް ރިޕޯޓެއް ލީކުވެފައިވާއިރު ޔަހޫދީ ސިފައިން ޣައްޒާގައި މެރި މީހުންގެ 83 އިންސައްތައަކީ އާންމުންކަން ހާމެއްޖެއެވެ. ރިޕޯޓާ ގުޅިގެން ދި ގާޑިއަން އާއި 972+ މެގަޒިން އަދި ލޯކަލް ކޯލް އިން ވަނީ ތަހްޤީގެއް ކޮށްފައެވެ.
އެ ތަޙްޤީގަށް ހާމަވެފައިވާ އަދަދުތައް އިއްޔެ އާންމުކޮށްފައިވާއިރު އިޒްރާއިލްއިން މަރާލި ފަލަޞްޠީނުގެ މުޖާހިދުންގެ ޖަމާއަތްތައް ކަމަށްވާ ހަމާސް އާއި އިސްލާމިކް ޖިހާދަށް ނިސްބަތްވާ ފަރާތްތަކުގެ ޖުމްލައަކީ 8,900 އެވެ. މިއީ ސިދާ އިޒްރާއިލްގެ އަސްކަރިއްޔާގެ އިންޓެލިޖެންސުން ހާމަވެފައިވާ އަދަދެވެ. އަދަދުތައް ހިމަނާފައިވަނީ ފާއިތުވި މެއި މަހުގެ ނިޔަލަށެވެ.
އެމުއްދަތުގެ ޣައްޒާގެ ހެލްތު މިނިސްޓްރީން ރެކޯޑްކޮށްފައިވާ މަރުގެ އަދަދަކީ 53,000 ހެވެ. މާނައަކީ ހަމަލާތަކުގައި ދުނިޔެދޫކުރިމުޖާހިދުންގެ އިންސައްތައަކީ 17 ކަމެވެ. އަދި ބާކީ 83 އިންސައްތައަކީ އާންމުންކަމެވެ.
ދިރާސާކުރާ ފަރާތްތަކުން ބުނި ގޮތުގައި މި ރޭޝިއޯއަކީ ފަހު ތާރީހެއްގައި ހިންގި ހަމަނުޖެހުމެއް/ހަނގުރާމައެއްގައި އެންމެ ގިނަ އާންމުން މަރާލި ފަހަރު ކަމުގައެވެެ.
މިހާ ގިނަ އަދަދެއްގެ އާންމުން މަރާފައި ވުމާއި ގަސްތުގައި ޣަައްޒާ ބަނޑަށް ޖައްސާފައިވާ ވުމަށް އިޝާރާތްކޮށް އިންސާނީ ހައްޤުތަކަށް ވަކާލާތުކުރާ ގްރޫޕްތަކާއި ޤަތުލްއާންމުގެ މުފައްކިރުން ދެކެވަޑައިގަންނަވާގޮތުގައި މި ޑޭޓާ ތަކަކީ އިޒްރާއިލްއިން ޣައްޒާގައި ޤައުލްއާންމެއް ހިންގަމުންދާކަމުގެ ފުރިހަމަ ހެއްކެކެވެ.
މި ރިޕޯޓް ލީކުވުމާ ގުޅިގެން އެ ރިޕޯޓް ތަޙްޤީގް ކުރި ފަރާތްތަކުން އިޒްރާއިލްގައި ކޮމެންޓަކަށް އެދުމުން އެފަދަ ރިޕޯޓެއް ނޯންނާނެކަމަށް އިޒްރާއިލް އިން ބުނެފައެއް ނުވެއެވެ. އަދި އަސްކަރިއްޔާގެ ތަރުޖަމާނު ވަނީ އެ އަދަދު މުޅިން ރަނގަޅު ނޫންކަމަށް ބުނެފައެވެ. ނަމަވެސް އޭގެ ތަފްޞީލް ދީފައި ނުވާކަމަށް އެނުސްތަކުން ބުނެފައި ވެއެވެ.
ރިއެކްޝަންސް
