ބާރު ސްޕީޑްގައި ނުރައްކާތެރިކޮށް ދުއްވި ކާރެއް ހުއްޓަން އެންގުމުން ފުލުހުންގެ ސައިކަލްގައި ޖައްސައިފި
ފުލުހަކަށް އަނިޔާވެ ފަރުވާދެނީ
ބާރު ސްޕީޑްގައި ނުރައްކާތެރިކޮށް ދުއްވި ކާރެއް ހުއްޓަން އެންގުމުން ފުލުހުންގެ ސައިކަލްގައި ޖެއްސި މައްސަލައެއްގައި މިރޭ ދެ މީހަކު ހައްޔަރުކޮށްފިއެވެ.
ހުޅުމާލޭގައި ހިނގި މިހާދިސާގައި ސައިކަލްގައި ތިބި ދެ ފުލުހުންގެ ތެރެއިން އެކަކަށް އަނިޔާވެ ހޮސްޕިޓަލްގައި ފަރުވާދެމުން ދާކަމަށް ދިވެހި ފުލުހުންގެ ޚިދުމަތުން ވިދާޅުވިއެވެ. އެކަމަކު ލިބުނީ ކިހާވަރެއްގެ އަނިޔާއެއް ކަމެއް ފުލުހުން ނުބުނެއެވެ. ކާރުން ސައިކަލްގައި ޖެއްސުމުން ސައިކަލް ވެއްޓި އަނިޔާވީ ކަމަށް ފުލުހުން ވިދާޅުވިއެވެ.
ފުލުހުން މަޑުކުރަން އެންގުމުންވެސް އެކާރު ބާރު ސްޕީޑްގައި ދުއްވީ ހުޅުމާލެ ފޭސް 1 އަދި 2 ގައެވެ. ހައްޔަރުކުރީ ކާރުގައި ތިބި ފިރިހެނަކާއި އަންހެނެކެވެ. އޭގެތެރެއިން ކާރު ދުއްވަން އިނީ ފިރިހެން މީހާކަމަށް ފުލުހުން ވިދާޅުވިއެވެ.
ފުލުހުން ގިނަ އިރުތަކެއްވެސް ވަންދެން ސީންގައި ހަރަކާތްތެރިވިއެވެ.
ރިއެކްޝަންސް
