މިނިވަން ދުވަހާ ގުޅިގެން އިތުރު ދުވަހެއް ބަންދުކޮށްފި

މިއަހަރުގެ މިނިވަން ދުވަހާ ގުޅިގެން އިތުރު ދުވަހެއް ބަންދުކޮށްފިއެވެ. މިނިވަން ދުވަހާ ގުޅިގެން ބަންދުކުރަން ރައީސުލްޖުމްހޫރިއްޔާ ނިންމެވީ ޖުލައި 28 ވާ ހޯމަ ދުވަހެވެ.

ޖުލައި 28 ވަނަ ދުވަސް ބަންދުކުރުމާ ގުޅިގެން ހަފްތާ ބަންދާއެކު ބަންދު 4 ދުވަސް ލިބޭނެއެވެ. އެއީ ޖުލައި 25 ވާ ހުކުރު ދުވަހާއެކުއެވެ.

މި އަހަރަކީ، ރާއްޖޭގެ މިނިވަންކަމަށް 60 އަހަރު ފުރޭ އަހަރެވެ. ހޯމަ ދުވަސް ބަންދުކުރި ސަބަބެއް ކަމަށް ރައީސް އޮފީހުން ވިދާޅުވީ މި އަހަރުގެ މިނިވަން ދުވަހާ ގުޅިގެން، ގިނަ ހަރަކާތްތަކެއް ބޭއްވުމަށް ހަމަޖެހިފައިވާތީއާއި، މިނިވަން ދުވަހުގެ މުނާސަބަތުގައި ބަންދުވާ ޖުލައި 27 ވާ އާދީއްތަ ދުވަހު ބާއްވާ ހަރަކާތްތަކުގެ އިތުރުން، ޖުލައި 28 ވާ ހޯމަ ދުވަހުގެ ޕުރޮގުރާމުގައިވެސް މުހިންމު ބައެއް ކަންކަން ހިމެނޭތީ ކަމަށެވެ.

މިނިވަން ދުވަހާ ގުޅިގެން އިތުރު ދުވަހެއް ބަންދުކުރިއިރު ނިމިގެން ދިޔަ ބޮޑު ޢީދާ ގުޅިގެން އިތުރު ދުވަހެއް ބަންދު ނުކުރުމުން ވަރަށް ގިނަ ބަޔަކު ސޯޝަލް މީޑިޔާގައި ހިތްހަމަނުޖެހުން ފާޅުކުރިއެވެ.