ސައްހަނޫން ސްލިޕް ފޮނުވައިގެން ތަކުރާރުކޮށް ވިޔަފާރިކުރި ޒައިދާން ހައްޔަރުކޮށްފި
މައްސަލައިގައި ބަނގްލަދޭޝްގެ އަންހެނެއްވެސް ހައްޔަރުކުރި
ސައްހަނޫން ޓްރާންސްފަރ ސްލިޕް ފޮނުވައިގެން ތަކުރާރުކޮށް ވިޔަފާރިކުރި ޒައިދާން މުޙައްމަދު ހާޝިލް ހައްޔަރުކޮށްފިއެވެ. ފުލުހުން މިއަދު ވިދާޅުވީ ޒައިދާންގެ އިތުރުން ބަނގްލަދޭޝްގެ އަފްރިން އަކްތަރު ވެސް އެމައްސަލާގައި ހައްޔަރުކޮށްފައިވާ ކަމަށެވެ.
އެދެމީހުން ހައްޔަރުކުރީ މިއަހަރުގެ މެއި މަހުގެ އެކި ދުވަސްމަތީން ހުޅުމާލޭގައި ހުންނަ ފިހާރައަކުން ސައްހަ ނޫން ސްލިޕްތަކެއް ފޮނުވައިގެން މުދާ ގަނެފައިވާ މައްސަލައިގައެވެ. އެއީ މެއި 16 ވަނަ ދުވަހު ފުލުހުންނަށް ހުށަހަޅާފައިވާ މައްސަލައެކެވެ.
ފުލުހުން ވިދާޅުވީ އެއިދާރާއިން ބެލިބެލުމުން ޒައިދާން މުޙައްމަދު ހާޝިމް، މާލޭގައި ހުންނަ އިތުރު ދެ ފިހާރައަކުން ވެސް ސައްހަ ނޫން ސްލިޕް ފޮނުވައިގެން މަކަރާއި ހީލަތުން މުދާ ހޯދާފައިވާކަން ތަހުގީގަށް އެނގިފައިވާ ކަމަށެވެ. އަދި އޭނާ ކުއްޔަށް ހިފާފައިވާ ހިޔާ ފްލެޓްގެ ދެ އެޕާޓްމަންޓަކަށް، ސައްހަ ނޫން ސްލިޕް ފޮނުވައިގެން ގަނެފައިވާކަމަށް ބެލެވޭ މުދާތައް ވައްދާ މަންޒަރު ސީސީޓީވީ ފުޓޭޖުން ފެނިފައިވާކަމަށްވެސް ފުލުހުން ވިދާޅުވިއެވެ. އެ އެޕާޓްމަންޓުތައް ބަލައި ފާސްކުރި އިރު، މައްސަލައިގެ ތަހުގީގާ ގުޅުންހުރި އެ ތަކެތި ފެނިފައިވާކަމަށްވެސް ފުލުހުން ވިދާޅުވިއެވެ.
ސައްހަ ނޫން ސްލިޕް ފޮނުވައިގެން 36,467 ރުފިޔާގެ ތަކެތި މަކަރާއި ހީލަތުން ހުޅުމާލޭގައި ހުންނަ ފިހާރައިން ހޯދާފައިވާކަމާއި މާލޭގައި ހުންނަ ފިހާރައަކުން ސައްހަ ނޫން ސްލިޕް ފޮނުވައިގެން 31,150 ރުފިޔާގެ ތަކެތީގެ އިތުރުން މާލޭގައި ހުންނަ އެހެން ފިހާރައަކަށް ސައްހަ ނޫން ސްލިޕް ފޮނުވައިގެން 5,817 ރުފިޔާގެ ތަކެތި ހޯދާފައިވާކަން ތަހުގީގަށް އެނގިފައިވާކަމަށް ފުލުހުން ވިދާޅުވިއެވެ.
ޒައިދާން މުޙައްމަދު ހާޝިމް މަކަރާއި ހީލަތުން ފައިސާއާއި މުދާ ހޯދާކަމަށް ތުހުމަތުކުރެވޭ 11 މައްސަލައެއްގެ ތަހުގީގު މިހާރު ވެސް ކުރެވެމުންދާކަމަށް ފުލުހުން ވިދާޅުވިއެވެ. އަދި އޭނާގެ މައްޗަށް ތުހުމަތުކުރެވޭ ދެ މައްސަލައެއްގެ ޝަރީއަތް މިހާރު ވެސް ކުރިއަށް ގެންދާކަމަށް ވިދާޅުވިއެވެ.
ރިއެކްޝަންސް
