ޙައްޖު އޮޕަރޭޝަންގެ އެންމެ ބޮޑު ކާމިޔާބީއަކީ ދިވެހި ޙައްޖާޖީންނަށް ޢަރަފާތް ފުރިހަމައަށް ލިބުން: ޑރ.ޝަހީމް
މިއަހަރުގެ ޙައްޖު އޮޕަރޭޝަންގެ އެންމެ ބޮޑު ކާމިޔާބީއަކީ ދިވެހި ޙައްޖާޖީންނަށް ޢަރަފާތުގެ އެންމެ ވަގުތުކޮޅެއްވެސް ނުގެއްލި ލިބުން ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ވަޒީރު މިފަދައިން ވިދާޅުވީ މިނާގައި ދިވެހި ޙައްޖާޖީން ތިބޭ ފޭލިގެއަށް ކުރެއްވި ޒިޔާރަތަށްފަހު ޕީއެސްއެމް ނިއުސްއަށް ދެއްވި އިންޓަވިއުއެއްގައެވެ.
ޙައްޖު ކޯޕަރޭޝަނުން މިކަމަށް ކުރި މަސައްކަތްތައް ވަޒީރު ފާހަގަކުރެއްވިއެވެ. އަދި މިއީ ވަރަށް ބޮޑު ކުރިއެރުމެއް ކަމަށާއި ކާމިޔާބީއެއް ކަމަށް ވިދާޅުވިއެވެ. ޢަރަފާތަކީ ޙައްޖުގެ އެންމެ މުހިންމު ރުކުން ކަމަށްވާތީ، މިކަމުގެ މުހިންމުކަން ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ ޙައްޖާޖީންގެ ތެރޭގައި ޢުމުރުން ދުވަސްވީ މީހުން ތިބިނަމަވެސް، އެމީހުންގެ ފަރާތުން އަޅުކަމަށް އޮތް އިޚްލާޞްތެރިކަމާއި ރޫޙު ފެނިފައިވާ ކަމަށެވެ. މިއީ މިފަދަ މަތިވެރި އަޅުކަމަކުން ފެންނަންޖެހޭނެ ކަންކަން ކަމަށްވެސް ވަޒީރު ވިދާޅުވިއެވެ.
ރިއެކްޝަންސް
