ކުރީ ސަރުކާރުގައި 8 ބިލިއަނެއްހާ ރުފިޔާ ޗާޕްކޮށްގެން ނެރުނު: ރައީސް
ވޭތުވެދިޔަ ފަސް އަހަރު އަށް ބިލިއަނެއްހައި ރުފިޔާ ދައުލަތުގެ ޚަރަދުތައް ހަމަޖެއްސުމުގެ ނަމުގައި ޗާޕްކޮށްގެން ނެރެފައިވާ ކަމަށް ރައީސް ވިދާޅުވެއްޖެ
ވޭތުވެދިޔަ ފަސް އަހަރު އަށް ބިލިއަނެއްހައި ރުފިޔާ ދައުލަތުގެ ޚަރަދުތައް ހަމަޖެއްސުމުގެ ނަމުގައި ޗާޕްކޮށްގެން ނެރެފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ބަޔާނުގައި ރައީސް ވިދާޅުވީ ދިވެހި ޤައުމުގެ ތަރައްޤީއާ ކުރިމަގަށް ސަރުކާރުން ކުރާ ތަޞައްވުރާ އުންމީދު ޙަޤީޤަތަކަށް ހެދޭނީ މާލީގޮތުން ޤައުމު ވެއްޓިފައި އޮތް އަޑިގަނޑުން ސަލާމަތްވެ، ހިންދެމިލައިގެން ކަމަށާއި ދިވެހިތާރީޚުގައި މީން ޒަމާނަކު ޤައުމު ނުދަރާވަރަށް އެމަނިކުފާނު ސަރުކާރާ ޙަވާލުވިއިރު ދައުލަތް އޮތީ ދަރާފައި ކަމަށެވެ.
އެގޮތުން ފާއިތުވި އަހަރުތަކުގައި ޑެފިސިޓް ފައިނޭންސްކުރަން ނަގާފައިވާ ދަރަނީގެ ސަބަބުން، 2023 ވަނަ އަހަރު ނިމުނުއިރު ޖީޑީޕީގެ ނިސްބަތުން ދައުލަތުގެ ދަރަނި ހުރީ 115.9 އިންސައްތައަށް އުފުލިފައި ކަން ރައީސް ހާމަކުރެއްވި އެވެ.
ވޭތުވެދިޔަ 5 އަހަރު 8 ބިލިއަނެއްހައި ރުފިޔާ ވަނީ ދައުލަތުގެ ޚަރަދުތައް ހަމަޖެއްސުމުގެ ނަމުގައި ޗާޕްކޮށްގެން ނެރެފައިކަމަށް ރައީސް ވިދާޅުވިއެވެ.
މިއީ އޭގެ ކުރީގެ 40 އަހަރު ފައިސާ ޗާޕްކުރި ޖުމްލަ މިންވަރާ ނުބައްދަލު ބޮޑު އަދަދެއް ކަމަށާއި އޭގެ ނަތީޖާއެއްގެ ގޮތުން ދިވެހި ރުފިޔާގެ ހަމައަގު ހިފެހެއްޓުމުގައި ބޮޑެތި ދަތިތަކަކާ ކުރިމަތިވެފައިކަން ފާހަގަކުރައްވައި ރައީސް ވިދާޅުވީ ތަކެތީގެ އަގު މިކަމާއި ގުޅިގެން ވަރަށް ބޮޑަށް އުފުލިފައި ކަމަށެވެ.
މިކަންކަމާއި އެކު ސަރުކާރާ ހަވާލުވުމަށްފަހު އެންމެ ފުރަތަމަ ކުރި އެއް ކަމަކީ ޣައިރު ޒިންމާދާރުކަމާއެކު މަނިޓައިޒްކުރަމުން ދިޔަދިޔުން ނިމުމަކަށް ގެނައުން ކަން ރައީސް ވިދާޅުވިއެވެ. މިގޮތުން 31 ޑިސެންބަރު 2023ވަނަ ދުވަހުން ފެށިގެން ފައިސާ ޗާޕުކުރުން ހުއްޓާލާ ދައުލަތުގެ ޚަރަދަށް ޒިންމާވުމުގެ ޤާނޫނުގައި ސަސްޕެންޑް ކުރެވުނު މާއްދާތައް އިއާދަކުރެވުނުކަމަށާއި އަދި އިޤުތިޞާދު ހަމަމަގަށް އެޅުވުމަށް މަސައްކަތް ފެށިގެންދިޔަ ކަން ރައީސް ހާމަކުރެއްވި އެވެ.
ރިއެކްޝަންސް
