ތެލަސީމިއާ ޕޭޝަންޓުންގެ ކަންކަމަށް ޚާއްޞަ ސަމާލުކަމެއް ދެއްވާނެކަމަށް ރައީސް ވިދާޅުވެއްޖެ
ރާއްޖޭގެ ތެލަސީމިއާ ޕޭޝަންޓުންގެ ކަންކަމަށް ޚާއްޞަ ސަމާލުކަމެއް ދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައި ވަނީ ތެލަސީމިއާ ކޮމިއުނިޓީއާއެކު މިއަދު ރައީސް އޮފީހުގައި ބޭއްވި ބައްދަލުވުގައި ވާހަކަ ދައްކަވަމުންނެވެ.
ރައީސް އޮފީހުން ވިދާޅުވީ މި ބައްދަލުވުމުގައި ތެލަސީމިއާ ކޮމިއުނިޓީން، އެ ކޮމިއުނިޓީގެ ކަންބޮޑުވުންތަކާއި ބޭނުންތައް ރައީސާ ހިއްސާކުރައްވާފައިކަމަށެވެ. އޭގެ ތެރޭގައި ތެލަސީމިއާ ހޮސްޕިޓަލްގެ ކަންކަމުގައި އެ ކޮމިއުނިޓީގެ ބައިވެރިވުން ހޯދުމާއި، މޯލްޑިވްސް ބްލަޑް ސަރވިސްގެ ޚިދުމަތް ފުޅާކުރުން ހިމެނޭކަމަށް ރައީސް އޮފީހުން ވިދާޅުވިއެވެ.
ތެލަސީމިއާ ކޮމިއުނިޓީގެ ކަންބޮޑުވުންތަކަށް ސަމާލުކަން ދެއްވާނެކަމަށާއި، އެ ކޮމިއުނިޓީގެ ބައިވެރިވުމާއެކު ސަރުކާރުގެ ސިޔާސަތުތައް އިތުރަށް ފުރިހަމަކުރެވޭނެކަމަށް މިބައްދަލުވުމުގައި ރައީސް މުޢިއްޒު ވިދާޅުވެފައިވާކަމަށް ރައީސް އޮފީހުން ވިދާޅުވިއެވެ. މީގެ އިތުރުން ތެލަސީމިއާ ޕޭޝަންޓުންނަށް ރާއްޖޭގައި ތިބެގެން ފުރިހަމަ ފަރުވާ ލިބޭނެ މަގު ފަހިކުރުމަށް މަސައްކަތްކުރައްވާނެކަމުގެ ޔަޤީންކަންވެސް ރައީސް ދެއްވާފައިވާކަމަށް ރައީސް އޮފީހުން ވިދާޅުވިއެވެ.
ރައީސް މުއިއްޒު ތެލަސީމިއާ ކޮމިއުނިޓީއާއި ބައްދަލުކުރައްވާފައިވާ އިރު ދާދިފަހުން އެމަނިކުފާނު ވަނީ ތެލިސީމިއާ ސެންޓަރަށް ވަޑައިގެން އެތަނުގެ ހާލަތު ބައްލަވާ ލައްވާފައެވެ. އަދި އެ ބައްދަލުވުމަށްފަހު ތެލިސީމިއާ ކޮމިޔުނިޓީއާށް ދިމާވެފައިވާ މައްސަލަތައް ހައްލުކޮށްދެއްވުމަށް އަވަސް ފިޔަވަޅުތަކެއް އަޅުއްވަން ފައްޓަވާފައެވެ.
ރިއެކްޝަންސް
