ޤައުމިއްޔަތުގެ އެއް ބަހާއަކީ ކާބަފައިން ވާރުތަކޮށްދިން އާސާރުތައް: ރައީސް މުއިއްޒު
ޤައުމިއްޔަތުގެ އެއް ބަހާއަކީ ކާބަފައިން ވާރުތަކޮށްދިން އާސާރުތައް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދުނިޔޭގެ ތަރިކައިގެ ދުވަހާ ގުޅިގެން ސޯޝަލް މީޑިއާގައި ޙިއްސާކުރެއްވި ޕޯސްޓެއްގައި ރައީސް ވިދާޅުވީ ޤައުމެއްގެ ގޮތުގައި ދެމިތިބެވޭނީ ތާރީޚީ ތަރިކަތަކާއި އާސާރުތައް ހިމާޔަތްކޮށްގެން ކަމަށެވެ.
"ޤައުމިއްޔަތުގެ އެއް ބަޔަކީ ކާބަފައިން ވާރުތަކޮށްދިން އާސާރުތައް. ޤައުމެއްގެ ގޮތުގައި ދިވެހީންނަށް ދެމިތިބެވޭނީ މި އަގުހުރި ތަރިކަ ޙިމާޔަތްކޮށްގެން." ރައީސްގެ ޕޯސްޓުގައި ވިދާޅުވިއެވެ.
ދުނިޔޭގެ ތަރިކައިގެ ދުވަސް ފާހަގަކުރަނީ ކޮންމެ އަހަރެއްގެ އޭޕްރީލް 18 ވަނަ ދުވަހުއެވެ. މި ދުވަސް ފާހަގަކުރަން ޔުނެސްކޯއިން ނިންމީ 1983 ވަނަ އަހަރުގައެވެ.
ރާއްޖޭގައި ހުރި ތަރިކައާއި އަސާރުތައް ހިމާޔަތްކޮށް އަންނަން އޮތް ޖީލުތަކަށް ފޯރުކޮށްދިނުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. މީގެ ތެރޭގައި ބޮޑުތިލަދުންމަތީގެ އަތޮޅުތަކުގައި ހުރި ތަރިކަތައް ހިމާޔަތްކޮށް، ތަރިކައިން އާމްދަނީ ހޯދުމުގެ ސިޔާސަތެއް ތަންފީޒުކުރުމުގެ މަސައްކަތް ހިމެނެއެވެ.
މީގެ އިތުރުން ޤައުމީ ފެންވަރުގައި ފާހަގަކުރާ ތާރީޙީ ޤައުމީ ދުވަސްތައްވެސް ފާހަގަކުރުމަށް ސަރުކާރުން ހަމަޖައްސާފައި ވަނީ ތާރީޙި ހާދިސާތައް ހިނގާފައިވާ ރަށްތަކާއި ޤައުމީ ބަޠަލުން ނިސްބަތްވާ ރަށްތަކުގައެވެ. އެގޮތުން ކުރިއަށް އޮތް ދެ އަހަރުވެސް ޤައުމީ ދުވަސް ޤައުމީ ފެންވަރެއްގައި ފާހަގަކުރުމަށް ހަމަޖެހިފައިވަނީ ޤައުމީ ދުވަސް އެބޭފުޅަކަށް ނިބަތްވާ ބޮޑުތަކުރާފާނުގެ އުފަންރަށް ހއ. އުތީމުގައެވެ.
ރިއެކްޝަންސް
