ހަ ޕޮއިންޓަށް ލީޑު ފުޅާކުރަން ލިބުނު ފުރުޞަތު ބާސެލޯނާއިން ގެއްލުވާލައިފި
ސްޕެނިޝް ލަލީގާގައި ރޭ ބާސެލޯނާއާއި ރެއާލް ބެޓިސް ބައްދަލުކުރި މެޗު 1-1 ން އެއްވަރުވެ, ހަ ޕޮއިންޓަށް ލީޑު ފުޅާކުރަން ލިބުނު ފުރުޞަތު ބާސެލޯނާއިން ގެއްލުވާލައިފިއެވެ.
ރެއާލް މެޑްރިޑް ވެލެންސިއާ އަތްދަށުވުމުގެ ފައިދާ ބާސެލޯނާ އަށް ނުނެގުނު ނަމަވެސް ތާވަލްގެ ކުރީގައި ބާސެލޯނާ މިވަގުތުވެސް އޮތީ ހަތަރު ޕޮއިންޓްގެ ލީޑެއްގައެވެ. ދެވަނައިގައި ރެއާލް އޮތީ 63 ޕޮއިންޓާއެކުއެވެ.
ރޭގެ މެޗުގައި ބާސެލޯނާ އިން ލީޑު ނެގީ މެޗުގެ ހަތްވަނަ މިނިޓްގައެވެ. މެދުތެރެއަށް ކުޅޭ ގަވީ އަށް ގޯލްޖެހުމުގައި އެހީތެރިވީ މި ފަހުން ބާސެލޯނާއަށް ގިނަ ގޯލަތަކެއް ކާމިޔާބުކޮށްދެމުން އަންނަ ފެރަން ޓޮރޭސް އެވެ. ބެޓިސް އިން ނަތީޖާ އެއްވަރުކުރި އޭގެ 10 މިނިޓްފަހުން ޖިއޮވާނީ ލޮ ސެލްސޯ ފޮނުވާލި ކޯނަރުން ނޭތަން ކާމިޔާބުކޮށްދިން ގޯލާއެކުއެވެ.
މުޅި މެޗު އެއްކޮށް ކަހަލަ ގޮތަކަށް ޑޮމިނޭޓްކޮށްގެން ކުޅުނީ ބާސެލޯނާއިން ނަމަވެސް ބެޓިސްގެ ގޯލަށް އިތުރު ބޯޅައެއް ވައްދާލުމުގައި ބާސެލޯނާ ވަނީ ނާކާމިޔާބު ވެފައެވެ. މިއާއެކު ބާސެލޯނާއިން އެންމެ ފަހުން ކުޅުނު ހަތް މެޗުން މޮޅުވެ ދަމަހައްޓަމުން ދިޔަ ކާމިޔާބުގެ ސިލްސިލާ މިވަނީ ނިމިފައެވެ.
މެޗުގައި ބާސެލޯނާގެ ފުލްބެކް ޖޫލްސް ކޫންޑޭއަށް އަލުން ލީޑު ނަގަން ރަނގަޅު ފުރުޞަތެއް ލިބުންނަމަވެސް ރެއާލްގެ ގޯލް ކީޕަރު އެޑްރިއަން ވަނީ ހާފުގެ މެދުތެރެއިން ބޯޅަ ސާފުކޮށްލާފައެވެ.
ބާސެލޯނާއަށް ދެން ކުރިއަށް އޮތީ ޗެމްޕިއަންސް ލީގުގެ ކުއާޓަރ ފައިނަލްގެ ފުރަތަމަ ލެގުގައި ޖަރުމަނުގެ ބޮރޫޝިއާ ޑޯޓްމަންޑާއި ބުދަ ދުވަހު ވާދަކުރާ މެޗެވެ.
ރިއެކްޝަންސް
