އެމްބާޕޭ އާއި ރުޑީގާވެސް ޔުއެފާގެ އަދަބުން ސަލާމަތްވެ އާސެނަލް މެޗުގައި ކުޅެވޭނެކަން ޔަޤީންވެއްޖެ
ރެއާލް މެޑްރިޑްގެ ކީލިއަން އެމްބާޕޭ އާއި އެންޓޯނިއޯ ރުޑީގާ ޔުއެފާގެ އަދަބުން ސަލާމަތްވެ ކުރިއަށްއޮތް ޗެމްޕިއަންސް ލީގު ކުއާޓަރ ފައިނަލްގައި އާސެނަލްއާ ދެކޮޅަށް ކުޅެވޭނެކަން ޔަގީންވެއްޖެއެވެ.
ފާއިތުވި ހަފުތާގައި ޔުއެފާއިން އެމްބާޕޭ އާއި ރުޑީގާ ހިމެނޭހެން ރެއާލްގެ ހަތަރު ކުޅުންތެރިއެއްގެ އަޙްލާޤީ މައްސަލައެއް ބަލަން ވަނީ ފަށާފައެވެ. އެއީ މާޗު 12 ވަނަ ދުވަހު ޗެމްޕިއަންސް ލީގުގައި އެތެލްޓިކޯ އާ ވާދަކުރި މެޗު ޕްނަލްޓީ ޖަހައިގެން ރެއާލް މޮޅުވުމަށްފަހު ކުޅުންތެރިންގެ ފަރާތުން ފެނިގެންދިޔަ ބޭއަދަބީ އަމަލުތަކާ ގުޅިގެންކަމުގައި ބައެއް ނޫސްތަކުން ރިޕޯޓްކޮށްފައިވެއެވެ. ޔުއެފާއިން ދެން މައްސަލަ ބަލާ އަނެއް ދެ ކުޅުންތެރިންނަނީ ވިނީޝިއުސް ޖޫނިއަރ އަދި ޑެނީ ސެބާލޮސް އެވެ.
ޔުއެފާގެ އެތިކް އަދި ޑިސިޕްލިނަރީ ބޮޑީ އިން ކުޅުންތެރިންނާ ގުޅޭ މައްސަލަ ބެލުމަށްފަހު ހުކުރު ދުވަހު ނިންމާފައިވަނީ އެމްބާޕޭ އަދި ރުޑީގާވެސް ޔުއެފާގެ 'ބޭސިކް ރޫލްސް އޮފް ޑީސެންޓް ކޮންޑަކްޓާ' ޚިލާފްވެފައިވާ ކަމަށެވެ. ނަމަވެސް ކޮމިޓީން ނިންމީ ދެ ކުޅުންތެރިނަށްވެސް އެއް އަހަރުގެ ޕްރޮބޭޝަން މުއްދަކަށް ދެމިގެންވާ އެއްމެޗުގެ ސަސްޕެންޝަނެއް އަދަބެއްގެ ގޮތުގައި ދިނުމަށެވެ.
މީގެ އިތުރުން ރުޑީގާ ވަނީ 40,000 ޔޫރޯ (44,000 އެމެރިކާ ޑޮލަރު) އަދި އެމްބާޕޭ 30,000 ޔޫރޯ (33,000 އެމެރިކާ ޑޮލަރު) ން ޖޫރިމަނާކުރަން ނިންމާފައެވެ.
ޔުއެފާގެ ނިންމުމާއެކު ރެއާލްގެ ހަތަރު ކުޅުންތެރިންވެސް އާސެނަލްގެ މެޗުގައި ކުޅެވޭނެ ކަމުގެ ޔަޤީންކަންވަނީ ލިބިފައެވެ. ނަމަވެސް ރެއާލްގެ އެހެން ޑިފެންޑަރެއް ކަމަށްވާ އައުރެލިން ޗޮއަމެނީ ހުރީ އެހެން މައްސަލައެއްގައި ސަސްޕެންޝަންގައެވެ.
ރިއެކްޝަންސް
