ޔަމަނުގެ ފެނުގެ މުހިއްމު ރިޒާވަކަށް އެމެރިކާއިން ބޮންއަޅައިފި
އެމެރިކާއިން ޔަމަނުގެ ހުޅަނގުގެ ސަރަޙައްދެއްގައި ޤާއިމްކޮށްފައިވާ ފެނުގެ މުހިއްމު ރިޒާވަކަށް ބޮންއަޅައިފިއެވެ. މި ހަމަލާއާ ގުޅިގެން ޔަމަނުގެ 60,000 އާންމުނަށް ފެނުގެ ހިދުމަތް މެދުކެނޑިގެން ދާނެކަމަށް ޔަމަނުގެ އަލް-މަސިރަހް ޓީވީން ވަނީ ބުނެފައެވެ. މިއީ ޔަމަނުގެ ހޮދައިދާ ސަރަހައްދުގައި ޤާއިމްކޮށްފައިވާ ފެނުގެ ރިޒާވެކެވެ.
އެމެރިކާއިން ޔަމަނުގެ ފެން ޕްލާންޓަށް އަމާޒުކޮށް މި ހަމަލާ ދިންއިރު އެއީ ހޫތީންގެ އަސްކަރީ ސައިޓެއްވެސް ނޫނެވެ. އެހެންކަމުން އެމެރިކާގެ މި އަމަލަކީ ގަސްތުގައި ޔަމަނުގެ ރައްޔިތުންނަށް ގަނޑުކޮށް އަދަބު ދިނުމުގެ ގޮތުން ހިންގި ހަނގުރާމައިގެ ޖަރީމާއެއް ކަމުގައި ގިނަ ފަރާތްތަކުން ދަނީ ފާހަގަކުރަމުންނެވެ.
9 އަހަރުގެ ދާހިލީ ހަނގުރާމައިގައި ހަފުސްވެފައިވާ ޔަމަނަމުގެ ރައްޔިތުން މިހާރުވެސް ދަނީ ހަނގުރާމައިން އަރައިނުގަނެވި ބަނޑުހައިހޫނުކަމުގައި ދުވަސްތައް ހޭދަކުރަމުންނެވެ.
އެމެރިކާއިން ޔަމަނަށް ހަމަލާދޭން ފަށާފައިވަނީ ހޫތީން ރައްކަނޑުގައި އިޒްރާއިލްގެ ބޯޓުފަހަރަށް އަމާޒުކޮށް ކަނޑުގެ އޮޕަރޭޝަން އަލުން ފަށާފައިވަނިކޮށެވެ. ހޫތީންގެ އޮޕަރޭޝަން އަލުން ފެށީ ޣައްޒާއަށް އިންސާނީ އެހީ ވެއްދުން އިޒްރާއިލްއިން ބަންދުކޮށްފައިވާތީވެ އެކަމަށް އިޙްތިޖާޖުކޮށް ޣައްޒާގެ ރައްޔިތުންނާ އެއްކޮށްތިބިކަން ހާމަކޮށްދިނުމުގެ ގޮތުންނެވެ. ހޫތީންވަނީ ހަމަލާތައް އަލުން ފެށުމުގެ ކުރިން އިޒްރާއިލްއިން ޣައްޒާއަށް އިންސާނީ އެހީ ވެއްދުން މަނާކޮށްފައި އޮތްއޮތުން ނިމުމަކަށް ގެންނަށް ފަސް ދުވަހުގެ މުހުލަތެއް ދީފައެވެ. ނަމަވެސް އިޒްރާއިލް އެކަމަށް ބޯލަނބާފައެއް ނުވެއެވެ. ބަދަކުގައި އިޒްރާއިލްއަށް ވާގިވެރި އެމެރިކާއިން ޔަމަނަށް ބޮންއަޅަން ފެށީ ފާއިތުވި މަހުއެވެ.
ރިއެކްޝަންސް
