2030ގައި ބާއްވާ ވޯލްޑްކަޕްގައި 64 ޤައުމު ވާދަކުރުމުގެ ހިޔާލު ޔުއެފާގެ ރައީސް ސެފެރިންއަށް ކަމަކުނުދޭ
2030ގައި ބޭއްވުމަށް ހަމަޖެހިފައިވާ ފިރިހެނުންގެ ވޯލްޑްކަޕްގައި 64 ޤައުމުން ބައިވެރިވާގޮތަށް ހުށަހަޅާފައިވާ ހުށަހެޅުމަކީ "ގޯސް ހިޔާލެއް" ކަމަށް ޔުއެފާގެ ރައީސް އަލެކްސަންޑަރ ސެފެރިން ސިފަކުރައްވައިފިއެވެ.
ފީފާގެ ނައިބު ރައީސްކަންވެސް ކުރައްވާ ސެފެރިން މިހެން ވިދާޅުވީ އޮންލައިންކޮށް ބުރާސްފަތި ދުވަހު ބޭއްވި ފީފާގެ ރޫލިން ކައުންސިލްގައި ވާހަކަދައްކަވަމުންނެވެ. އެއީ އެކަމަށްއެދި ޔުރުގުއާއީއިން ހުށަހެޅި ހުށަހެޅުމަކަށް ވާހަކަ ދައްކަވަމުންނެވެ. ފީފާއިންވަނީ ޕްރޮޕޯސަލް ރިވިއު ކުރުމަށް ނިންމާފައެވެ.
"މިއީ އަހަންނަށް ވަރަށް ހައިރާން ކުރުވަނިވި ހުށަހެޅުމެއް. އަހަންނަށް ހީވަނީ އެއީ ގޯސް ހިޔާލެއް ހެން" ޔުއެފާގެ އަހަރީ ބައްދަލުވުމުގައި ވާހަކަ ދައްކަވަމުން ސެފެރިން ވިދާޅުވިއެވެ.
އަންނަ އަހަރު އުތުރު އެމެރިކާގައި ބާއްވާ ވޯލްޑްކަޕްވެސް ވެގެންދާނީ އިތުރު 16 ޓީމާއެކު ޖުމްލަ 48 ޤައުމު ފުރަތަމަ ފަހަރަށް ވާދަކުރާ މުބާރާތަކަށެވެ. މި ބަދަލަކީ ފީފާގެ ރައިސް ގިއާނީ އިންފަންޓީނޯ ގެ ތާއިދާއެކު ގެނެވުނު ބަދަލެލެވެ. އިންފަންޓީނޯގެ އެބަދަލަށް ތާއީދުކޮށްފައިވަނި މުބާރާތް ފުޅާވުމަކީ ފުޓްބޯޅަ ތަރައްޤީކުރުމަށް ގިނަ ފައިސާ ހޯދޭނެ މަގެއް ކަމަށް ދެކިގެންނެވެ.
64 ޓީމު ބައިވެރިކުރާ ހުށަހެޅުމާމެދު ފާޑުކިއުންތެރިން ބުނަނީ އެ ބަދަލާއެކު މުބާރާތުހެ ކޮލިޓީ ދަށްވެގެންދާނެކަމުގައެވެ.
ސެފެރިން ވަނީ ޔުރުގުއާއީގެ ހުށަހެޅުމާމެދު އެހެން ނަޒަރަކުންވެސް ސުވާލު އުފައްދާފައެވެ. އެއީ އެ ހުށަހެޅުން ފީފާއަށް ހުށަހެޅުމުގެ ކުރިން އެކަމާ ގުޅޭ އެއްވެސް މައުލޫމާތެއް ލިބިފައި ނެތުމުން ކަމުގައި އޭނާ ވިދާޅުވިއެވެ. "އަހަންނަކަނަށް ނޭނގެ މީ ކޮންތާކުން އައި ހިޔާލެއް ކަމެއް".
މިހާތަނަށް ބާއްވާ އެންމެ ކޮމްޕްލެސް ވޯލްޑްކަޕް 2030 ގައި ބާއްވަން ހަމަޖެހިފައިވާއިރު އެއް މެޗު ޔުރުގުއާއީގައި ބާއްވާގޮތަށްވެސް ވަނީ ހަމަޖެހިފައެވެ. ނަމަވެސް މުބާރާތް އަސްލު ބާއްވާނި ސްޕެއިން އަދި ޕޯޗްގަލްގައި މޮރޮކޯއިން ކޯ-ހޮސްޓް ކުރާ ގޮތަށެވެ. މީގެ އިތުރުން މުބާރާތަށް 100 އަހަރު ފުރުން ފާހަގަކުރުމުގެ ގޮތުން ތިން ބައްރެއްގައި މުބާރާތް ބޭއްވުމުގެ ގޮތުން ދެކުނު އެމެރިކާގެ ތިންގައުމު ކަމަށްވާ އާޖެންޓީނާ, ޕެރަގުއާއީ އަދި ޔުރުގުއާއީގައި އެމުބާރާތުގެ ކޮންމެވެސް އެއް މެޗެއް ކުޅޭނެއެވެ. 1930ގެ ވޯލްޑް ކަޕް ބާއްވާފައިވަނީ ޔުރުގުއާއީގައެވެ.
ބުރާސްފަތިދުވަހު ފީފާގެ ރައީސް އިންފަންޓީނޯ ވަނީ ޔުއެފާގެ 55 މެމްބަރު ޤައުމާއެކު ބޭއްވި ބައްދަލުވުމުގައި ކީނޯޓް ސްޕީޗެއް ދެއްވާފައެވެ. ނަމަވެސް 64 ޤައުމު ވޯލްޑްކަޕްގައި ވާދަކުރުމާ ގުޅޭގޮތުން ކޮމެންޓެއް ކޮށްފައެއް ނުވެއެވެ.
ޕްރޮޕޯސަލް އާ ގުޅޭގޮތުން ނިންމުމެއް ނިންމާނެ ދުވަހެއް އަދި ނިންމާނެ ގޮތަކާ ބެހޭގޮތުން ފީފާއިން އިތުރު ތަފްޞީލެއް ދީފައެއް ނުވެއެވެ. ފީފާގެ 211 މެމްބަރުންގެ ފެޑޭރޭޝަން އޮންނާނީ މެއި 15 ވަނަ ދުވަހު ޕެރަގުއާއީގައެވެ.
ރިއެކްޝަންސް
