
ޣައްޒާ އާމެދު ދުނިޔޭގެ ދެފުށް ދެގޮތް ޚިޔާނާތް, ޣައްޒާއަށް ވީ ވައުދު ދެމެހެއްޓީ ކޮން ޤައުމުތަކަކުން!
އިޒްރާއިލްއިން ޣައްޒާ ޤައުލްއާންމު ފެށީއްސުރެ ބައިނަލްއަޤުވާމީ މުޖުތަމައުއިން އިޒްރާއިލްއިން ޣައްޒާއަށް ދެމުންދާ ހަމަލާތައް އެތައް ފަހަރެއްގެމަތިން ކުށްވެރި ކުރިއެވެ. ނަމަވެސް ޤަތުލްއާންމު ކުރިއަށްދާ ވަރަކަށް ބައެއް ފަރާތްތަކުން ޣައްޒާގެ ހާލަތަށް ދެމުންދިޔަ އަހަންމިއްޔަތުކަން ވަނީ ކުޑަވަމުން ގޮސްފައެވެ.
މި އާޓިކަލްގައި ޣައްޒާއަށް ވީ ވައުދު ޤައުމުތަކުން ދެމެހެއްޓީ ކިހިނެތްތޯ ބަލާލާނަމެވެ. އެމީހުންގެ ބަހާއި އަމަލު ދިމާވީ ކިހާ ވަރަކަށްތޯ ބަލާލަމާ ހިނގާށެވެ.
1. ޣައްޒާއަށް އެހީގެ ތަކެތި ފޮނުވާނެ ކަމަށް ވީ ވައުދު:
ވަރަށް ގިނަ ޤައުމުތަކުން ޣައްޒާއަށް އެހީގެ ގޮތުގައި ގިނަ ތަކެތި ފޮނުވާނެކަމުގެ ވައުދު ވިއެވެ. ހަމަލާތައް ހުއްޓާލުމާގުޅޭ އެއްބަސްވުމާއި އެކު އެމެރިކާއިން އިން ޣައްޒާއަށް 383 މިލިއަން ޑޮލަރުގެ އެހީ ދިނުމަށް ނިންމިކަމަށް ޔޫއެސްއެއިޑްގެ އޮފިޝަލުން 31 ޖެނުއަރީގައި އިއުލާން ކުރިއެވެ. ނަމަވެސް އެމެރިކާގެ އޮފިޝަލުން ބުނީ ޣައްޒާއަށް އެއްވެސް އެހީއެއް އަދި ފޮނުވާފައި ނުވާކަމަށެވެ.
މާޗު ހަތަރުވަނަ ދުވަހު އަރަބި ލީގުންވެސް ޣައްޒާ އާރާސްތުކުރަން ފަންޑެއް އެކުލަވާނެކަމަށް އިއުލާންކުރިއެވެ. ނަމަވެސް މަހެއްވީއިރުވެސް އެފަންޑަށް އެއްވެސް ފައިސާއެއް ލިބުންކަމަށް އިއުލާންކޮށްފައެއް ނުވެއެވެ.
2. އިޒްރާއިލްއަށް ހަތިޔާރު ފޯރުކޮށްދިނުން މަދުކުރާނެ ކަމަށް ވީ ވައުދު:
އިޒްރާއިލްއަށް އަސްކަރީ އެހީ ފޯރުކޮށްދޭ ޤައުމުތަކުން ފާޑުކިޔުންތެރިންގެ އަނގަބަންދު ކުރަން މަސައްކަތްކުރިއެވެ. މާޗު 5 ވަނަ ދުވަހު އިނގިރޭސިވިލާތް, ފްރާންސް އަދި ޖަރުމަނުވިލާތުން އިޒްރާއިލްއަށް ޣައްޒާއަށް އެހީގެ ތަކެތި ފޯރުކޮށްދޭން ގޮވާލިއެވެ. އަދި އެކަން ނުކޮށްފިނަމަ އެއީ ބައިނަލްއަޤުވާމީ ޤާނޫނަށް ތަބާނުވުންކަމަށްވެސް ބުންޏެވެ. އޭގެ ފަހުން ދެ ހަފުތާ ނުވަނީސް އިޒްރާއިލްއިން ޣާއްޒާގައި އަލުން ހަމަލާތައް ފެށިއެވެ.
މާރިޗު 11 ވަނަ ދުވަހު އިނގިރޭސިވިލާތުން މެދުއިރުމައްޗަށް ކަނޑައަޅުއްވާފައި ހުންނަވާ ވަޒީރު ހެމިޝް ފަލްކޯނާ ވިދާޅުވީ އިނގިރޭސިވިލާތުން އިޒްރާއިލްއަށް ބައެއް ހަތިޔާރު ވިއްކުން މަޑުޖައްސާފައި ވީނަމަވެސް އެފް-35 ގެ ޖެޓްތަކަށް ބޭނުންވާ ޕާޓްސް ސަޕްލައިކޮށްދޭނެ ކަމުގައެވެ.
ހަމަލާތައް އަލުން ފެށުމާ ގުޅިގެން މާރިޗު 18ގައި އިންގިރޭސި ވިލާތާއި, ޖަރުމަނުވިލާޔް އަދި ފްރާންސުން ގުޅިގެން ބަޔާނެއް ނެރުނެވެ. ހަމަލާތައް ވަގުތުން ހުއްޓާލުމަށް ގޮވާލި ނަމަވެސް އިޒްރާއިލްއާ ދެކޮޅަށް އިތުރަށް ފިޔަވަޅެއް އެއްވެސް ޤައުމަކުން އެޅުމަށް ނިންމާފައެއް ނުވެއެވެ. އަދި އިޒްރާއިލްއަށް ހަތިޔާރު ވިއްކުން ހުއްޓާލުމަށް ނުވަތަ މަޑުޖައްސާލުމަށް ވެސް ނިންމުމެއް ނިންމާފައެއް ނުވެއެވެ.
އެމެރިކާއަކީ އިޒްރާއިލްއަށް އެންމެ ގިނައިން ހަތިޔާރު ފޯރުކޮށްދޭ ޤައުމެވެ. އާންމުންގެ ފިއްތުންތަކާއެކު ބައެއްކަހަލަ ހަތިޔާރު ފޯރުކޮށްދިނުން ފާއިތުވި އަހަރު މަޑުޖައްސާލުމަށްފަހު މިއަހަރު އަލުންވަނީ ހަތިޔާރުފޯރުކޮށްދޭން ފަށާފައެވެ.
ދެވަނައަށް އެންމެ ގިނައިން ހަތިޔާރު ފޯރުކޮށްދޭ ޖަރުމަނު ވިލާތުންވެސް އިޒްރާއިލްއަށް ހަތިޔާރު ފޯރުކޮށްދިނުން ހަނގުރާމަ ފެށިއްސުރެ މިއަދާ ހަމައަށްވެސް މަދުކޮށްފައެއް ނުވެއެވެ.
3. ޣައްޒާގެ މައްސަލައަށް ބައިނަލްއަޤުވާމީ މުޖުތަމައުއިން ވަންނަންޖެހޭކަމަށް ގޮވާލި ޤައުމުތައް:
ގިނަ ޤައުމުތަކެކޭ އެއްފަދައިން ދެކުނު އެފްރިކާއިން އިޒްރާއިލްގެ ހަމަލާތައް ކުށްވެރި ކުރިއެވެ. އަދި ބައިނަލް އަޤުވާމީ މުޖުތަމައުއިން އެކަމާ ބެހުމަށްވެސް ގޮވާލިއެވެ. ދެކުނު އެފްރިކާ އަކީ އިޒްރާއިލްއާ ދެކޮޅަށް ޤާނޫނީ ފިޔަވަޅު އަޅަން ކެރުނު ހަމައެކަނި ޤައުމެވެ. 2023 ވަނަ އަހަރު އިޒްރާއިލްއިން ޣައްޒާގައި ޤަތުލްއާންމެއް ހިންގަމުން ދާކަމަށް ކަނޑައަޅައިދިނުމަށް ދި ހޭގްގައި ހުންނަ ބައިނަލް އަޤުވާމީ ޖިނާއީ ކޯޓުގައި ދެކުނު އެފްރިކާއިން އެދުނެވެ. އެ މައްސަލަ އަދިވެސް ކޯޓުގައި ކުރިއަށްދަނީއެވެ.
ކޯޓުން އިޒްރާއިލްއަށް އެންގި އެންގުމަކަށް އެއްވެސް ވަރަކަށް އިޒްރާއިލްއިން ބޯލަނބަމުން ނުދާކަމަށް ބައިނަލްއަޤުވާމީ ޖަމާއަތްތަކުން ދަނީ ބުނަމުންނެވެ.
ހަނގުރާމަ ފެށިފަހުން ހާއިތުވި 18 މަސްދުވަހުގެ ތެރޭގައި ޣައްޒާގެ ހާލަތާމެދު ބައިނަލްއަޤުވާމީ މުޖުތަމައުއިން އެތައް ވާހަކަ ދެއްކިއެވެ. ނަމަވެސް އިޒްރާއިލްއާ ދެކޮޅަށް ފިޔަވަޅެއް އަޅަން ކެރުނު ޤައުމެއް, އިސްލާމީ އަދި މުސްލިމު-އަރަބި ލީޑަރެއް އަދި ޤައުމެއްވެސް ނެތެވެ. ހަޤީގަތަކީ މިއީއެވެ.
ރިއެކްޝަންސް






